സം​വി​ധാ​യ​ക​ന്‍ ചി​ദം​ബ​ര​ത്തി​നെ​തി​രാ​യ ലൈം​ഗി​കാ​തി​ക്ര​മ​ക്കേ​സ് :മൊഴി നൽകാൻ നടി ഉടൻ കൊച്ചിയിലെത്തും;

കൊച്ചി: മലയാള സിനിമയിൽ 'മഞ്ഞുമ്മൽ ബോയ്സ്' എന്ന ബ്രഹ്മാണ്ഡ ഹിറ്റിലൂടെ പ്രശസ്തിയുടെ കൊടുമുടിയിൽ നിൽക്കുന്ന സംവിധായകൻ ചിദംബരത്തിന് നേരെ നിയമക്കുരുക്ക് മുറുകുന്നു. യുവനടി നൽകിയ ലൈംഗികാതിക്രമ പരാതിയിൽ വരുംദിവസങ്ങൾ സംവിധായകന് നിർണ്ണായകമാകും. നിലവിൽ വിദേശത്തുള്ള പരാതിക്കാരിയായ നടി രണ്ടു ദിവസത്തിനുള്ളിൽ കൊച്ചിയിൽ വിമാനമിറങ്ങുമെന്നാണ് ലഭിക്കുന്ന സൂചനകൾ. നാട്ടിലെത്തിയ ഉടൻ മജിസ്‌ട്രേറ്റിന് മുന്നിൽ ഹാജരായി രഹസ്യമൊഴി രേഖപ്പെടുത്തുന്നതോടെ കേസിൽ വൻ ട്വിസ്റ്റുകൾ ഉണ്ടാകുമെന്നാണ് സിനിമാ ലോകത്തെ സംസാരം.

നടിയുടെ മൊഴി രേഖപ്പെടുത്തിയ ശേഷം ചിദംബരത്തെ നേരിട്ട് ചോദ്യം ചെയ്യാനാണ് എറണാകുളം സൗത്ത് പോലീസിന്റെ നീക്കം. ചോദ്യം ചെയ്യലിന് പിന്നാലെ അറസ്റ്റ് ഉൾപ്പെടെയുള്ള കർശന നടപടികളിലേക്ക് പോലീസ് കടന്നേക്കുമെന്ന വാർത്തകൾ പരന്നതോടെ സിനിമാ സെറ്റുകളിലും വാട്സാപ്പ് ഗ്രൂപ്പുകളിലും ചർച്ചകൾ കൊഴുക്കുകയാണ്.

2022-ൽ എളംകുളത്തെ ഒരു ഫ്ലാറ്റിൽ വെച്ച് നടന്ന സംഭവമാണ് ഇപ്പോൾ ചിദംബരത്തിന് വിനയായിരിക്കുന്നത്. ഫ്ലാറ്റിലേക്ക് അതിക്രമിച്ചു കയറിയ സംവിധായകൻ മോശമായ ഉദ്ദേശ്യത്തോടെ പെരുമാറിയെന്നാണ് നടിയുടെ മൊഴി. സ്ത്രീത്വത്തെ അപമാനിക്കൽ, ലൈംഗികാധിക്ഷേപം തുടങ്ങിയ ഗുരുതര വകുപ്പുകളാണ് ഇദ്ദേഹത്തിനെതിരെ ചുമത്തിയിരിക്കുന്നത്. ഹേമ കമ്മിറ്റി റിപ്പോർട്ടിന് പിന്നാലെ മലയാള സിനിമയിൽ വീശിയടിച്ച മീറ്റൂ തരംഗത്തിന്റെ തുടർച്ചയായാണോ ഈ പരാതിയെന്നും സോഷ്യൽ മീഡിയയിൽ ചർച്ചകളുണ്ട്.

'ജാൻ എ മൻ' എന്ന ചിത്രത്തിലൂടെ ശ്രദ്ധേയനായി 'മഞ്ഞുമ്മൽ ബോയ്സി'ലൂടെ മലയാളത്തിലെ മുൻനിര സംവിധായകനായി ഉയർന്ന ചിദംബരത്തിനെതിരെയുള്ള ഈ നീക്കം സിനിമാ വ്യവസായത്തെ ഒന്നടങ്കം ഞെട്ടിച്ചിരിക്കുകയാണ്. നടിയുടെ രഹസ്യമൊഴിയിൽ എന്തൊക്കെ പുതിയ വെളിപ്പെടുത്തലുകൾ ഉണ്ടാകുമെന്ന ആകാംക്ഷയിലാണ് ഇപ്പോൾ എല്ലാവരും.