ഒമാനിൽ വിനോദസഞ്ചാര ബോട്ട് മറിഞ്ഞ് അപകടം; മൂന്ന് ഫ്രഞ്ച് പൗരന്മാർ മരിച്ചു

മസ്‌കറ്റ്: ഒമാനിലെ തീരക്കടലിൽ വിനോദസഞ്ചാരികൾ സഞ്ചരിച്ചിരുന്ന ബോട്ട് മറിഞ്ഞ് മൂന്ന് വിദേശികൾ മരിച്ചു. മസ്‌കറ്റ് ഗവർണറേറ്റിലെ മത്ര തീരത്തിന് സമീപമാണ് അപകടമുണ്ടായത്. മരിച്ച മൂന്ന് പേരും ഫ്രഞ്ച് പൗരന്മാരാണെന്ന് ഒമാൻ അധികൃതർ സ്ഥിരീകരിച്ചു.

25 വിനോദസഞ്ചാരികളുമായി സഞ്ചരിക്കുകയായിരുന്ന ബോട്ടാണ് അപകടത്തിൽപ്പെട്ടത്. അപകടത്തെക്കുറിച്ച് വിവരം ലഭിച്ച ഉടൻ തന്നെ സിവിൽ ഡിഫൻസ് ആൻഡ് ആംബുലൻസ് അതോറിറ്റി (CDAA) സ്ഥലത്തെത്തി വലിയ തോതിലുള്ള രക്ഷാപ്രവർത്തനം നടത്തിയിരുന്നു. ബോട്ടിലുണ്ടായിരുന്ന ബാക്കി 22 പേരെയും അധികൃതർ സുരക്ഷിതമായി കരയ്‌ക്കെത്തിച്ചു. രക്ഷപ്പെടുത്തിയവരിൽ ചിലർക്ക് പരിക്കേറ്റിട്ടുണ്ട്. ഇവരെ പ്രാഥമിക ശുശ്രൂഷകൾക്കായി അടുത്തുള്ള ആശുപത്രിയിലേക്ക് മാറ്റി.

കടലിലെ കാലാവസ്ഥയിലുണ്ടായ മാറ്റമാണോ അതോ സാങ്കേതിക തകരാറാണോ അപകടത്തിന് കാരണമായതെന്ന് വ്യക്തമല്ല. റോയൽ ഒമാൻ പോലീസ് സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്. വിനോദസഞ്ചാര ബോട്ടുകൾ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തണമെന്ന് അധികൃതർ നിർദ്ദേശം നൽകി.

ടൈംസ് ഓഫ് ഒമാൻ (Times of Oman)