കാനഡയുമായുള്ള പുതിയ പാലം തടയുമെന്ന് ട്രംപിന്റെ ഭീഷണി; രൂക്ഷമായി പ്രതികരിച്ച് കനേഡിയൻ നേതാക്കൾ

ഒട്ടാവ: അമേരിക്കയെയും കാനഡയെയും തമ്മിൽ ബന്ധിപ്പിക്കുന്ന പുതിയ അന്താരാഷ്ട്ര പാലത്തിന്റെ നിർമ്മാണം പൂർത്തിയാകാനിരിക്കെ, അതിന്റെ ഉദ്ഘാടനം തടയുമെന്ന ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. നിർമ്മാണം അവസാന ഘട്ടത്തിലെത്തിയ 'ഗോർഡി ഹോവ് ഇന്റർനാഷണൽ ബ്രിഡ്ജിന്റെ' (Gordie Howe International Bridge) കാര്യത്തിലാണ് ട്രംപിന്റെ അപ്രതീക്ഷിത ഇടപെടൽ. കാനഡ അമേരിക്കയോട് 'നീതിരഹിതമായാണ്' പെരുമാറുന്നതെന്ന് ട്രംപ് കുറ്റപ്പെടുത്തി. ഈ പാലത്തിന്റെ പകുതി ഉടമസ്ഥാവകാശം അമേരിക്കയ്ക്ക് വേണമെന്നാണ് ട്രംപിന്റെ ആവശ്യം.

പാലത്തിന്റെ നിർമ്മാണത്തിന് അമേരിക്കൻ ഉൽപ്പന്നങ്ങൾ ഉപയോഗിച്ചിട്ടില്ലെന്നും അതിനാൽ അമേരിക്കയ്ക്ക് മതിയായ നഷ്ടപരിഹാരം ലഭിക്കാതെ പാലം തുറക്കാൻ അനുവദിക്കില്ലെന്നും അദ്ദേഹം സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിൽ' കുറിച്ചു. 

ട്രംപിന്റെ പ്രസ്താവന വിശ്വസിക്കാനാവില്ലെന്നും ഇത് ഇരുരാജ്യങ്ങളുടെയും താൽപ്പര്യങ്ങൾക്ക് വിരുദ്ധമാണെന്നും വിൻഡ്‌സർ മേയർ ഡ്രൂ ഡിൽകെൻസ് പറഞ്ഞു. പാലത്തിന്റെ അമേരിക്കൻ ഭാഗത്ത് അമേരിക്കൻ സ്റ്റീൽ തന്നെയാണ് ഉപയോഗിച്ചിട്ടുള്ളതെന്ന് അദ്ദേഹം വ്യക്തമാക്കി. ഏകദേശം 6.4 ബില്യൺ കനേഡിയൻ ഡോളർ (ഏകദേശം 4.7 ബില്യൺ യുഎസ് ഡോളർ) ചിലവിൽ കാനഡ ഗവൺമെന്റാണ് ഈ പദ്ധതിക്ക് പൂർണ്ണമായും ഫണ്ട് നൽകുന്നത്. ഭാവിയിൽ പാലത്തിൽ നിന്നുള്ള ടോൾ വരുമാനത്തിലൂടെ ഈ തുക തിരിച്ചുപിടിക്കാനാണ് കാനഡ പദ്ധതിയിടുന്നത്.

വ്യാപാര പാതകൾ തടസ്സപ്പെടുത്തുന്നത് ഇരുരാജ്യങ്ങളുടെയും സമ്പദ്‌വ്യവസ്ഥയ്ക്ക് തിരിച്ചടിയാകുമെന്ന് കനേഡിയൻ ചേംബർ ഓഫ് കൊമേഴ്‌സ് മുന്നറിയിപ്പ് നൽകി. പാലത്തിന്റെ പ്രാധാന്യം: കാനഡയിലെ വിൻഡ്‌സറിനെയും അമേരിക്കയിലെ ഡെട്രോയിറ്റിനെയും തമ്മിൽ ബന്ധിപ്പിക്കുന്ന ഈ പാലം വടക്കേ അമേരിക്കയിലെ ഏറ്റവും തിരക്കേറിയ വ്യാപാര പാതകളിലൊന്നാണ്. ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരത്തിന്റെ 25 ശതമാനവും നടക്കുന്നത് ഈ പാതയിലൂടെയാണ്. ഓട്ടോമൊബൈൽ വ്യവസായത്തിന് ഈ പാലം ഏറെ നിർണ്ണായകമാണ്.

നേരത്തെ തന്റെ ആദ്യ ഭരണകാലത്ത് ഈ പാലത്തെ ഇരുരാജ്യങ്ങളും തമ്മിലുള്ള 'സുപ്രധാന സാമ്പത്തിക ലിങ്ക്' എന്ന് വിശേഷിപ്പിച്ച ട്രംപിന്റെ ഇപ്പോഴത്തെ നിലപാട് മാറ്റം നയതന്ത്ര ലോകത്തെ അത്ഭുതപ്പെടുത്തിയിരിക്കുകയാണ്. പാലം സംബന്ധിച്ച ചർച്ചകൾ ഉടൻ ആരംഭിക്കുമെന്നും ട്രംപ് വ്യക്തമാക്കിയിട്ടുണ്ട്.