ബംഗ്ലാദേശിൽ മുൻ പ്രധാനമന്ത്രി ഷെയ്ഖ് ഹസീനയുടെ പാർട്ടിയായ അവാമി ലീഗിനെ നിരോധിച്ച് സർക്കാർ

ബംഗ്ലാദേശിൽ മുൻ പ്രധാനമന്ത്രി ഷെയ്ഖ് ഹസീനയുടെ പാർട്ടിയായ അവാമി ലീഗിനെ നിരോധിച്ച് സർക്കാർ. ബംഗ്ലാദേശിൽ ഭരണം നടത്തുന്ന മുഹമ്മദ് യുനൂസിന്റെ നേതൃത്വത്തിലുള്ള ഇടക്കാല സർക്കാരാണ് നിരോധനം ഏർപ്പെടുത്തിയത്. ഭീകര വിരുദ്ധ നിയമ പ്രകാരമാണ് അവാമി ലീഗിനുമേൽ നിരോധനം ഏർപ്പെടുത്തിയത്. നിരോധനം സംബന്ധിച്ച ഗസറ്റ് വിജ്ഞാപനം അടുത്ത പ്രവർത്തി ദിവസം പുറപ്പെടുവിക്കുമെന്ന് പ്രധാനമന്ത്രിയുടെ ഓഫീസിൽ അറിയിച്ചു. ബംഗ്ലാദേശിലെ അന്താരാഷ്ട്ര കുറ്റകൃത്യ ട്രിബ്യുണലിൽ അവാമി ലീഗിന്റെ വിചാരണ നടക്കുകയാണ്. അത് പൂർത്തിയാകുന്നത് വരെ നിരോധനം തുടരുമെന്നാണ് പ്രധാനമന്ത്രിയുടെ ഓഫീസ് അറിയിച്ചത്. രാജ്യത്തിന്റെ പരമാധികാരവും സുരക്ഷയും സംരക്ഷിക്കുക എന്ന ലക്ഷ്യത്തോടെയാണ് ഈ നിരോധനമെന്നാണ് അവർ വ്യക്തമാക്കുന്നത്.

2024 ൽ ബംഗ്ലാദേശിൽ നടന്ന ജനകീയ പ്രക്ഷോഭത്തിൽ അവാമി ലീഗിന് നേരെയുള്ള ജനരോക്ഷം ആളിപ്പടരുകയും സമ്മർദ്ദങ്ങളുടെ ഫലമായി അവാമി ലീഗിന്റെ ഭരണം നിലം പതിക്കുകയും ചെയ്തു. അന്ന് ഭരണകൂടത്തിനെതിരായ പ്രക്ഷോഭത്തിൽ പങ്കെടുത്തവർ, അതിന് പിന്തുണ നൽകിയവർ, പരാതി നൽകിയവർ എന്നിവരുടെ സുരക്ഷക്കാണ് നിലവിലെ ഇടക്കാല സർക്കാർ പ്രാധാന്യം നൽകുന്നത്. ഇപ്പോഴത്തെ പ്രധാനമന്ത്രി യൂനസിന്റെ അധ്യക്ഷതയിൽ ചേർന്ന യോഗത്തിൽ രാഷ്ട്രീയ പാർട്ടികളെയും അവയുടെ മുന്നണി സംഘടനകളെയും അനുബന്ധ സ്ഥാപനങ്ങളെയും പ്രോസിക്യൂട്ട് ചെയ്യാൻ ട്രിബ്യുണലിന് അധികാരം നൽകുന്ന നിയമത്തിൽ ഭേദഗതി നൽകി.

1949 ലാണ് നവാമി ലീഗ് സ്ഥാപിതമായത്. കിഴക്കൻ പാക്കിസ്ഥാനിലെ സ്വയം ഭരണ പ്രസ്ഥാനത്തിൽ നിർണ്ണായക പങ്ക് വഹിച്ചിരുന്നു. 1971 ൽ ബംഗ്ലാദേശ് വിമോചന യുദ്ധത്തിന് നേതൃത്വം നൽകിയതും അവാമി ലീഗാണ്.