സുഹൃത്തിനെ ഏങ്ങനെ കൊല്ലാം? ചാറ്റ് ജിപിടിയോട് ചോദ്യം ചോദിച്ച 13 വയസുകാരന്‍ അറസ്റ്റിൽ

ഫ്ലോറിഡയിലെ ഡെലാൻഡിലുള്ള സൗത്ത് വെസ്റ്റേൺ മിഡിൽ സ്കൂളിലെ 13 വയസ്സുകാരനായ വിദ്യാർത്ഥി, ക്ലാസ് നടക്കുന്നതിനിടെ എഐ ചാറ്റ്ബോട്ടായ ചാറ്റ് ജിപിടിയോട് തന്‍റെ സുഹൃത്തിനെ ഏങ്ങനെ കൊല്ലാമെന്ന് ചോദിച്ചു.

വിദ്യാർത്ഥി സ്കൂൾ അധികൃതർ നല്‍കിയ കമ്പ്യൂട്ടർ ഉയോഗിച്ചാണ് ചാറ്റ് ജിപിടിയോട് ചോദ്യം ചോദിച്ചത്.

ഇതിന് പിന്നാലെ കുട്ടിയെ പോലീസ് അറസ്റ്റ് ചെയ്തെന്ന് റിപ്പോര്‍ട്ടുകൾ. സ്‌കൂളിലെ ഡിജിറ്റൽ മോണിറ്ററിംഗ് സിസ്റ്റം വിദ്യാർത്ഥിയുടെ ചോദ്യം കണ്ടെത്തുകയും ഉടനടി അധ്യാപകരുടെയും പോലീസിന്‍റെയും ശ്രദ്ധയില്‍പ്പെടുത്തുകയുമായിരുന്നു.

കുട്ടികളില്‍ ഉണ്ടാകുന്ന അപകടകരമായ പ്രവണതകളെ കണ്ടെത്തുന്നതിനായി പ്രത്യേകം നിർമ്മിച്ച സോഫ്റ്റ്വെയറാണ് കുട്ടിയുടെ അപകടകരമായ ചോദ്യം കണ്ടെത്തിയതും ഓട്ടോമാറ്റിക്കായി അധ്യാപകര്‍ക്കും പോലീസിനും വിവരം കൈമാറുകയും ചെയ്തത്. വിവരം ലഭിച്ചതിന് പിന്നാലെ പോലീസ് സ്കളിലെത്തുകയും കുട്ടിയെ അറസ്റ്റ് ചെയ്യുകയുമായിരുന്നെന്ന് റിപ്പോര്‍ട്ടുകൾ പറയുന്നു.