ഗൂഗിളിന് 100 കോടി രൂപ പിഴ

ഗൂഗിള്‍ പ്ലേ ബില്ലിംഗ് വഴി 30 ശതമാനം അധികം തുക ഗൂഗിള്‍ ഈടാക്കി എന്നും അന്വേഷണ സംഘം പറയുന്നു. ഇന്തോനേഷ്യയില്‍ 93 ശതമാനം മാര്‍ക്കറ്റ് ഷെയറും കയ്യാളുന്ന ഡിജിറ്റല്‍ കമ്പനിയാണ് ഗൂഗിള്‍.

author-image
Prana
New Update
google chrome

ഗൂഗിളിന് 100 കോടി രൂപ പിഴ ചുമത്തി ഇന്തോനേഷ്യ. നിയമവിരുദ്ധമായ വിപണി തന്ത്രങ്ങള്‍ ആരോപിച്ചാണ് ഇന്തോനേഷ്യയിലെ ആന്റിട്രസ്റ്റ് ഏജന്‍സിയുടെ നടപടി.ഗൂഗിള്‍ 12.4 ദശലക്ഷം ഡോളര്‍ പിഴയൊടുക്കണം എന്നാണ് ഇന്തോനേഷ്യയിലെ ആന്റിട്രസ്റ്റ് ഏജന്‍സി വ്യക്തമാക്കിയതെന്ന് രാജ്യാന്തര വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. ഗൂഗിളിന്റെ ആപ്ലിക്കേഷന്‍ വിതരണ പ്ലാറ്റ്‌ഫോമായ ഗൂഗിള്‍ പ്ലേ സ്റ്റോറിലെ പേയ്‌മെന്റ് സംവിധാനത്തില്‍ ഗൂഗിള്‍ നിയമവിരുദ്ധ പ്രവര്‍ത്തനം നടത്തിയെന്നാണ് ഏജന്‍സി കണ്ടെത്തിയത്. വിപണിയിലുള്ള തങ്ങളുടെ മേധാവിത്വം മറയാക്കി മറ്റ് പേയ്‌മെന്റ് സംവിധാനങ്ങളെ അപേക്ഷിച്ച് ഉയര്‍ന്ന നിരക്കില്‍ ഗൂഗിള്‍ പ്ലേ ബില്ലിംഗ് ഉപയോഗിക്കാന്‍ ഇന്തോനേഷ്യന്‍ ആപ്പ് ഡെവലപ്പര്‍മാരെ ഗൂഗിള്‍ നിര്‍ബന്ധിച്ചു എന്ന സംശയത്തില്‍ ഗൂഗിളിന്റെ മാതൃ കമ്പനിയായ ആല്‍ഫബറ്റിനെതിരെ ആന്റിട്രസ്റ്റ് ഏജന്‍സി 2022ല്‍ അന്വേഷണം ആരംഭിച്ചിരുന്നു. ഗൂഗിള്‍ പ്ലേ ബില്ലിംഗ് സംവിധാനം ഉപയോഗിച്ചില്ലെങ്കില്‍ പ്ലേ സ്റ്റോറില്‍ നിന്ന് ആപ്പുകള്‍ നീക്കം ചെയ്യുമെന്ന് ഗൂഗിള്‍ ഭീഷണിപ്പെടുത്തിയെന്ന് ഏജന്‍സി കണ്ടെത്തി. വിപണിയിലെ കുത്തക ഒഴിവാക്കാനുള്ള ഇന്തോനേഷ്യന്‍ നിയമം ഗൂഗിള്‍ ലംഘിച്ചതായി ആന്റിട്രസ്റ്റ് ഏജന്‍സി വ്യക്തമാക്കി. ഗൂഗിള്‍ പ്ലേ ബില്ലിംഗ് വഴി 30 ശതമാനം അധികം തുക ഗൂഗിള്‍ ഈടാക്കി എന്നും അന്വേഷണ സംഘം പറയുന്നു. ഇന്തോനേഷ്യയില്‍ 93 ശതമാനം മാര്‍ക്കറ്റ് ഷെയറും കയ്യാളുന്ന ഡിജിറ്റല്‍ കമ്പനിയാണ് ഗൂഗിള്‍. അതേസമയം പിഴ ചുമത്തിയതിനെതിരെ അപ്പീല്‍ നല്‍കുമെന്ന് ഗൂഗിള്‍ അറിയിച്ചു. 

google