ഇറ്റലിയിലെ കാമുകന്മാരുടെ പ്രിയപ്പെട്ട പ്രണയകവാടം പ്രണയദിനത്തില്‍ ഓര്‍മ്മയായി

പുഗ്ലിയ/ ഇറ്റലി:2026 ഫെബ്രുവരി 14ന് ലോകമെമ്പാടുമുള്ള കമിതാക്കള്‍ പ്രണയദിനം ആഘോഷിക്കുമ്പോള്‍ ഇറ്റലിയിലെ കാമുകീ കാമുകന്മാര്‍ക്ക് അന്ന് ഒരു കറുത്ത ദിനമായിരുന്നു. ഇറ്റലിയുടെ അഭിമാനമായ 'കാമുകന്മാരുടെ കവാടം' (Lovers' Arch) ചരിത്രമായി. അഡ്രിയാറ്റിക് തീരത്ത് തലയുയര്‍ത്തി നിന്നിരുന്ന ഈ പ്രകൃതിദത്ത ശിലാസൗധം ദിവസങ്ങളോളം നീണ്ടുനിന്ന അതിശക്തമായ കൊടുങ്കാറ്റിലും കടല്‍ക്ഷോഭത്തിലും തകര്‍ന്ന് കടലില്‍ പതിച്ചു. നൂറ്റാണ്ടുകളായി പ്രണയത്തിന്റെയും അചഞ്ചലമായ സ്‌നേഹത്തിന്റെയും പ്രതീകമായി നിലകൊണ്ടിരുന്ന ഈ കവാടം ലോകമെമ്പാടുമുള്ള ആയിരക്കണക്കിന് പ്രണയികളെയും വിനോദസഞ്ചാരികളെയും ആകര്‍ഷിച്ചിരുന്നു.

പ്രാദേശികമായി 'ആര്‍ക്കോ ഡെഗ്ലി ഇന്നമോറതി' (arco degli innamorati) എന്ന് വിളിക്കപ്പെടുന്ന ഈ കവാടം വെറുമൊരു കാഴ്ചവസ്തുവായിരുന്നില്ല. ഇതിനു താഴെ നിന്ന് ചുംബിക്കുന്ന പ്രണയികള്‍ക്ക് നിത്യമായ പ്രണയം ലഭിക്കുമെന്ന് ഒരു പ്രാദേശിക ഐതിഹ്യമുണ്ട്. അതുകൊണ്ടുതന്നെ വിവാഹാഭ്യര്‍ത്ഥനകള്‍ക്കും വാര്‍ഷികാഘോഷങ്ങള്‍ക്കും ഏറ്റവും പ്രിയപ്പെട്ട ഇടമായിരുന്നു ഇവിടം.

ദക്ഷിണ ഇറ്റലിയില്‍ ആഞ്ഞടിച്ച 'ഒറിയാന' (Storm Oriana) കൊടുങ്കാറ്റാണ് ഈ തകര്‍ച്ചയ്ക്ക് കാരണമായത്. ജനുവരിയില്‍ നാശം വിതച്ച 'ഹാരി' സൈക്ലോണിന്റെ ആഘാതത്തില്‍ നിന്ന് മുക്തമാകുന്നതിന് മുന്‍പേയാണ് പുതിയ കൊടുങ്കാറ്റ് എത്തിയത്. ആഗോളതാപനവും കടല്‍ താപനില ഉയരുന്നതും ഇത്തരം കടല്‍ച്ചുഴലിക്കാറ്റുകളുടെ (Medicanes) തീവ്രത വര്‍ദ്ധിപ്പിക്കുന്നുവെന്ന് ശാസ്ത്രജ്ഞര്‍ ചൂണ്ടിക്കാട്ടുന്നു.

