ഹോങ്കോങ്ങില്‍ ചരക്ക് വിമാനം കടലില്‍ വീണ് 2 പേര്‍ മരിച്ചു

ഹോങ്കോങ്: ചരക്ക് വിമാനം റണ്‍വേയില്‍ നിന്ന് തെന്നിമാറി കടലില്‍ വീണ് രണ്ട് പേര്‍ മരിച്ചു. ഹോങ്കോങ് അന്താരാഷ്ട്ര വിമാനത്താവളത്തില്‍ പ്രാദേശിക സമയം പുലര്‍ച്ചെ 3:50 ഓടെയാണ് അപകടം. എസിടി എയര്‍ലൈന്‍സിന്റെ വിമാനമാണ് അപകടത്തില്‍പ്പെട്ടതെന്ന് എമിറേറ്റ്‌സ് അറിയിച്ചു.

ദുബൈയില്‍ നിന്ന് വന്ന ചരക്ക് വിമാനം ഹോങ്കോങ് അന്താരാഷ്ട്ര വിമാനത്താവളത്തില്‍ ഇറങ്ങുന്നതിനിടെയാണ് റണ്‍വേയില്‍നിന്ന് തെന്നിമാറി കടലില്‍ പതിച്ചത്. ബോയിങ് 747 ചരക്ക് വിമാനം വിമാനത്താവളത്തിന്റെ ഭിത്തിക്കരികെ കടലില്‍ ഭാഗികമായി വെള്ളത്തില്‍ മുങ്ങിക്കിടക്കുന്ന ചിത്രം പുറത്തുവന്നു. വിമാനത്തിന്റെ നോസ്, ടെയില്‍ എന്നിവ വേര്‍പെട്ട നിലയിലാണ്.

വിമാനത്തിലുണ്ടായിരുന്ന നാല് ജീവനക്കാരെയും രക്ഷപ്പെടുത്തിയെന്ന് ഹോങ്കോങ് വിമാനത്താവളം പ്രസ്താവനയില്‍ അറിയിച്ചു. അതേസമയം റണ്‍വേയ്ക്ക് സമീപം നിര്‍ത്തിയിട്ടിരുന്ന ഗ്രൗണ്ട് വാഹനത്തിലുണ്ടായിരുന്ന രണ്ട് പേര്‍ വിമാനം പതിച്ചതിനെ തുടര്‍ന്ന് മരിച്ചതായി പൊലീസ് വൃത്തങ്ങളെ ഉദ്ധരിച്ച് സൗത്ത് ചൈന മോണിംഗ് പോസ്റ്റ് റിപ്പോര്‍ട്ട് ചെയ്തു.

വിമാനം ഇറങ്ങുന്നതിനിടെ വടക്കു ഭാഗത്ത് റണ്‍വേയില്‍നിന്ന് തെന്നിമാറി കടലിലേക്ക് പതിക്കുകയായിരുന്നുവെന്ന് ഹോങ്കോങിലെ വ്യോമയാന വിഭാഗം പ്രസ്താവനയില്‍ പറഞ്ഞു. ദുബൈയിലെ എമിറേറ്റ്സ് എയര്‍ലൈന്‍സ് പുറത്തിറക്കിയ പ്രസ്താവനയില്‍ പറയുന്നത് ഇകെ9788 എന്ന വിമാനമാണ് അപകടത്തില്‍പ്പെട്ടത്.

എസിടി എയര്‍ലൈന്‍സില്‍ നിന്ന് വാടകയ്ക്കെടുത്തതും അവര്‍ പ്രവര്‍ത്തിപ്പിച്ചിരുന്നതുമായ ബോയിങ് 747 കാര്‍ഗോ വിമാനമായിരുന്നു അതെന്നും സ്ഥിരീകരിച്ചു. വിമാനത്തിലുണ്ടായിരുന്ന ജീവനക്കാര്‍ സുരക്ഷിതരാണ്. വിമാനത്തില്‍ ചരക്ക് ഉണ്ടായിരുന്നില്ലെന്നും എമിറേറ്റ്സ് അറിയിച്ചു.

അപകടത്തില്‍പ്പെട്ട വിമാനത്തിന് 32 വര്‍ഷം പഴക്കമുണ്ടെന്നും അത് ചരക്ക് വിമാനമാകും മുന്‍പ് യാത്രാ വിമാനമായിരുന്നുവെന്നും ഫ്‌ലൈറ്റ് ട്രാക്കിംഗ് സേവനമായ ഫ്‌ലൈറ്റ് റഡാര്‍24 പറഞ്ഞു. സംഭവം നഗരത്തിലെ എയര്‍ ആക്സിഡന്റ് ഇന്‍വെസ്റ്റിഗേഷന്‍ അതോറിറ്റിയെ അറിയിച്ചിട്ടുണ്ടെന്നും അന്വേഷണത്തോട് പൂര്‍ണമായി സഹകരിക്കുമെന്നും ഹോങ്കോങ്ങിലെ സിവില്‍ ഏവിയേഷന്‍ ഡിപ്പാര്‍ട്ട്മെന്റ് അറിയിച്ചു.

ലോകത്തിലെ ഏറ്റവും തിരക്കേറിയ കാര്‍ഗോ വിമാനത്താവളങ്ങളിലൊന്നായ ഹോങ്കോങ് അന്താരാഷ്ട്ര വിമാനത്താവളത്തിന്റെ വടക്കന്‍ റണ്‍വേ അപകടത്തെ തുടര്‍ന്ന് അടച്ചിട്ടിരിക്കുകയാണ്. അതേസമയം തെക്ക്, മധ്യ റണ്‍വേകള്‍ തുടര്‍ന്നും പ്രവര്‍ത്തിക്കുമെന്ന് വിമാനത്താവള അധികൃതര്‍ വ്യക്തമാക്കി.