കുവൈറ്റിൽ വ്യാപക സുരക്ഷാ പരിശോധന: ഒരൊറ്റ പകൽ 25 പേർ പിടിയിൽ

കുവൈറ്റ് സിറ്റി: കുവൈറ്റിൽ ആഭ്യന്തര മന്ത്രാലയം നടത്തിയ വ്യാപക സുരക്ഷാ-ട്രാഫിക് പരിശോധനകളിൽ ഒരൊറ്റ ദിവസത്തിനുള്ളിൽ 25 പേർ പിടിയിലായി. രാജ്യത്തിന്റെ വിവിധ ഗവർണറേറ്റുകളിൽ ജനറൽ ട്രാഫിക് ഡിപ്പാർട്ട്‌മെന്റ് നടത്തിയ കർശനമായ പരിശോധനയ്ക്കിടെയാണ് ഇവർ പിടിയിലായത്.

താമസ നിയമങ്ങൾ ലംഘിച്ചവർ, വിസ കാലാവധി കഴിഞ്ഞവർ, സ്പോൺസർമാരിൽ നിന്നും ഒളിച്ചോടിയവർ, വിവിധ കേസുകളിൽ വാറണ്ട് നിലവിലുള്ളവർ എന്നിവരാണ് അറസ്റ്റിലായവരിലേറെയും. പിടിയിലായവരെ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറി.

അതേസമയം, ജലീബ് അൽ-ഷുയൂഖിൽ നടന്ന മറ്റൊരു പരിശോധനയിൽ അനധികൃതമായി മദ്യം നിർമ്മിച്ച് വിൽപന നടത്തിയിരുന്ന രണ്ട് ഏഷ്യക്കാരെയും പോലീസ് അറസ്റ്റ് ചെയ്തു. ഒരു പുരുഷനും സ്ത്രീയുമാണ് പിടിയിലായത്. ഇവരുടെ പക്കൽ നിന്നും വിൽപനയ്ക്കായി സൂക്ഷിച്ചിരുന്ന 30 കുപ്പി തദ്ദേശീയ മദ്യവും കണ്ടെടുത്തു. ഇവരെയും തുടർ നിയമനടപടികൾക്കായി ബന്ധപ്പെട്ട അതോറിറ്റിക്ക് കൈമാറി.

രാജ്യത്തെ നിയമവ്യവസ്ഥ കർശനമാക്കുന്നതിന്റെ ഭാഗമായി വരും ദിവസങ്ങളിലും പരിശോധനകൾ തുടരുമെന്ന് സുരക്ഷാ ഉദ്യോഗസ്ഥർ അറിയിച്ചു.

തിയതി: 25/01/2026 കടപ്പാട്: അറബ് ടൈംസ് (Arab Times)