കുവൈറ്റിൽ വാഹനങ്ങൾ കെട്ടിവലിച്ചു കൊണ്ടുപോകുന്നതിന് കർശന നിയന്ത്രണം; പുതിയ സുരക്ഷാ മാനദണ്ഡങ്ങൾ പുറത്തിറക്കി

കുവൈറ്റ് സിറ്റി: റോഡ് സുരക്ഷ വർദ്ധിപ്പിക്കുന്നതിന്റെ ഭാഗമായി വാഹനങ്ങൾ കെട്ടിവലിച്ചു കൊണ്ടുപോകുന്ന (Towing) സംവിധാനങ്ങൾക്ക് പുതിയ മാർഗ്ഗനിർദ്ദേശങ്ങളുമായി കുവൈറ്റ് ട്രാഫിക് വിഭാഗം. വാഹനങ്ങൾ സുരക്ഷിതമായും നിയമപരമായും മാത്രമേ വലിച്ചുകൊണ്ടുപോകാവൂ എന്ന് ജനറൽ ട്രാഫിക് ഡിപ്പാർട്ട്‌മെന്റ് വ്യക്തമാക്കി.

വാഹനങ്ങൾ ടോവിംഗ് ചെയ്യുമ്പോൾ പാലിക്കേണ്ട പ്രധാന നിർദ്ദേശങ്ങൾ താഴെ പറയുന്നവയാണ്:

രജിസ്ട്രേഷൻ നിർബന്ധം: വലിച്ചുകൊണ്ടുപോകാൻ ഉപയോഗിക്കുന്ന വാഹനങ്ങൾക്കും ട്രെയിലറുകൾക്കും കൃത്യമായ രജിസ്ട്രേഷൻ ഉണ്ടായിരിക്കണം.

സുരക്ഷാ സജ്ജീകരണങ്ങൾ: ടോവിംഗ് വാഹനങ്ങളിൽ പ്രത്യേക സൈഡ് മിററുകൾ ഘടിപ്പിച്ചിരിക്കണം. പുറകിൽ വാണിംഗ് ട്രയാംഗിൾ, ലൈറ്റുകൾ, റിഫ്ലക്റ്റീവ് ടേപ്പ് എന്നിവ നിർബന്ധമാണ്.

വലതുവശം ചേർന്നുള്ള യാത്ര: ടോവിംഗ് ചെയ്യുന്ന വാഹനങ്ങൾ റോഡിന്റെ ഏറ്റവും വലതുവശം ചേർന്നു മാത്രമേ യാത്ര ചെയ്യാൻ പാടുള്ളൂ.

യാത്രക്കാർക്ക് വിലക്ക്: ട്രെയിലറുകൾക്ക് ഉള്ളിൽ യാത്രക്കാരെ കയറ്റാൻ പാടില്ല.

ഉപകരണങ്ങളുടെ സുരക്ഷ: ഉപയോഗിക്കുന്ന ടോവിംഗ് ഉപകരണങ്ങൾ സുരക്ഷിതമാണെന്ന് ഉറപ്പുവരുത്തണം. സുരക്ഷാ ചെയിനുകൾ (Safety chains) ഉപയോഗിക്കുകയും ഭാരം കൃത്യമായി വിന്യസിക്കുകയും വേണം. അറ്റകുറ്റപ്പണി കഴിഞ്ഞാലുടൻ ഈ ഉപകരണങ്ങൾ നീക്കം ചെയ്യേണ്ടതുമാണ്.

അതോടൊപ്പം, തലസ്ഥാന ഗവർണറേറ്റിലെയും അഹമ്മദി ഗവർണറേറ്റിലെയും ടാക്സികളുടെ സാങ്കേതിക പരിശോധന (Technical Inspection) ആരംഭിച്ചതായും ട്രാഫിക് വിഭാഗം അറിയിച്ചു. രാവിലെ 7:30 മുതൽ ഉച്ചയ്ക്ക് 2:30 വരെയാണ് ഈ പരിശോധനകൾ നടക്കുക. റോഡുകളിലെ അപകടങ്ങൾ കുറയ്ക്കുന്നതിനും സുരക്ഷ ഉറപ്പാക്കുന്നതിനുമാണ് ഈ നടപടികളെന്ന് അധികൃതർ വ്യക്തമാക്കി.

കടപ്പാട്: അറബ് ടൈംസ് ഓൺലൈൻ