രാജകുമാരിയില്‍ നവജാതശിശുവിനെ കൊന്ന് കുഴിച്ചിട്ടത് അമ്മ

തൊടുപുഴ: രാജകുമാരി കജനാപ്പാറയിലെ അരമനപ്പാറ എസ്റ്റേറ്റില്‍ നിന്നു നവജാത ശിശുവിന്റെ മൃതദേഹം കണ്ടെത്തിയ സംഭവത്തില്‍ വഴിത്തിരിവ്. കുട്ടിയെ മാതാവ് കൊലപ്പെടുത്തി കുഴിച്ചിട്ടതാണെന്ന് ചോദ്യം ചെയ്യലില്‍ നിന്ന് വ്യക്തമായതായി രാജാക്കാട് പൊലീസ് അറിയിച്ചു. പ്രതി ജാര്‍ഖണ്ഡ് സ്വദേശിനിയായ പൂനം സോറന്റെ (21) അറസ്റ്റ് രേഖപ്പെടുത്തി.

പൂനം സോറന്റെ ആദ്യ ഭര്‍ത്താവ് കഴിഞ്ഞ ഡിസംബറില്‍ മരിച്ചു. അതിനുശേഷമാണ് ജാര്‍ഖണ്ഡ് സ്വദേശിയായ മോത്തിലാല്‍ മുര്‍മു ഇവര്‍ക്കൊപ്പം താമസമാരംഭിച്ചത്. ഗര്‍ഭിണിയാണെന്ന് വിവരം യുവതി ഇയാളില്‍നിന്നു മറച്ചു വച്ചിരുന്നു. കഴിഞ്ഞ ദിവസങ്ങളില്‍ സുഖമില്ലെന്ന് പറഞ്ഞ് പൂനം സോറന്‍ ജോലിക്ക് പോയിരുന്നില്ല.

ഇവര്‍ ആരുമറിയാതെ പെണ്‍കുഞ്ഞിനെ പ്രസവിച്ച ശേഷം ശ്വാസം മുട്ടിച്ച് കൊലപ്പെടുത്തി കുഴിച്ചിട്ടെന്നാണ് പൊലീസിന്റെ നിഗമനം. മോത്തിലാല്‍ മുര്‍മുവിന് ഇക്കാര്യത്തില്‍ അറിവുണ്ടായിരുന്നില്ലെന്നാണ് പൊലീസ് പറയുന്നത്. കുട്ടി ഉണ്ടായ കാര്യം അറിഞ്ഞാല്‍ ഇയാള്‍ ഉപേക്ഷിച്ചു പോകുമെന്ന് ഭയന്നാണ് കൃത്യം ചെയ്തതെന്ന് പൂനം സോറന്‍ പൊലീസിന് മൊഴി നല്‍കിയിട്ടുണ്ട്.