തായ്വാനെ ലക്ഷ്യമിട്ട് ചൈനീസ് ആണവ ബോംബറുകള്‍

തായ്പേയ്: യുഎസ് പ്രസിഡന്റ് ഡോണള്‍ഡ് ട്രംപും ചൈനീസ് പ്രസിഡന്റ് ഷി ജിന്‍പിങും തമ്മിലുള്ള കൂടിക്കാഴ്ച അടുത്തിരിക്കെ, ചൈന തായ്വാനു സമീപം എച്ച്-6കെ  സ്ട്രാറ്റജിക് ബോംബറുകള്‍ ഉപയോഗിച്ച് ഏറ്റുമുട്ടല്‍ പരിശീലനങ്ങള്‍ നടത്തിയതായി ചൈനീസ് സര്‍ക്കാര്‍ മാധ്യമങ്ങള്‍ റിപ്പോര്‍ട്ട് ചെയ്തു. 

തായ്വാനെ ലക്ഷ്യമിട്ടുള്ള ഈ സൈനിക നീക്കം മേഖലയില്‍ വീണ്ടും സംഘര്‍ഷം വര്‍ദ്ധിപ്പിച്ചു. ''ഒന്നിലധികം എച്ച്-6കെ ബോംബറുകള്‍ തായ്വാന് ചുറ്റുമുള്ള സമുദ്രമേഖലയിലും വ്യോമാതിര്‍ത്തിയിലും എത്തി സിമുലേറ്റഡ് ഏറ്റുമുട്ടല്‍ പരിശീലനങ്ങള്‍ നടത്തിയെന്ന് റിപ്പോര്‍ട്ടില്‍ പറയുന്നു. കൂടാതെ, നിരവധി ജെ-10  യുദ്ധവിമാനങ്ങള്‍ പോരാട്ട രൂപീകരണത്തില്‍ പറന്നു എന്നും റിപ്പോര്‍ട്ടിലുണ്ട്.

ആണവായുധങ്ങള്‍ വഹിക്കാന്‍ ശേഷിയുള്ള ബോംബറുകളാണ് എച്ച്-6കെ. തീയതി വ്യക്തമാക്കാതെയാണ് റിപ്പോര്‍ട്ട് പുറത്തുവിട്ടതെങ്കിലും, തായ്വാന്റെ പ്രവര്‍ത്തനങ്ങള്‍ക്ക് ഉത്തരവാദികളായ ചൈനീസ് സൈന്യത്തിന്റെ ഈസ്റ്റേണ്‍ തിയേറ്റര്‍ കമാന്‍ഡ് എയര്‍ഫോഴ്‌സ് യൂണിറ്റുകളാണ് ഈ പരിശീലനം നടത്തിയത്. രഹസ്യാന്വേഷണം, മുന്‍കൂര്‍ മുന്നറിയിപ്പുകള്‍, വ്യോമ ഉപരോധങ്ങള്‍, പ്രധാന മേഖലകളിലെ കൃത്യമായ ആക്രമണങ്ങള്‍ എന്നിവ കേന്ദ്രീകരിച്ചായിരുന്നു പരിശീലനം.

ജെ-10 യുദ്ധവിമാനങ്ങള്‍ പറന്നുയരുന്നതിന്റെയും എച്ച്-6 ബോംബറുകള്‍ മിസൈലുകള്‍ പുറത്തുവിടുന്നതിന്റെയും ദൃശ്യങ്ങള്‍ ചൈനീസ് സ്റ്റേറ്റ് ടെലിവിഷന്റെ സൈനിക ചാനല്‍ സംപ്രേക്ഷണം ചെയ്തു. ഒരു ചൈനീസ് സൈനികന്‍ തായ്വാന്റെ തീരരേഖ ആകാശത്ത് നിന്ന് വ്യക്തമായി കാണാം എന്ന് പറയുന്നതും റിപ്പോര്‍ട്ടിലുണ്ടായിരുന്നു.

തായ്വാന്റെ വ്യോമാതിര്‍ത്തിക്ക് ചുറ്റുമുള്ള ചൈനീസ് സൈനിക പ്രവര്‍ത്തനങ്ങളെക്കുറിച്ച് തായ്വാന്‍ പ്രതിരോധ മന്ത്രാലയം ദിവസേന വിവരങ്ങള്‍ പുറത്തുവിടാറുണ്ട്. തിങ്കളാഴ്ച രാവിലെ, നാല് ചൈനീസ് വിമാനങ്ങള്‍ കണ്ടെത്തിയതായി മന്ത്രാലയം അറിയിച്ചു, എന്നാല്‍ അസ്വാഭാവികമായതൊന്നും സംഭവിച്ചില്ലെന്ന് കൂട്ടിച്ചേര്‍ത്തു.