ഇറാൻ വിടാൻ പൗരന്മാർക്ക് നിർദ്ദേശം നൽകി ചൈന; മിഡിൽ ഈസ്റ്റിൽ യുദ്ധഭീതി ശക്തമാകുന്നു

ബെയ്‌ജിംഗ്: ഇറാനും അമേരിക്കയും തമ്മിലുള്ള സംഘർഷം ആയുധപോരാട്ടത്തിലേക്ക് നീങ്ങുന്ന സാഹചര്യത്തിൽ, ഇറാനിലുള്ള തങ്ങളുടെ പൗരന്മാരോട് എത്രയും വേഗം രാജ്യം വിടാൻ ചൈന നിർദ്ദേശിച്ചു. ചൈനീസ് വിദേശകാര്യ മന്ത്രാലയവും ഇറാനിലെ ചൈനീസ് എംബസിയും സംയുക്തമായാണ് ഈ അടിയന്തര മുന്നറിയിപ്പ് പുറപ്പെടുവിച്ചത്.

ഇറാനിലെ നിലവിലെ സുരക്ഷാ സാഹചര്യം അങ്ങേയറ്റം അപകടകരമാണെന്നും അവിടെയുള്ള ചൈനീസ് പൗരന്മാർ വാണിജ്യ വിമാനങ്ങളോ കരമാർഗ്ഗമോ ഉടൻ മടങ്ങണമെന്നും നിർദ്ദേശമുണ്ട്. ചൈനീസ് പൗരന്മാർ നിലവിൽ ഇറാനിലേക്കുള്ള യാത്രകൾ പൂർണ്ണമായും ഒഴിവാക്കണമെന്ന് മന്ത്രാലയം ആവശ്യപ്പെട്ടു.

ഇറാനിലെ പൗരന്മാരോട് രാജ്യം വിടാൻ ആവശ്യപ്പെട്ടതിനൊപ്പം ഇസ്രായേലിലുള്ള ചൈനീസ് പൗരന്മാരോടും കടുത്ത ജാഗ്രത പാലിക്കാനും സുരക്ഷിത സ്ഥാനങ്ങളിലേക്ക് മാറാനും ചൈന നിർദ്ദേശിച്ചിട്ടുണ്ട്. ഇറാൻ വിടാൻ ആഗ്രഹിക്കുന്നവർക്ക് ആവശ്യമായ സഹായങ്ങൾ നൽകാൻ അയൽരാജ്യങ്ങളിലെ ചൈനീസ് എംബസികൾക്ക് നിർദ്ദേശം നൽകിയിട്ടുണ്ട്. അസർബൈജാൻ, തുർക്കി, ഇറാഖ് തുടങ്ങിയ രാജ്യങ്ങൾ വഴിയുള്ള കരമാർഗ്ഗമുള്ള യാത്രയ്ക്കും സഹായം ലഭ്യമാക്കും.

കഴിഞ്ഞ ദിവസങ്ങളിൽ മേഖലയിൽ അമേരിക്കയും ഇസ്രായേലും നടത്തിയ സൈനിക നീക്കങ്ങളും മിസൈൽ ആക്രമണങ്ങളുമാണ് സാഹചര്യങ്ങൾ വഷളാക്കിയത്. ജനീവയിൽ നടന്ന സമാധാന ചർച്ചകൾ പരാജയപ്പെട്ടതിനെത്തുടർന്ന് മേഖലയിൽ വലിയ തോതിലുള്ള സൈനിക വിന്യാസമാണ് നടക്കുന്നത്. ചൈനയെക്കൂടാതെ ഇറ്റലി, ജർമ്മനി തുടങ്ങിയ രാജ്യങ്ങളും തങ്ങളുടെ പൗരന്മാരോട് ഇറാൻ വിടാൻ ആവശ്യപ്പെട്ടിട്ടുണ്ട്. പശ്ചിമേഷ്യയിൽ ഒരു പൂർണ്ണ യുദ്ധത്തിനുള്ള സാധ്യത നിലനിൽക്കുന്നതിനാൽ അതീവ ജാഗ്രതയിലാണ് ലോകരാജ്യങ്ങൾ.