രാജ്യത്ത് വിദ്യാര്‍ത്ഥി ആത്മഹത്യകള്‍ കൂടിയെന്ന് എന്‍സിആര്‍ബി കണക്ക്

ന്യൂഡല്‍ഹി: ഇന്ത്യയില്‍ വിദ്യാര്‍ത്ഥി ആത്മഹത്യകള്‍ വര്‍ധിച്ചതായി പുതിയ കണക്കുകള്‍. 2019 നെ അപേക്ഷിച്ച് 2023 ല്‍ രാജ്യത്ത് വിദ്യാര്‍ത്ഥികളുടെ ആത്മഹത്യകളുടെ എണ്ണം 34 ശതമാനം വര്‍ധിച്ചതായി നാഷണല്‍ ക്രൈം റെക്കോര്‍ഡ്‌സ് ബ്യൂറോയുടെ (എന്‍സിആര്‍ബി) കണക്കുകള്‍ വ്യക്തമാക്കുന്നു.

കഴിഞ്ഞ ദശകത്തില്‍, വിദ്യാര്‍ത്ഥി ആത്മഹത്യകളുടെ എണ്ണം ഏകദേശം 65% വര്‍ധിച്ചു, 2013 ല്‍ 8,423 ല്‍ നിന്ന് 2023 ല്‍ 13,892 ആയി. കഴിഞ്ഞ ദശകത്തില്‍ ആത്മഹത്യ മൂലമുള്ള മരണങ്ങളുടെ ആകെ എണ്ണത്തേക്കാള്‍ കുത്തനെയുള്ളതാണ് ഈ വര്‍ധനവ്.

2013 നെ അപേക്ഷിച്ച്, 2023 ല്‍ ആത്മഹത്യ മൂലമുള്ള മൊത്തം മരണങ്ങളുടെ എണ്ണം 27% വര്‍ധിച്ചു (2013 ല്‍ 1.35 ലക്ഷം, 2023 ല്‍ 1.71 ലക്ഷം). 2019 ല്‍ 1.39 ലക്ഷം ആത്മഹത്യ മരണങ്ങള്‍ ഉണ്ടായപ്പോള്‍, 2023 ല്‍ 23% വര്‍ധിച്ചു.

2023-ല്‍ രാജ്യത്ത് നടന്ന മൊത്തം ആത്മഹത്യ മരണങ്ങളില്‍ 8.1% വിദ്യാര്‍ത്ഥികളാണ്. ഒരു ദശാബ്ദം മുമ്പ് 6.2% ആയിരുന്നു. തൊഴില്‍ അനുസരിച്ച് തരംതിരിച്ചാല്‍, 2023 ല്‍ ആത്മഹത്യയിലൂടെയുള്ള മൊത്തം മരണങ്ങളില്‍ 27.5% ദിവസ വേതനക്കാരാണ്, അതേസമയം വീട്ടമ്മമാര്‍ 14 ശതമാനവും സ്വയം തൊഴില്‍ ചെയ്യുന്നവര്‍ 11.8 ശതമാനവും ആണ്.