|കവിത| ഇരയായവൾ - ഷീന അഭി ചെറുവായിൽ

|കവിത|

ഇരയായവൾ

ഷീന അഭി ചെറുവായിൽ

നിലാവ് 
തല്ലിക്കൊഴിച്ചിട്ടൊരുരാത്രിയിൽ 
ആതുരശുശ്രൂഷാലയത്തിൻ്റെ
വിജനമാം വരാന്തയിൽ കർത്തവ്യനിരതയായവൾ,
വേട്ടയാടപ്പെട്ടൂ, കാമവെറിയന്മാരാൽ;

പിച്ചിച്ചീന്തപ്പെട്ട 
നഗ്നമാംദേഹത്തിൽ,
ദംഷ്ട്രചിഹ്നങ്ങളിൽ നിണംനുരചിന്തും
നാഭിയും നിതംബവും മാറിടങ്ങളും
തനുവിലാകെപ്പുളയും ചാട്ടുളിവേദന. 

ജനൽപാളിയിലൂടെ കണ്ണിമയിൽ ചൂടിടും
അർക്കരശ്മിയാൽ പുളഞ്ഞവൾ ഒന്ന്,
മൂകമായിതേങ്ങീ ഗതകാലത്തിന്നോർമ്മയിൽ,
ഉള്ളുപിടയും മിഴിനീരുപ്പിൻ നനവിനാൽ. 

ഇന്നലെയോളം
 വെള്ളയുടുപ്പിട്ട മാലാഖ, 
ഇന്നോ, ക്രൂരപീഢനത്തിന്നിരയായവൾ.
ജീവന്മരണപോരാട്ടത്തിൽ ബോധമറ്റ്-
അഴലിൻചുഴിയിൽ മയങ്ങീടുന്നു. 

വാർത്താദാരിദ്ര്യംപേറും മാധ്യമകാട്ടാളർ
വിശപ്പടക്കാനുള്ളൊരു ഇരയെന്നപോൽ,
കൂട്ടമായ് കൊത്തിപ്പറിച്ചെടുത്തൂ ,പിന്നെയും 
ബാക്കിയായുള്ളോരാ പാതിജീവനെ...

ഷീന അഭി ചെറുവായിൽ 
കവി തൃശൂർജില്ലയിലെ ചേലക്കരയിൽ താമസിക്കുന്നു. അദ്ധ്യാപികയായി സേവനമനുഷ്ഠിക്കുന്നു. ഭർത്താവ്: അഭിലാഷ് .സി.ബി
മക്കൾ: അൽഹനനുമ,ആലംമെഹ്റൂഫ്, ആറ്റിഫ് ആംറോ