'ഇതൊരിക്കലും ആഗ്രഹിക്കാത്ത ഒരു വാലന്റൈന്‍ ദിന സമ്മാനമായിപ്പോയി. നമ്മുടെ തീരദേശത്തെയും ഇറ്റലിയുടെ തന്നെയും ഏറ്റവും പ്രശസ്തമായ അടയാളങ്ങളില്‍ ഒന്ന് ഇല്ലാതായിരിക്കുന്നു.' മെലെന്‍ഡുഗ്‌നോ മേയര്‍ മൗറിസിയോ സിസ്റ്റെര്‍നിനോ പറഞ്ഞു.വഈ കവാടത്തെ കേന്ദ്രീകരിച്ച് പ്രവര്‍ത്തിച്ചിരുന്ന നിരവധി ഹോട്ടലുകളെയും റിസോര്‍ട്ടുകളെയും ഈ നഷ്ടം സാരമായി ബാധിക്കും. കാല്‍ക്കറനൈറ്റ് (Calcarenite) ശിലകള്‍ കൊണ്ട് നിര്‍മ്മിതമായ ഈ തീരപ്രദേശം കടലെടുക്കുന്നതിന്റെ ഏറ്റവും വലിയ ഉദാഹരണമാണ് ഈ തകര്‍ച്ച. ഈ വര്‍ഷത്തെ കൊടുങ്കാറ്റുകള്‍ മൂലം ദക്ഷിണ ഇറ്റലിയില്‍ ഏകദേശം 100 കോടിയിലധികം യൂറോയുടെ നഷ്ടം കണക്കാക്കപ്പെടുന്നു. പ്രകൃതി വിഭവങ്ങള്‍ എത്രത്തോളം നശ്വരമാണെന്നതിന്റെയും കാലാവസ്ഥാ വ്യതിയാനം നമ്മുടെ ഭൂമിയെ എങ്ങനെ മാറ്റിമറിക്കുന്നു എന്നതിന്റെയും വേദനിപ്പിക്കുന്ന ഓര്‍മ്മപ്പെടുത്തലായി കാമുകന്മാരുടെ കവാടത്തിന്റെ തകര്‍ച്ച മാറുന്നു.

മെഡിറ്ററേനിയന്‍ കടലില്‍ രൂപപ്പെടുന്ന ചുഴലിക്കാറ്റുകളെയാണ് 'മെഡിക്കെയ്നുകള്‍' എന്ന് വിളിക്കുന്നത്. സാധാരണയായി ശാന്തമായ ഈ കടല്‍ ഇപ്പോള്‍ ചൂടുപിടിക്കുന്നത് (Rising Sea Temperatures) അതിശക്തമായ കൊടുങ്കാറ്റുകള്‍ക്ക് കാരണമാകുന്നു. 2025-2026 കാലഘട്ടത്തില്‍ ഉണ്ടായ സൈക്ലോണ്‍ ഹാരിയും ഒറിയാനയും ഇതിന് തെളിവാണ്. ഈ കാറ്റുകള്‍ തീരദേശത്തെ ശിലകളെ അതിവേഗം ദ്രവിപ്പിക്കുന്നു. 

പുഗ്ലിയ മേഖലയിലെ ടൂറിസത്തിന്റെ പ്രധാന ആകര്‍ഷണം ഈ 'Lovers' Arch' ആയിരുന്നു. സോഷ്യല്‍ മീഡിയ വഴി പ്രശസ്തമായ ഇത്തരം സ്ഥലങ്ങള്‍ കാണാന്‍ എത്തുന്ന വിനോദസഞ്ചാരികള്‍ കുറയുന്നത് പ്രാദേശിക ഹോട്ടലുകളെയും ടൂറിസ്റ്റ് ഗൈഡുകളെയും ബാധിക്കും. 4.5 ദശലക്ഷം ഡോളറിന്റെ സംരക്ഷണ പദ്ധതി നടപ്പിലാക്കാന്‍ സാധിച്ചിരുന്നെങ്കില്‍ ഒരുപക്ഷേ ഈ തകര്‍ച്ച തടയാമായിരുന്നുവെന്ന് പ്രദശവാസികള്‍ പറയുന്നു.