സൗഹൃദത്തിന്റെ പുതിയ അധ്യായം കുറിക്കാൻ പ്രിൻസ് വില്യം റിയാദിൽ; കിരീടാവകാശിയുമായി കൂടിക്കാഴ്ച

റിയാദ്: ബ്രിട്ടന്റെ പ്രിൻസ് ഓഫ് വെയ്ല്സ് പ്രിൻസ് വില്യം ഔദ്യോഗിക സന്ദർശനത്തിനായി സൗദി അറേബ്യയിലെത്തി. 2026-ൽ അദ്ദേഹം നടത്തുന്ന ആദ്യത്തെ പ്രധാന വിദേശ സന്ദർശനമാണിത്. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിൽ എത്തിയ അദ്ദേഹത്തെ റിയാദ് ഡെപ്യൂട്ടി ഗവർണർ പ്രിൻസ് മുഹമ്മദ് ബിൻ അബ്ദുൽറഹ്മാൻ ബിൻ അബ്ദുൽഅസീസ് ഔദ്യോഗികമായി സ്വീകരിച്ചു.

മൂന്ന് ദിവസം നീണ്ടുനിൽക്കുന്ന സന്ദർശനത്തിനിടെ സൗദി ക്രൗൺ പ്രിൻസ് മുഹമ്മദ് ബിൻ സൽമാനുമായി അദ്ദേഹം കൂടിക്കാഴ്ച നടത്തും. ബ്രിട്ടനും സൗദി അറേബ്യയും തമ്മിലുള്ള നയതന്ത്ര, വ്യാപാര ബന്ധങ്ങൾ പുതിയ തലങ്ങളിലേക്ക് എത്തിക്കുക എന്നതാണ് സന്ദർശനത്തിന്റെ പ്രധാന ലക്ഷ്യം. സാമ്പത്തിക സഹകരണത്തിന് പുറമെ സാംസ്കാരികം, പരിസ്ഥിതി, യുവജന വികസനം എന്നീ മേഖലകളിലെ സംയുക്ത പദ്ധതികളെക്കുറിച്ചും ചർച്ചകൾ നടക്കും.

സന്ദർശനത്തിന്റെ ഭാഗമായി സൗദിയിലെ ചരിത്രപ്രധാനമായ അത്-തുരൈഫ്, അൽ-ഉല എന്നീ പൈതൃക കേന്ദ്രങ്ങളും പ്രിൻസ് വില്യം സന്ദർശിക്കും. ഇരുരാജ്യങ്ങളും തമ്മിലുള്ള ദീർഘകാല സൗഹൃദം കൂടുതൽ ദൃഢമാക്കുന്നതിൽ ഈ സന്ദർശനം നിർണ്ണായക പങ്കുവഹിക്കുമെന്നാണ് വിലയിരുത്തപ്പെടുന്നത്.