കുവൈത്തിലെ പക്ഷി ചന്തയിൽ ഉന്നതതല പരിശോധന; നിയമലംഘകർക്കെതിരെ കർശന നടപടി

കുവൈത്ത് സിറ്റി: രാജ്യത്തെ പക്ഷി ചന്തയിലെ പ്രവർത്തനങ്ങൾ വിലയിരുത്തുന്നതിനും നിയമലംഘനങ്ങൾ തടയുന്നതിനുമായി ഉന്നത ഉദ്യോഗസ്ഥരുടെ നേതൃത്വത്തിൽ മിന്നൽ പരിശോധന നടത്തി. കൃഷി, പരിസ്ഥിതി, വാണിജ്യ മന്ത്രാലയങ്ങളിലെ ഉദ്യോഗസ്ഥർ ഉൾപ്പെട്ട സംഘമാണ് റായ് മേഖലയിലെ പക്ഷി ചന്തയിൽ പരിശോധന നടത്തിയത്.

ശുചിത്വ മാനദണ്ഡങ്ങൾ പാലിക്കുന്നുണ്ടോ എന്നും വിൽപനയ്ക്ക് വെച്ചിരിക്കുന്ന പക്ഷികളുടെയും മൃഗങ്ങളുടെയും ആരോഗ്യസ്ഥിതിയും സംഘം വിലയിരുത്തി. ചില കടകളിൽ നിയമവിരുദ്ധമായി പക്ഷികളെ പാർപ്പിച്ചിരിക്കുന്നതായും ലൈസൻസ് നിബന്ധനകൾ ലംഘിച്ചതായും പരിശോധനയിൽ കണ്ടെത്തി.

ഇത്തരം സ്ഥാപനങ്ങൾക്കെതിരെ പിഴ ചുമത്തുകയും കർശന മുന്നറിയിപ്പ് നൽകുകയും ചെയ്തിട്ടുണ്ട്. വംശനാശഭീഷണി നേരിടുന്ന പക്ഷികളുടെ വിൽപന നടക്കുന്നുണ്ടോ എന്നും ഉദ്യോഗസ്ഥർ നിരീക്ഷിച്ചു. വരും ദിവസങ്ങളിലും പരിശോധന തുടരുമെന്നും പൊതുജനാരോഗ്യവും പരിസ്ഥിതി നിയമങ്ങളും പാലിക്കുന്നുണ്ടെന്ന് ഉറപ്പുവരുത്തുമെന്നും അധികൃതർ വ്യക്തമാക്കി.