ബഹ്‌റിനിൽ വിശുദ്ധ സെബസ്ത്യാനോസിന്റെ തിരുന്നാൾ ആഘോഷിച്ചു; ഭക്തിസാന്ദ്രമായി ഇസാ ടൗൺ

റഫീഖ് അബ്ബാസ് ബഹ്‌റൈൻ 

ബഹ്‌റിൻ: ബഹ്‌റിനിലെ മലയാളി കത്തോലിക്കാ സമൂഹം വിശുദ്ധ സെബസ്ത്യാനോസിന്റെ തിരുന്നാൾ അതീവ ഭക്തിപുരസ്സരം ആഘോഷിച്ചു. ഡിസംബർ 26 വെള്ളിയാഴ്ച ഇസാ ടൗണിലെ സേക്രഡ് ഹാർട്ട് സ്കൂൾ അങ്കണത്തിൽ വെച്ചായിരുന്നു ആഘോഷങ്ങൾ നടന്നത്.

തിരുക്കർമ്മങ്ങൾ

രാവിലെ 8.30-ന് തിരുന്നാൾ കൊടിയേറ്റത്തോടെ ചടങ്ങുകൾക്ക് തുടക്കമായി. തുടർന്ന് 9 മണി മുതൽ വിശ്വാസികൾക്കായി അമ്പ് എഴുന്നള്ളിച്ചു വെക്കൽ നടന്നു. നൂറുകണക്കിന് വിശ്വാസികൾ ഈ സമയം അമ്പ് തൊഴുത് പ്രാർത്ഥിക്കാനായി എത്തിച്ചേർന്നു.

ആഘോഷമായ കുർബാന

തിരുന്നാളിനോടനുബന്ധിച്ച് നടന്ന ആഘോഷമായ ദിവ്യബലിക്ക് മനാമ തിരുഹൃദയ ദേവാലയം വികാരിയും തീർത്ഥാടന കേന്ദ്രത്തിന്റെ റെക്ടറുമായ റെവ. ഫാ. ഫ്രാൻസിസ് ജോസഫ് പടവുപുരക്കൽ മുഖ്യ കാർമികത്വം വഹിച്ചു. ഔർ ലേഡി ഓഫ് അറേബ്യ കത്തീഡ്രൽ റെക്ടർ ഫാ. സജി തോമസ്, ഫാ. ജോൺ ബ്രിട്ടോ, ഫാ. ജേക്കബ് കല്ലുവിള, ഫാ. അന്തോണി, ഫാ. ഷാർബെൽ, ഫാ. നിക്കോൾസൻ, ഫാ. മാർക്കോസ്, ഫാ. റോഹൻ, ഫാ. ആൽബർട്ട് എന്നിവർ സഹകാർമികത്വം വഹിച്ചു.

വർണ്ണശബളമായ പ്രദക്ഷിണം

നാട്ടിലെ പെരുന്നാൾ സ്മരണകൾ ഉണർത്തുന്ന രീതിയിലുള്ള ഗംഭീരമായ പ്രദക്ഷിണമായിരുന്നു ഇത്തവണത്തെ പ്രത്യേകത. ചെണ്ടമേളം, മുത്തുക്കുടകൾ, വിവിധ വർണ്ണങ്ങളിലുള്ള ഫ്ലാഗുകൾ, ബാനറുകൾ എന്നിവ പ്രദക്ഷിണത്തിന് മിഴിവേകി. ബഹ്‌റിൻ്റെ വിവിധ ഭാഗങ്ങളിൽ നിന്നായി അയ്യായിരത്തിലധികം (5000+) വിശ്വാസികൾ തിരുന്നാൾ ആഘോഷങ്ങളിൽ പങ്കെടുത്തു.

തിരുക്കർമ്മങ്ങൾക്ക് ശേഷം സ്നേഹവിരുന്നിന്റെ ഭാഗമായി നേർച്ച ഭക്ഷണ വിതരണവും നടന്നു. പ്രവാസി മണ്ണിലും കേരളീയ തനിമയോടെ നടത്തിയ ഈ ആഘോഷം വിശ്വാസികൾക്ക് വലിയ ആത്മീയ അനുഭവം പകർന്നു.