കുവൈറ്റിൽ ആവേശമായി പി.എൻ.എ കുടുംബസംഗമം; പ്രവാസി കൂട്ടായ്മയ്ക്ക് കബ്ദിൽ ഉജ്ജ്വല തുടക്കം

കുവൈറ്റ് സിറ്റി: പത്തനംതിട്ട പ്രവാസികളുടെ കരുത്തും ഐക്യവും വിളംബരം ചെയ്ത് പത്തനംതിട്ട എൻആർഐ അസോസിയേഷൻ കുവൈറ്റ് (PNA -Kuwait) സംഘടിപ്പിച്ച കുടുംബസംഗമം ശ്രദ്ധേയമായി. കബ്ദിലെ ക്യാമ്പ് ഷാലയിൽ നടന്ന ‘PNA ഫാമിലി പിക്നിക് 2K26’ വൈവിധ്യമാർന്ന പരിപാടികളാൽ കുവൈറ്റിലെ ശൈത്യകാലത്തിന് ആവേശമായി മാറി.

അസോസിയേഷൻ പ്രസിഡന്റ് അൻസാരി എ. ജബ്ബാറിന്റെ അധ്യക്ഷതയിൽ നടന്ന ചടങ്ങിൽ രക്ഷാധികാരി മുരളി എസ്. പണിക്കർ സംഗമം ഉദ്ഘാടനം ചെയ്തു. പത്തനംതിട്ട മലനാട് മഹോത്സവത്തിന്റെ വിജയത്തിനായി പ്രവർത്തിച്ച വൊളന്റിയർമാരെയും സംഘടനയുടെ വിവിധ സാമൂഹ്യ സേവന പ്രവർത്തനങ്ങൾക്ക് നേതൃത്വം നൽകിയ എക്സിക്യൂട്ടീവ് അംഗങ്ങളെയും ചടങ്ങിൽ ആദരിച്ചു. ഹുസൈൻ, ഷാജി കല്ലുപ്പാറ, ബിനു, ഷാജി കുമ്പഴ, ലൗലി തോമസ്, ഷാജി അബ്രഹാം എന്നിവർ സംഘടനയുടെ സ്നേഹാദരം ഏറ്റുവാങ്ങി.

കലാ-കായിക വിരുന്നൊരുക്കി അംഗങ്ങൾ അസോസിയേഷൻ അംഗങ്ങളുടെയും കുട്ടികളുടെയും കലാപരിപാടികൾ പിക്നിക്കിന് മിഴിവേകി. ശൈത്യകാലത്തിന്റെ തണുപ്പിനെ വകഞ്ഞുമാറ്റി നടന്ന വടംവലി മത്സരവും കായിക വിനോദങ്ങളും ആവേശകരമായി. കുവൈറ്റ് YES ബാൻഡ് അവതരിപ്പിച്ച ഗാനമേളയും മിൻഹാ അൻവറിന്റെ നൃത്തവും സദസ്സിനെ കയ്യിലെടുത്തു. വിഭവസമൃദ്ധമായ ഭക്ഷണവും സംഗമത്തിന്റെ പ്രധാന ആകർഷണമായിരുന്നു.

ഭാവി പദ്ധതികൾ പ്രഖ്യാപിച്ചു വരും വർഷങ്ങളിൽ പത്തനംതിട്ട ജില്ലയിൽ നിന്നുള്ള കൂടുതൽ പ്രവാസികളെ സംഘടനയുടെ ഭാഗമാക്കുമെന്നും ജീവകാരുണ്യ പ്രവർത്തനങ്ങളിൽ കൂടുതൽ സജീവമാകുമെന്നും ഭാരവാഹികൾ അറിയിച്ചു. അസോസിയേഷൻ നടപ്പിലാക്കാൻ ഉദ്ദേശിക്കുന്ന ഭാവി പദ്ധതികളുടെ രൂപരേഖ പ്രസിഡന്റ് അൻസാരി ജബ്ബാർ അവതരിപ്പിച്ചു.

അഡ്വൈസറി ബോർഡ് ചെയർമാൻ അൻവർ സാരംഗ്, ആക്ടിങ് സെക്രട്ടറി ബിനു മാത്യു എന്നിവർ ആശംസകൾ നേർന്നു. പിക്നിക് കൺവീനർ ഹബീബ് റഹ്മാൻ സ്വാഗതവും ട്രഷറർ ഷാജി തോമസ് നന്ദിയും രേഖപ്പെടുത്തി. അഹമ്മദ് ഷാ, റെനി മറിയം, ഹസീന ഹുസൈൻ, അരുൺ ശിവൻകുട്ടി തുടങ്ങിയ എക്സിക്യൂട്ടീവ് അംഗങ്ങൾ പരിപാടികൾക്ക് നേതൃത്വം നൽകി.