അമേരിക്കൻ ഭീഷണിയെത്തുടർന്ന് ഇറാൻ സൈന്യം അതീവ ജാഗ്രതയിൽ; ഗൾഫ് മേഖലയിൽ വീണ്ടും യുദ്ധഭീതി.

വാഷിംഗ്ടൺ/ദുബായ്: ഇറാനിൽ സർക്കാരിനെതിരെയുള്ള പ്രക്ഷോഭങ്ങൾ ശക്തിപ്പെടുന്നതിനിടെ അമേരിക്കൻ പ്രസിഡന്റ് ഡൊണാൾഡ് ട്രംപ് ശക്തമായ സൈനിക ഭീഷണി മുഴക്കിയതോടെ മിഡിൽ ഈസ്റ്റിൽ വീണ്ടും സംഘർഷാവസ്ഥ പുകയുന്നു. ഏത് തരത്തിലുള്ള ആക്രമണത്തെയും പ്രതിരോധിക്കാൻ ഇറാൻ സൈന്യം പൂർണ്ണ സജ്ജമാണെന്നും രാജ്യം 'ഡിഫൻസീവ് റെഡിനസ്സിൻ്റെ' (പ്രതിരോധ സജ്ജത) പരകോടിയിലാണെന്നും ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) വ്യക്തമാക്കി.

ട്രംപിന്റെ ഭീഷണി: ഇറാനിലെ പ്രതിഷേധക്കാർക്ക് നേരെ സർക്കാർ നടത്തുന്ന അടിച്ചമർത്തലുകൾ തുടർന്നാൽ കടുത്ത പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകി. പ്രതിഷേധക്കാർക്ക് സഹായം ഉടൻ എത്തുമെന്ന് പറഞ്ഞ അദ്ദേഹം, വധശിക്ഷകൾ തുടർന്നാൽ ശക്തമായ സൈനിക നടപടി ഉണ്ടാവുമെന്ന സൂചനയും നൽകി.

ഇറാന്റെ മുന്നറിയിപ്പ്: യുഎസ് ആക്രമിച്ചാൽ മിഡിൽ ഈസ്റ്റിലെ അമേരിക്കൻ സൈനിക താവളങ്ങൾ ലക്ഷ്യമിടുമെന്ന് ഇറാൻ അയൽരാജ്യങ്ങളായ സൗദി അറേബ്യ, യുഎഇ, തുർക്കി എന്നിവരെ അറിയിച്ചു. തങ്ങളുടെ വ്യോമസേനയും മിസൈൽ ശേഖരവും ഏത് സാഹചര്യത്തെയും നേരിടാൻ സജ്ജമാണെന്ന് ഐആർജിസി (IRGC) കമാൻഡർ പറഞ്ഞു.

നയതന്ത്ര ബന്ധം തകർന്നു: അമേരിക്കയും ഇറാനും തമ്മിലുള്ള നേരിട്ടുള്ള ചർച്ചകൾ നിലച്ചതായാണ് റിപ്പോർട്ട്. ഖത്തറിലെ അൽ ഉദൈദ് യുഎസ് സൈനിക താവളത്തിൽ നിന്ന് ചില ഉദ്യോഗസ്ഥരോട് ഒഴിഞ്ഞുപോകാാൻ അമേരിക്ക നിർദ്ദേശിച്ചിട്ടുണ്ട്.

കണ്ണീരിലായി ഇറാൻ: രാജ്യത്ത് തുടരുന്ന പ്രക്ഷോഭങ്ങളിൽ ഇതുവരെ രണ്ടായിരത്തിലധികം പേർ കൊല്ലപ്പെട്ടതായാണ് മനുഷ്യാവകാശ സംഘടനകളുടെ കണക്ക്. എന്നാൽ പ്രക്ഷോഭകാരികളെ വധശിക്ഷയ്ക്ക് വിധേയരാക്കാനാണ് ഇറാന്റെ നീക്കം.

യുഎസും ഇറാനും തമ്മിലുള്ള ഈ വാക്പോര് ആഗോള വിപണിയിലും പ്രതിഫലിച്ചു. എണ്ണവിലയിൽ വർദ്ധനവ് രേഖപ്പെടുത്തിയിട്ടുണ്ട്. മേഖലയിലെ സുരക്ഷാ സാഹചര്യം കണക്കിലെടുത്ത് യുഎസ് പൗരന്മാരോട് ഉടൻ ഇറാൻ വിടാൻ സ്റ്റേറ്റ് ഡിപ്പാർട്ട്മെന്റ് ആവശ്യപ്പെട്ടു.

ഗൾഫ് മേഖലയിൽ വീണ്ടും ഒരു യുദ്ധത്തിന്റെ നിഴൽ വീഴുന്നത് പ്രവാസികൾ ഉൾപ്പെടെയുള്ള മലയാളികളെയും ആശങ്കയിലാക്കുന്നുണ്ട്.