അറബ് പാരമ്പര്യത്തിന്റെ ഭാഗമായ ഫാൽക്കൺ വേട്ട

ഖത്തറിലെ സീലൈൻ മണൽപ്പരപ്പിൽ ആവേശം വിതറി മാർമി രാജ്യാന്തര ഫാൽക്കൺ വേട്ടോത്സവം (Marmi 2026) പുരോഗമിക്കുന്നു. മത്സരത്തിന്റെ 17-ാം പതിപ്പിൽ ഇത്തവണ റെക്കോർഡ് വേഗതയും കടുത്ത പോരാട്ടവുമാണ് നടക്കുന്നത്. കഴിഞ്ഞ ദിവസം നടന്ന യോഗ്യതാ റൗണ്ടുകളിൽ ഫാൽക്കണുകൾ മിന്നുന്ന പ്രകടനമാണ് കാഴ്ചവെച്ചത്.

വേഗതയിൽ വിസ്മയിപ്പിച്ച് ഫാൽക്കണുകൾ ബുധനാഴ്ച നടന്ന 'അൽ ദഅ്‌വ' (Al Da'wa) മത്സരത്തിൽ അൽ ശീഹാനിയ ടീമിന്റെ ഫാൽക്കൺ വെറും 15.752 സെക്കൻഡിൽ ലക്ഷ്യസ്ഥാനത്തെത്തി റെക്കോർഡ് വേഗത കുറിച്ചു. മറ്റൊരു വിഭാഗത്തിൽ സുൽത്താൻ ഹമദ് അൽ ഹുമൈദിയുടെ 'ഗഷാം' എന്ന ഫാൽക്കൺ 17.181 സെക്കൻഡിൽ പറന്നെത്തി ഒന്നാമതായി.

ഫൈനലിലേക്ക് 22 പേർ അത്യന്തം ആവേശകരമായ 'ഹദ്ദാദ് അൽ തഹാദി' (Haddad Al Tahadi) വിഭാഗത്തിൽ ഇതുവരെ 22 ഫാൽക്കണുകൾ ഫൈനലിലേക്ക് യോഗ്യത നേടി. കഴിഞ്ഞ റൗണ്ടിൽ വിജയിച്ച മൂന്ന് പേർക്ക് 1,00,000 ഖത്തർ റിയാൽ വീതം സമ്മാനത്തുക ലഭിച്ചു. ഫൈനലിൽ വിജയിക്കുന്നവർക്ക് ലക്സസ് (Lexus) കാറാണ് ഗ്രാൻഡ് പ്രൈസായി നൽകുന്നത്.

കടുപ്പമേറിയ പോരാട്ടം മത്സരത്തിൽ സെക്കൻഡുകളുടെ നൂറിലൊന്ന് ഭാഗം പോലും വിജയത്തെ സ്വാധീനിക്കുന്ന കടുത്ത പോരാട്ടമാണ് നടക്കുന്നതെന്ന് സംഘാടകർ അറിയിച്ചു. ഫാൽക്കണുകളുടെ പറക്കൽ മികവും അവയെ പരിശീലിപ്പിക്കുന്നവരുടെ കൃത്യതയുമാണ് ഈ മത്സരത്തിന്റെ പ്രധാന ആകർഷണം. വേട്ടയാടൽ വിനോദത്തിലെ ലോകത്തിലെ തന്നെ ഏറ്റവും വലിയ പ്ലാറ്റ്‌ഫോമായി മാർമി മാറിയിരിക്കുകയാണെന്ന് പങ്കെടുത്തവർ അഭിപ്രായപ്പെട്ടു.

അറബ് പാരമ്പര്യത്തിന്റെ ഭാഗമായ ഫാൽക്കൺ വേട്ട പ്രോത്സാഹിപ്പിക്കുന്നതിനായി സംഘടിപ്പിക്കുന്ന ഈ മേള കാണാൻ സ്വദേശികളും വിദേശികളുമായ നിരവധി ആളുകളാണ് ഖത്തറിലെ മരുഭൂമിയിലേക്ക് എത്തുന്നത്. വരും ദിവസങ്ങളിലും കൂടുതൽ ആവേശകരമായ മത്സരങ്ങൾ നടക്കാനിരിക്കുകയാണ്.