/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/10/14/eco-2025-10-14-08-48-07.jpg)
സ്റ്റോക്ക്‌ഹോം: 2025 ലെ സാമ്പത്തിക നൊബേല്‍ പുരസ്‌കാരം പ്രഖ്യാപിച്ചു. ജോയല്‍ മോക്കര്‍, ഫിലിപ്പ് ആഗിയോണ്‍, പീറ്റര്‍ ഹൊവിറ്റ് എന്നിവര്‍ക്കാണ് പുരസ്‌കാരം. നവീകരണത്തില്‍ അധിഷ്ഠിതമായ സാമ്പത്തിക വളര്‍ച്ചയെ കുറിച്ചുള്ള പഠനത്തിനാണ് പുരസ്‌കാരമെന്ന് നോര്‍വീജിയന്‍ നൊബേല്‍ കമ്മിറ്റി പ്രഖ്യാപിച്ചു.
സാങ്കേതിക പുരോഗതിയിലൂടെ സുസ്ഥിര വളര്‍ച്ചയ്ക്കുള്ള മുന്‍വ്യവസ്ഥകള്‍ തിരിച്ചറിഞ്ഞതിനാണ് സാമ്പത്തിക ചരിത്രകാരനായ ജോയല്‍ മോക്കറിന് അംഗീകാരം. ക്രിയേറ്റീവ് ഡിസ്ട്രക്ഷനിലൂടെയുള്ള സുസ്ഥിര വളര്‍ച്ചയുടെ സിദ്ധാന്തത്തിനാണ് ഫിലിപ്പ് ആഗിയോണിനും പീറ്റര്‍ ഹൊവിറ്റിനും പുരസ്‌കാരം.
സമാധാനത്തിനുള്ള നൊബേല്‍ പുരസ്‌കാരം കഴിഞ്ഞ ദിവസം പ്രഖ്യാപിച്ചിരുന്നു. വെനസ്വേല പ്രതിപക്ഷ നേതാവ് മരിയ കൊറീന മചാഡോയ്ക്ക് പുരസ്‌കാരം. വെനിസ്വേലയിലെ ജനങ്ങളുടെ ജനാധിപത്യ അവകാശങ്ങള്‍ പ്രോത്സാഹിപ്പിക്കുന്നതിനും, സ്വേച്ഛാധിപത്യത്തില്‍ നിന്ന് ജനാധിപത്യത്തിലേക്കുള്ള നീതിയുക്തമായ മാറ്റത്തിനുള്ള പോരാട്ടത്തിനുമാണ് മരിയ കൊറിന മചാഡോയ്ക്ക് അംഗീകാരം.
സാഹിത്യ, രസതന്ത്ര, ഭൗതികശാസ്ത്ര, വൈദ്യശാസ്ത്ര നൊബേല്‍ പുരസ്‌കാരങ്ങളും കഴിഞ്ഞ ദിവസങ്ങളിലായി പ്രഖ്യാപിച്ചിരുന്നു. ഹംഗേറിയന്‍ നോവലിസ്റ്റും തിരക്കഥാകൃത്തുമായ ലാസ്ലോ ക്രാസ്നഹോര്‍കയ്ക്കാണ് പുരസ്‌കാരം സാഹിത്യത്തിനുള്ള നൊബേല്‍ ലഭിച്ചത്. അപ്പോക്കലിപ്റ്റിക് ഭീകരതയുടെ നടുവില്‍, കലയുടെ ശക്തിയെ ഊട്ടിയുറപ്പിക്കുന്ന അദ്ദേഹത്തിന്റെ ശ്രദ്ധേയവും ദര്‍ശനാത്മകവുമായ പ്രവര്‍ത്തനത്തിനാണ് അംഗീകാരം.
സുസുമു കിറ്റഗാവ, റിച്ചാര്‍ഡ് റോബ്‌സണ്‍, ഒമര്‍ എം. യാഗി എന്നിവരാണ് രസതന്ത്രത്തിനുള്ള നൊബേല്‍ പുരസ്‌കാരത്തിന് അര്‍ഹരായത്. മെറ്റല്‍-ഓര്‍ഗാനിക് ഫ്രെയിം വര്‍ക്കുകളുടെ വികസനത്തിന് തുടക്കമിട്ടതിനാണ് അംഗീകാരം. ജോണ്‍ ക്ലാര്‍ക്ക്, മൈക്കല്‍ എച്ച് ഡെവോറെറ്റ്, ജോണ്‍ എം. മാര്‍ട്ടിനിസ് എന്നിവര്‍ക്കാണ് ഈ വര്‍ഷത്തെ ഭൗതികശാസ്ത്രത്തിനുള്ള നൊബേല്‍ ലഭിച്ചത്. വൈദ്യശാസ്ത്രത്തിനുള്ള നൊബേല്‍ അമേരിക്കന്‍ ശാസ്ത്രജ്ഞരായ മേരി ഇ ബ്രന്‍കോവ്, ഫ്രെഡ് റാംസ്ഡെല്‍, ജപ്പാനിലെ ഒസാക സര്‍വകലാശാലയിലെ ഷിമോണ്‍ സകാഗുച്ചി എന്നിവര്‍ക്കാണ് ലഭിച്ചത്.
ആല്‍ഫ്രഡ് നോബലിന്റെ ചരമവാര്‍ഷികത്തോടനുബന്ധിച്ച് ഡിസംബര്‍ 10 ന് സ്റ്റോക്ക്‌ഹോമില്‍ നടക്കുന്ന ചടങ്ങില്‍ സ്വീഡിഷ് രാജാവ് നൊബേല്‍ ജേതാക്കള്‍ക്ക് മെഡലുകള്‍ സമ്മാനിക്കും. 11 ദശലക്ഷം സ്വീഡിഷ് ക്രോണ്‍ (ഏകദേശം $1.2 ദശലക്ഷം ഡോളര്‍) ആണ് സമ്മാനത്തുക.