യുഎസില്‍ 'ഐസ്' വിരുദ്ധ പ്രതിഷേധം രാജ്യവ്യാപകമായി വ്യാപിക്കുന്നു; റെനി ഗുഡിന്റെ കൊലപാതകത്തില്‍ ജനരോഷം

വാഷിങ്്ടണ്‍: അമേരിക്കയിലെ ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്‌സ്‌മെന്റ് (ഐസ്) ഉദ്യോഗസ്ഥരുടെ ക്രൂരമായ പ്രവര്‍ത്തനങ്ങള്‍ക്കെതിരെ രാജ്യമെമ്പാടും വന്‍ തോതിലുള്ള പ്രതിഷേധങ്ങള്‍ ഉയരുകയാണ്. ഈ വാരാന്ത്യത്തില്‍ യുണൈറ്റഡ് സ്റ്റേറ്റ്‌സ് മുഴുവന്‍ ആയിരത്തിലധികം പ്രതിഷേധ പ്രകടനങ്ങള്‍ സംഘടിപ്പിക്കാനാണ് തീരുമാനം. മിനിയാപൊളിസില്‍ റെനി നിക്കോള്‍ ഗുഡ് എന്ന യുവതി ഐസ് ഏജന്റിന്റെ വെടിയേറ്റ് കൊല്ലപ്പെട്ട സംഭവമാണ് ഇപ്പോഴത്തെ വ്യാപകമായ ജനരോഷത്തിന് പ്രധാന കാരണമായത്.

''ഐസിനെ പൂര്‍ണ്ണമായി പുറത്താക്കുക'' (ICE Out For Good) എന്ന മുദ്രാവാക്യവുമായി വിവിധ സന്നദ്ധ സംഘടനകളുടെ സംയുക്ത നേതൃത്വത്തിലാണ് പ്രക്ഷോഭങ്ങള്‍ നടക്കുന്നത്. ഐസ് ഏജന്റുമാരുടെ പ്രാദേശിക സമൂഹങ്ങളില്‍ നിന്നുള്ള പൂര്‍ണ്ണമായ പിന്‍വലിക്കലും റെനി ഗുഡിന്റെ കൊലപാതകത്തില്‍ ഉത്തരവാദികളെ കണ്ടെത്തി ശിക്ഷിക്കലും പ്രതിഷേധക്കാര്‍ ഉയര്‍ത്തുന്ന പ്രധാന ആവശ്യങ്ങളാണ്.
മിനിയാപൊളിസില്‍ നടന്ന ഒരു ഇമിഗ്രേഷന്‍ പരിശോധനയ്ക്കിടെയാണ് മൂന്ന് കുട്ടികളുടെ അമ്മയും കവയിത്രിയുമായ റെനി നിക്കോള്‍ ഗുഡ് (37) കൊല്ലപ്പെട്ടത്. വാഹനത്തില്‍ നിന്ന് ഇറങ്ങാന്‍ വിസമ്മതിച്ചതിനെ തുടര്‍ന്ന് ഐസ് ഉദ്യോഗസ്ഥന്‍ അവര്‍ക്കു നേരെ വെടിയുതിര്‍ക്കുകയായിരുന്നു. റെനി ഒരു 'ലീഗല്‍ ഒബ്‌സര്‍വര്‍' ആയിരുന്നുവെന്നും ചില റിപ്പോര്‍ട്ടുകളില്‍ പറയുന്നു.

ഫെഡറല്‍ ഏജന്‍സികള്‍ നല്‍കുന്ന വിശദീകരണമനുസരിച്ച്, റെനി തന്റെ വാഹനം ഉദ്യോഗസ്ഥര്‍ക്കു നേരെ ഇടിച്ചുകയറ്റാന്‍ ശ്രമിച്ചതിനാലും സ്വയം രക്ഷയ്ക്കായിട്ടുമാണ് വെടിവെച്ചതെന്നാണ് അവകാശവാദം. എന്നാല്‍ ഈ വിശദീകരണം തെറ്റാണെന്നും അനാവശ്യവും അമിതവുമായ ബലപ്രയോഗമാണ് നടത്തിയതെന്നും മിനിയാപൊളിസ് മേയര്‍ ഉള്‍പ്പെടെയുള്ള നേതാക്കള്‍ രൂക്ഷമായി വിമര്‍ശിച്ചു. റെനി ഗുഡിന്റെ കൊലപാതകത്തിനു പുറമെ, പോര്‍ട്ട്ലാന്‍ഡ് ഉള്‍പ്പെടെയുള്ള മറ്റു നഗരങ്ങളിലും ഐസ് ഉദ്യോഗസ്ഥര്‍ നടത്തിയ വെടിവെപ്പുകളും മര്‍ദ്ദനങ്ങളും പ്രതിഷേധത്തിന്റെ രൂക്ഷത വര്‍ധിപ്പിച്ചു. പാര്‍ശ്വവല്‍ക്കരിക്കപ്പെട്ട സമൂഹങ്ങളോട് ഐസ് തുടര്‍ച്ചയായി അക്രമം അഴിച്ചുവിടുകയാണെന്ന് മനുഷ്യാവകാശ സംഘടനകള്‍ ആരോപിക്കുന്നു. അമേരിക്കന്‍ സിവില്‍ ലിബര്‍ട്ടീസ് യൂണിയന്‍ (ACLU), '50501' പ്രൊട്ടസ്റ്റ് മൂവ്‌മെന്റ് തുടങ്ങിയ പ്രമുഖ സംഘടനകളാണ് ഈ സമരങ്ങള്‍ക്ക് നേതൃത്വം നല്‍കുന്നത്.