/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/media_files/2024/12/28/kV2YEQqXKZb0yzv0aSt9.PNG)
ആലപ്പുഴ: ചെങ്ങന്നൂരില് സര്ക്കാര് ജോലി വാഗ്ദാനം ചെയ്തു ലക്ഷങ്ങള് തട്ടിയ യുവതി അറസ്റ്റിലായി. ആലപ്പുഴ പുലിയൂര് സ്വദേശിനി സുജിതയെയാണ് ചെങ്ങന്നൂര് പൊലീസ് പിടികൂടിയത്. ഇവര്ക്കെതിരെ പല സ്റ്റേഷനുകളിലും ജോലി തട്ടിപ്പ് കേസുകളുണ്ടെന്ന് പൊലീസ് പറയുന്നു. ബുധുനൂര് സ്വദേശിനിയായ യുവതി നല്കിയ പരാതിയിലാണ് അറസ്റ്റ്. സര്ക്കാര് ആയൂര്വേദ ആശുപത്രിയില് ജോലി വാങ്ങി നല്കാമെന്ന് പറഞ്ഞ് സുജിത 4.25 ലക്ഷം രൂപയാണ് ബുധുനൂര് സ്വദേശിനിയായ യുവതിയില് നിന്ന് കൈക്കലാക്കിയത്. താനും ആയുര്വേദ ആശുപത്രിയിലെ ജോലിക്കാരിയാണെന്നും, പണം കൊടുത്താണ് ജോലിയില് കയറിയതെന്നും സുചിത പരാതിക്കാരിയെ പറഞ്ഞു വിശ്വസിപ്പിച്ചിരുന്നു. ഉദ്യോഗാര്ഥികളുടെ വിശ്വാസം ആര്ജ്ജിക്കാനായി സര്ക്കാര് ജീവനക്കാരുടെ വ്യാജ തിരിച്ചറിയല് കാര്ഡും ഇവര് ധരിച്ചിരുന്നു. 2023 ഫെബ്രുവരി 25നാണ് പണം വാങ്ങിയതെന്ന് പരാതിക്കാരി പറഞ്ഞു. രണ്ട് മാസത്തിനകം ജോലിയില് കയറാമെന്നായിരുന്നത്രെ വാഗ്ദാനം. എട്ട് മാസം കഴിഞ്ഞപ്പോള് ആദ്യ ഘട്ടത്തില് കുറച്ച് പേരുടെ ജോലി ശരിയായിട്ടുണ്ടെന്ന് പറഞ്ഞ് ഒരു പിഎസ്സി റാങ്ക് ലിസ്റ്റ് കാണിച്ചു. അടുത്ത ലിസ്റ്റ് ഇവരുടേതാണെന്നും പറഞ്ഞു. എന്നാല് പിന്നീട് ജോലിയോ പണമോ തിരികെ ലഭിക്കാതെ ഇരുന്നതോടെ ഉദ്യോഗാര്ത്ഥി പൊലീസില് പരാതി നല്കുകയായിരുന്നു. അറസ്റ്റിലായ പുലിയൂര് സ്വദേശിനി സുജിത സുരേഷിനെതിരെ ആലപ്പുഴയിലെ വിവിധ പൊലീസ് സ്റ്റേഷനുകളില് ജോലി തട്ടിപ്പ് കേസുകളുണ്ട്. വണ്ടി ചെക്ക് നല്കി കബിളിപ്പിച്ച കേസ് കോടതിയിലും നിലനില്ക്കുന്നു. പ്രതിയെ കോടതിയില് ഹാജരാക്കിയ ശേഷം ജുഡീഷ്യല് കസ്റ്റഡിയില് റിമാന്ഡ് ചെയ്തു.