നൈജീരിയയില്‍ വാഹനാപകടം: 22 അത്ലറ്റുകള്‍ കൊല്ലപ്പെട്ടു

അബൂജ: നൈജീരിയയില്‍ ഉണ്ടായ ബസ് അപകടത്തില്‍, ദേശീയ കായിക ടൂര്‍ണമെന്റില്‍ പങ്കെടുത്ത് മടങ്ങുകയായിരുന്ന 22 അത്ലറ്റുകള്‍ മരിച്ചു. ഡ്രൈവര്‍ ക്ഷീണത്തിലായിരുന്നതോ അമിത വേഗതയോ ആകാം അപകടത്തിന് കാരണമെന്ന് അധികൃതര്‍ അറിയിച്ചു. മറ്റൊരു വാഹനവും ഉള്‍പ്പെടാത്ത ഈ അപകടം ശനിയാഴ്ച ഉച്ചകഴിഞ്ഞാണ് സംഭവിച്ചത്.

രാത്രിയിലെ നീണ്ട യാത്രയ്ക്ക് ശേഷമുള്ള ''ക്ഷീണവും അമിത വേഗതയും കാരണം സംഭവിച്ചതാകാം'' എന്ന് ഫെഡറല്‍ റോഡ് സേഫ്റ്റി കോര്‍പ്‌സ് വ്യക്തമാക്കി. നൈജീരിയയുടെ വടക്കന്‍ ഭാഗത്തുള്ള കാനോയിലേക്ക് മടങ്ങുകയായിരുന്ന അത്ലറ്റുകള്‍, തെക്ക് ഒഗുന്‍ സംസ്ഥാനത്ത് നടന്ന 22-ാമത് ദേശീയ കായികമേളയില്‍ പങ്കെടുത്തവരായിരുന്നു.