കുവൈറ്റ് ആകാശത്ത് യുഎസ് എഫ്-15 യുദ്ധവിമാനങ്ങൾ വെടിവെച്ചിട്ടു; കുവൈറ്റ് എയർ ഡിഫൻസിന്റെ 'ഫ്രണ്ട്ലി ഫയർ' തെറ്റിദ്ധാരണ മൂലം

കുവൈറ്റ്: ഗൾഫ് മേഖലയിലെ യുദ്ധം കൂടുതൽ സങ്കീർണമാകുന്നു. ഇറാന്റെ മിസൈൽ-ഡ്രോൺ ആക്രമണങ്ങൾക്കിടെ കുവൈറ്റിന്റെ എയർ ഡിഫൻസ് സിസ്റ്റം തെറ്റിദ്ധരിച്ച് മൂന്ന് അമേരിക്കൻ എഫ്-15ഇ സ്ട്രൈക്ക് ഈഗിൾ യുദ്ധവിമാനങ്ങളെ വെടിവെച്ചിട്ടു. കുവൈറ്റ് ആകാശത്ത് വച്ച് തീപിടിച്ച് വീണ വിമാനങ്ങളിലെ ആറ് പൈലറ്റുമാർ പാരഷൂട്ട് ഉപയോഗിച്ച് സുരക്ഷിതമായി രക്ഷപ്പെട്ടു.

യുഎസ് സെൻട്രൽ കമാൻഡ് (CENTCOM) ഔദ്യോഗികമായി സ്ഥിരീകരിച്ചത് ഇങ്ങനെ: മാർച്ച് 1-ന് രാത്രി 11:03 (യുഎസ് സമയം) 'ഒപ്പറേഷൻ എപിക് ഫ്യൂറി'യുടെ ഭാഗമായി പറന്നിരുന്ന മൂന്ന് എഫ്-15ഇ വിമാനങ്ങൾ ഇറാനിയൻ ആക്രമണങ്ങൾക്കിടെ കുവൈറ്റ് എയർ ഡിഫൻസിന്റെ 'ഫ്രണ്ട്ലി ഫയർ' ആയി വെടിവെച്ചിട്ടു. ഇറാനിയൻ വിമാനങ്ങൾ, ബാലിസ്റ്റിക് മിസൈലുകൾ, ഡ്രോണുകൾ എന്നിവയുടെ ആക്രമണത്തിനിടെയുണ്ടായ തെറ്റിദ്ധാരണയാണിത്. ആറ് ജീവനക്കാരും സുരക്ഷിതമായി റിക്കവർ ചെയ്യപ്പെട്ടു, അവരുടെ ആരോഗ്യസ്ഥിതി മെച്ചപ്പെട്ടു വരുന്നതായും CENTCOM വ്യക്തമാക്കി.

രാത്രി മുഴുവൻ കുവൈറ്റ് നഗരത്തിൽ സൈറൺ മുഴങ്ങി. സോഷ്യൽ മീഡിയയിൽ വ്യാപകമായി പ്രചരിച്ച ദൃശ്യങ്ങളിൽ ആകാശത്ത് തീപിടിച്ച് കറുത്ത പുകയോടെ താഴേക്ക് വീഴുന്ന വിമാനവും പൈലറ്റുമാർ പാരഷൂട്ടിൽ ഇറങ്ങുന്നതും വ്യക്തമായി കാണാം. ഈ സംഭവം ഇറാൻ-യുഎസ്-ഇസ്രായേൽ സംഘർഷം ഗൾഫ് രാജ്യങ്ങളിലേക്ക് വ്യാപിക്കുന്നതിന്റെ ഏറ്റവും പുതിയ ഉദാഹരണമാണ്.

കുവൈറ്റ് ദേശീയ പ്രതിരോധ വൃത്തങ്ങൾ സംഭവത്തെ 'തെറ്റിദ്ധാരണ'യായി വിശേഷിപ്പിച്ചു. “ഇറാനിയൻ ആക്രമണത്തിനെതിരെ ഞങ്ങൾ ജാഗ്രതയോടെ പ്രതിരോധം തീർത്തു. സഖ്യകക്ഷികളായ യുഎസ് വിമാനങ്ങളുമായുള്ള ഏകോപനത്തിൽ ചില പോരായ്മകൾ ഉണ്ടായി” എന്നാണ് ഔദ്യോഗിക വിശദീകരണം. യുഎസ് വിമാനങ്ങൾ ഇറാനിയൻ ആക്രമണങ്ങളെ തടയാൻ സഹായിക്കുന്നതിനിടെയാണ് ഈ അപകടം സംഭവിച്ചത്.

ഗൾഫ് മേഖലയിലെ പ്രവാസികൾ ഉൾപ്പെടെ ലക്ഷക്കണക്കിന് ആളുകൾ ഓരോ നീക്കവും സസൂക്ഷ്മം വീക്ഷിക്കുകയാണ്,. സൗദി അറേബ്യയിലെ വലിയ റിഫൈനറിയും മറ്റ് സ്ഥലങ്ങളും ഇറാനിയൻ ഡ്രോണുകൾ ആക്രമിച്ചതിന്റെ ഫലമായി തീപിടുത്തങ്ങൾ ഉണ്ടായി. ഒമാൻ, സൗദി അറേബ്യ തുടങ്ങിയ രാജ്യങ്ങൾ നയതന്ത്ര ശ്രമങ്ങൾ തീവ്രമാക്കിയിട്ടുണ്ടെങ്കിലും സംഘർഷം അവസാനിക്കുന്ന ലക്ഷണമില്ല.

റിപ്പോർട്ട് - ജിതേഷ്  
കടപ്പാട്: CENTCOM, Reuters, The Guardian, CNN