ക്വട്ടേഷന്‍ സംഘം മദ്യപിച്ചു ബോധംകെട്ടു; രഹസ്യസങ്കേതത്തില്‍നിന്ന് രക്ഷപ്പെട്ടു

ഒറ്റപ്പാലം: വ്യവസായിയെ തോക്ക് ചൂണ്ടി തട്ടികൊണ്ടുപോയതു സാമ്പത്തിക ഇടപാടിന്റെ പേരിലെന്നു പ്രാഥമിക നിഗമനം. ക്വട്ടേഷന്‍ സംഘത്തില്‍ നിന്നു രക്ഷപ്പെട്ട വ്യവസായി വണ്ടൂര്‍ സ്വദേശി സി.പി.മുഹമ്മദലി (72) പരുക്കേറ്റ നിലയില്‍ ഒറ്റപ്പാലത്തെ സ്വകാര്യ ആശുപത്രിയില്‍ ചികിത്സയിലാണ്. കഴിഞ്ഞ ദിവസം രാത്രിയിലാണ് കാര്‍ തടഞ്ഞ് മുഹമ്മദലിയെ തട്ടികൊണ്ടുപോയത്.

17 കോടി രൂപയുടെ സാമ്പത്തിക ഇടപാടിനെ കുറിച്ച് ക്വട്ടേഷന്‍ സംഘം പറഞ്ഞിരുന്നതായി മുഹമ്മദലിയില്‍ നിന്നു ബന്ധുക്കള്‍ക്കു വിവരം ലഭിച്ചു. ഇതു സംബന്ധിച്ച കേസ് സുപ്രീം കോടതിയുടെ പരിഗണനയിലാണെന്നു ബന്ധുക്കള്‍ പറഞ്ഞു. കൊച്ചി വിമാനത്താവളത്തിലേക്കുള്ള യാത്രയ്ക്കിടെ തിരുമിറ്റക്കോട് കോഴിക്കാട്ടിരി പാലത്തിനു സമീപം കഴിഞ്ഞ ദിവസം വൈകിട്ട് ആറരയോടെയാണ് തട്ടിക്കൊണ്ടുപോകല്‍. 

മുഹമ്മദാലിയുടെ കാര്‍ തകര്‍ത്താണു പുറത്തെത്തിച്ച് തട്ടിക്കൊണ്ടുപോയത്. തട്ടിക്കൊണ്ടു പോയി ഒറ്റപ്പാലം പത്തംകുളത്തെത്തിച്ചു. ക്വട്ടേഷന്‍ സംഘം മദ്യപിച്ചു അബോധാസ്ഥയിലായതിനു പിന്നാലെയാണു മുഹമ്മദലി രക്ഷപ്പെട്ടത്. നാട്ടുകാരാണ് ആശുപത്രിയില്‍ പ്രവേശിപ്പിച്ചത്. ക്വട്ടേഷന്‍ സംഘത്തെ പിടികൂടാനായിട്ടില്ല.