അഹമ്മദാബാദ് വിമാനാപകടം: കിംഗ് ചാള്‍സിന്റെ ജന്മദിന പരേഡില്‍ കറുത്ത ബാന്‍ഡ് ധരിക്കും

ലണ്ടന്‍ : ഗുജറാത്തിലെ അഹമ്മദാബാദില്‍ ഉണ്ടായ ദാരുണമായ എയര്‍ ഇന്ത്യ വിമാനാപകടത്തില്‍ മരിച്ചവരോടുള്ള ആദരസൂചകമായി ശനിയാഴ്ച നടക്കുന്ന 'ദി കളര്‍ പരേഡില്‍' ബ്രിട്ടീഷ് രാജകുടുംബം കറുത്ത ബാന്‍ഡ് ധരിച്ച് ഒരു മിനിറ്റ് മൗനം ആചരിക്കും.അഹമ്മദാബാദ് വിമാനത്താവളത്തില്‍ നിന്ന് പറന്നുയര്‍ന്ന ഉടന്‍ വ്യാഴാഴ്ച ഉച്ചയ്ക്ക് ലണ്ടനിലേക്ക് പോയ ബോയിംഗ് 787-8 ഡ്രീംലൈനര്‍ വിമാനത്തില്‍ കുറഞ്ഞത് 169 ഇന്ത്യക്കാരും 53 ബ്രിട്ടീഷ് പൗരന്മാരും യാത്ര ചെയ്തിരുന്നു. ഈ ദാരുണമായ അപകടത്തില്‍ കുറഞ്ഞത് 241 പേരുടെ ജീവന്‍ നഷ്ടപ്പെട്ടിരുന്നു.ചാള്‍സ് രാജാവിന്റെ ജന്മദിനത്തോടനുബന്ധിച്ച് 1,350-ലധികം സൈനികര്‍ പങ്കെടുക്കുന്നതാണ് വാര്‍ഷിക പരേഡ്. കൊട്ടാരം നേരത്തെ പുറത്തിറക്കിയ പ്രസ്താവനയില്ഡ ചാള്‍സ് രാജാവ് തന്റെ അനുശോചനം രേഖപ്പെടുത്തിയിരുന്നു.

അഹമ്മദാബാദ് വിമാനത്താവളത്തില്‍ നിന്ന് ലണ്ടനിലേക്ക് പോകുകയായിരുന്ന എയര്‍ ഇന്ത്യ വിമാനം തകര്‍ന്നുവീണതില്‍ ബ്രിട്ടീഷ് പ്രധാനമന്ത്രി കെയര്‍ സ്റ്റാര്‍മര്‍ ഉള്‍പ്പെടെ നിരവധി ആഗോള നേതാക്കള്‍ ഞെട്ടലും ദുഃഖവും പ്രകടിപ്പിച്ചിരുന്നു.'രാജ്യത്തിനകത്തും പുറത്തുമുള്ള നിരവധി ബ്രിട്ടീഷ്, ഇന്ത്യന്‍ കുടുംബങ്ങള്‍ക്ക് ഇന്ന് ശരിക്കും ഹൃദയഭേദകമായ ദിവസമാണ്. ഭയാനകമായ വിമാനാപകടത്തില്‍ ആഘാതമേറ്റ എല്ലാവരോടും എന്റെ ഹൃദയംഗമമായ അനുശോചനം അറിയിക്കുന്നു,' അപകടത്തെത്തുടര്‍ന്ന് സ്റ്റാര്‍മര്‍ എക്സില്‍ പോസ്റ്റ് ചെയ്തിരുന്നു.കൂടാതെ, അപകടത്തെത്തുടര്‍ന്ന് ഇന്ത്യന്‍ അധികാരികള്‍ നടത്തുന്ന അന്വേഷണത്തില്‍ യുണൈറ്റഡ് കിംഗ്ഡത്തിന്റെ വ്യോമയാന അന്വേഷണ ബ്രാഞ്ചും  യുണൈറ്റഡ് സ്റ്റേറ്റ്‌സിന്റെ ഫെഡറല്‍ ഏവിയേഷന്‍ ഏജന്‍സിയും സഹായം വാഗ്ദാനം ചെയ്തിട്ടുണ്ട്.