ചരിത്രമുറങ്ങുന്ന റുസ്താഖ് കോട്ടയിൽ വിസ്മയമൊരുക്കി 'റുസ്താഖ് വിന്റർ ഫെസ്റ്റിവൽ 2026'

റുസ്താഖ്: ഒമാന്റെ പൈതൃകവും സംസ്‌കാരവും വിളിച്ചോതുന്ന റുസ്താഖ് വിന്റർ ഫെസ്റ്റിവലിന് ചരിത്രപ്രസിദ്ധമായ റുസ്താഖ് കോട്ടയിൽ വർണ്ണാഭമായ തുടക്കം. സൗത്ത് അൽ ബാത്തിന ഗവർണറുടെ ഓഫീസും പൈതൃക-വിനോദസഞ്ചാര മന്ത്രാലയവും സംയുക്തമായി സംഘടിപ്പിക്കുന്ന മേള ഫെബ്രുവരി 7 വരെ നീണ്ടുനിൽക്കും.

റുസ്താഖിന്റെ വിനോദസഞ്ചാര സാധ്യതകൾ വർദ്ധിപ്പിക്കുന്നതിനും പ്രാദേശിക സമ്പദ്‌വ്യവസ്ഥയെ ഉത്തേജിപ്പിക്കുന്നതിനുമായാണ് ഈ ശൈത്യകാല മേള സംഘടിപ്പിച്ചിരിക്കുന്നത്. ഞായറാഴ്ച വൈകുന്നേരം ആരംഭിച്ച പരിപാടിയിൽ സ്വദേശികളും വിദേശികളുമായ നിരവധിപ്പേരാണ് പങ്കെടുത്തത്.

കലാസാംസ്‌കാരിക വിരുന്ന്: പരമ്പരാഗത ഒമാനി നാടൻ കലകൾ, നാടകങ്ങൾ, സംഗീത പരിപാടികൾ എന്നിവ കോട്ടയുടെ പശ്ചാത്തലത്തിൽ അരങ്ങേറുന്നു. കുട്ടികൾക്കായി പ്രത്യേക വിനോദ മത്സരങ്ങൾ, കഴിവുകൾ പ്രകടിപ്പിക്കാനുള്ള വേദികൾ, ഇന്ററാക്ടീവ് സെഷനുകൾ എന്നിവ മേളയുടെ ഭാഗമാണ്.

ചെറുകിട സംരംഭകർക്കും ഉൽപ്പാദന കുടുംബങ്ങൾക്കുമായി പ്രത്യേക പ്രദർശന വിപണിയും ഇവിടെ ഒരുക്കിയിട്ടുണ്ട്. പരമ്പരാഗത കരകൗശല വസ്തുക്കളും നാടൻ വിഭവങ്ങളും ഇവിടെ ലഭ്യമാണ്. റുസ്താഖിന്റെ ചരിത്രപരമായ പ്രാധാന്യം വിളിച്ചോതുന്ന സെമിനാറുകളും കവിതാ സായാഹ്നങ്ങളും മേളയുടെ മാറ്റ് കൂട്ടുന്നു.

ചരിത്ര സ്മാരകങ്ങളെ സജീവമായ സാംസ്‌കാരിക കേന്ദ്രങ്ങളാക്കി മാറ്റുക എന്ന ലക്ഷ്യത്തോടെയാണ് ഇത്തരമൊരു മേള സംഘടിപ്പിച്ചിരിക്കുന്നതെന്ന് അധികൃതർ വ്യക്തമാക്കി.