ബംഗ്ലാദേശില്‍ വീണ്ടും ഹിന്ദു വീടുകള്‍ അഗ്‌നിക്കിരയാക്കി

ധാക്ക: ബംഗ്ലാദേശില്‍ ഹിന്ദു ന്യൂനപക്ഷങ്ങള്‍ക്കെതിരെയുള്ള അതിക്രമങ്ങള്‍ നിയന്ത്രണാതീതമാകുന്നു. രാജ്യത്തിന്റെ വിവിധ ഭാഗങ്ങളില്‍ ഹിന്ദുക്കളെ ലക്ഷ്യം വെച്ചുള്ള ആക്രമണങ്ങള്‍ തുടരുന്നതിനിടെ, കഴിഞ്ഞ ദിവസം ഒരു ഹിന്ദു കുടുംബത്തിന്റെ വീടുകള്‍ തീവ്രവാദികള്‍ ആസൂത്രിതമായി അഗ്‌നിക്കിരയാക്കി. ശൈഖ് ഹസീന സര്‍ക്കാരിന്റെ പതനത്തിന് ശേഷം ബംഗ്ലാദേശില്‍ രൂപപ്പെട്ട അരാജകത്വം ഹിന്ദു വംശഹത്യയിലേക്കാണ് നീങ്ങുന്നതെന്ന ആശങ്ക ശക്തമാണ്.

ബംഗ്ലാദേശിലെ മുസ്ലീം ഭൂരിപക്ഷ പ്രദേശമായ പബ്ലിക് ഡിസ്ട്രിക്റ്റിലാണ് നടുക്കുന്ന സംഭവം നടന്നത്. ഒരു ഹിന്ദു കുടുംബത്തിന്റെ  അഞ്ച് വീടുകളാണ് അക്രമികള്‍ തീയിട്ട് നശിപ്പിച്ചത്. രാത്രിയില്‍ ആയുധങ്ങളുമായെത്തിയ സംഘം പെട്രോള്‍ ഒഴിച്ചാണ് വീടുകള്‍ക്ക് തീ കൊടുത്തത്. പോലീസിനെ വിവരമറിയിച്ചിട്ടും മണിക്കൂറുകള്‍ കഴിഞ്ഞാണ് അധികൃതര്‍ സ്ഥലത്തെത്തിയതെന്ന് ആക്ഷേപമുണ്ട്.

ഇതൊരു ഒറ്റപ്പെട്ട സംഭവമല്ലെന്ന് രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു. കഴിഞ്ഞ ഏതാനും ആഴ്ചകളായി ബംഗ്ലാദേശിലെ ക്ഷേത്രങ്ങളും ഹിന്ദുക്കളുടെ വ്യാപാര സ്ഥാപനങ്ങളും വ്യാപകമായി തകര്‍ക്കപ്പെടുകയാണ്.ലപ്പോഴും അടിസ്ഥാനരഹിതമായ ദൈവനിന്ദാ ആരോപണങ്ങള്‍ ഉന്നയിച്ചാണ് ആള്‍ക്കൂട്ടം ഹിന്ദുക്കളെ വേട്ടയാടുന്നത്.ഇടക്കാല സര്‍ക്കാര്‍ അധികാരമേറ്റിട്ടും ന്യൂനപക്ഷങ്ങള്‍ക്ക് സുരക്ഷ ഉറപ്പാക്കുന്നതില്‍ പരാജയപ്പെടുന്നത് അന്താരാഷ്ട്ര തലത്തില്‍ വലിയ പ്രതിഷേധത്തിന് കാരണമായിട്ടുണ്ട്.

ഇന്ത്യാവിരുദ്ധ വികാരം ആളിക്കത്തിക്കാന്‍ പാകിസ്ഥാന്റെ ഐഎസ്‌ഐയും ബംഗ്ലാദേശിലെ തീവ്രവാദ സംഘടനകളും ചേര്‍ന്ന് പ്രവര്‍ത്തിക്കുന്നതായാണ് രഹസ്യാന്വേഷണ റിപ്പോര്‍ട്ടുകള്‍. ഹിന്ദുക്കളെ ആക്രമിക്കുന്നതിലൂടെ ഇന്ത്യയെ പ്രകോപിപ്പിക്കുക എന്ന ഗൂഢതന്ത്രമാണ് ഇതിന് പിന്നില്‍. 1971-ല്‍ ഇന്ത്യ നല്‍കിയ സഹായം മറന്നുകൊണ്ട്, അന്ന് തോറ്റോടിയ പാകിസ്താനെ താല്പര്യങ്ങള്‍ക്കനുസരിച്ചാണ് ബംഗ്ലാദേശിലെ ഒരു വിഭാഗം ഇപ്പോള്‍ പ്രവര്‍ത്തിക്കുന്നത്.

വിദേശകാര്യ മന്ത്രാലയം ബംഗ്ലാദേശ് ഭരണകൂടത്തോട് ശക്തമായ പ്രതിഷേധം അറിയിച്ചു കഴിഞ്ഞു.  പ്രാണരക്ഷാര്‍ത്ഥം അതിര്‍ത്തി കടന്നെത്തുന്നവരുടെ എണ്ണം വര്‍ദ്ധിക്കാന്‍ സാധ്യതയുള്ളതിനാല്‍ ബിഎസ്എഫ് (BSF) അതീവ ജാഗ്രതയിലാണ്. അതിര്‍ത്തി കടന്നുള്ള ഏതൊരു പ്രകോപനത്തിനും ശക്തമായ മറുപടി നല്‍കാന്‍ സൈന്യത്തിന് നിര്‍ദ്ദേശം നല്‍കിയിട്ടുണ്ട്.