ഇറാനില്‍ ഇരട്ട ഭൂചലനം; ആണവാക്രമണമെന്ന് സംശയം

ടെഹ്‌റാന്‍: അമേരിക്കയുടെയും ഇസ്രായേലിന്റെയും ശക്തമായ സൈനിക ആക്രമണങ്ങള്‍ക്കിടയില്‍ ഇറാന്റെ തെക്കന്‍ മേഖലയില്‍ ഭൂചലനം. ചൊവ്വാഴ്ച ഗെരാഷ്  മേഖലയിലാണ് റിക്ടര്‍ സ്‌കെയിലില്‍ 4.3 തീവ്രത രേഖപ്പെടുത്തിയ ഭൂചലനം അനുഭവപ്പെട്ടത്.

യുദ്ധം കാരണം അതീവ ജാഗ്രത നിലനില്‍ക്കുന്ന രാജ്യത്ത് പെട്ടെന്നുണ്ടായ പ്രകൃതിക്ഷോഭം ജനങ്ങള്‍ക്കിടയില്‍ വലിയ പരിഭ്രാന്തി സൃഷ്ടിച്ചു. ഭൂചലനത്തില്‍ കാര്യമായ നാശനഷ്ടങ്ങളോ ആളപായമോ ഉണ്ടായതായി ഉടനടി റിപ്പോര്‍ട്ടുകള്‍ ലഭിച്ചിട്ടില്ല. ഏതെങ്കിലും തരത്തിലുള്ള ആണവാക്രമണം ഉണ്ടായിട്ടുണ്ടോയെന്നാണ് ഇറാന്‍ മാധ്യമങ്ങള്‍ സംശയം പ്രകടിപ്പിച്ചിരിക്കുന്നത്.

അതേസമയം, ഇറാന്റെ സൈനിക താവളങ്ങളെ ലക്ഷ്യമിട്ടുള്ള വ്യോമാക്രമണങ്ങള്‍ ഇസ്രായേലും അമേരിക്കയും ശക്തമാക്കിയിരിക്കുകയാണ്. ടെഹ്റാനില്‍ നിന്ന് 800 കിലോമീറ്റര്‍ തെക്കുകിഴക്കായി സ്ഥിതി ചെയ്യുന്ന കെര്‍മാന്‍ വ്യോമതാവളത്തില്‍ നടന്ന ആക്രമണത്തില്‍ 13 ഇറാനിയന്‍ സൈനികര്‍ കൊല്ലപ്പെട്ടതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. സൈനിക ഹെലികോപ്റ്ററുകള്‍ സൂക്ഷിച്ചിരുന്ന ഈ താവളത്തിന് നേരെയാണ് ആക്രമണം ഉണ്ടായതെന്ന് തസ്‌നിം വാര്‍ത്താ ഏജന്‍സിയും ഹംഷഹരി ദിനപത്രവും റിപ്പോര്‍ട്ട് ചെയ്യുന്നു.

കഴിഞ്ഞ ശനിയാഴ്ച മുതല്‍ ഇറാന്റെ ഭൂപ്രദേശങ്ങളില്‍ ഇസ്രായേലും അമേരിക്കയും സംയുക്തമായി വ്യോമാക്രമണം നടത്തിവരികയാണ്. ഇറാനെതിരായ ഈ സൈനിക നീക്കം പെട്ടെന്ന് അവസാനിക്കില്ലെന്നും എന്നാല്‍ വര്‍ഷങ്ങളോളം നീണ്ടുനില്‍ക്കില്ലെന്നും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു തിങ്കളാഴ്ച വ്യക്തമാക്കിയിരുന്നു. തന്ത്രപരമായ ലക്ഷ്യങ്ങള്‍ തകര്‍ക്കുന്നതിനാണ് മുന്‍ഗണന നല്‍കുന്നതെന്നും ദീര്‍ഘകാല അധിനിവേശം ഉദ്ദേശിക്കുന്നില്ലെന്നും അദ്ദേഹം സൂചിപ്പിച്ചു.

ഇസ്രായേല്‍ സൈനിക വക്താവ് ലെഫ്റ്റനന്റ് കേണല്‍ നദവ് ഷോഷാനി ചൊവ്വാഴ്ച മാധ്യമങ്ങളോട് സംസാരിക്കവെ, ആഴ്ചകള്‍ നീണ്ടുനില്‍ക്കുന്ന പോരാട്ടത്തിനാണ് ഇസ്രായേല്‍ തയ്യാറെടുക്കുന്നതെന്ന് അറിയിച്ചു. എന്നാല്‍ നിലവിലെ സാഹചര്യത്തില്‍ കരസേനയെ ഇറാനിലേക്ക് അയക്കാന്‍ സാധ്യതയില്ലെന്നും അദ്ദേഹം പറഞ്ഞു. അത്തരമൊരു പ്രായോഗിക പദ്ധതിയെക്കുറിച്ച് ഇപ്പോള്‍ അറിവില്ലെന്നും അദ്ദേഹം വ്യക്തമാക്കി.

ഭൂചലനവും തുടര്‍ച്ചയായ വ്യോമാക്രമണങ്ങളും ഇറാനെ ഒരേസമയം വലിയ സമ്മര്‍ദ്ദത്തിലാക്കിയിരിക്കുകയാണ്. പ്രകൃതിക്ഷോഭവും യുദ്ധവും പശ്ചിമേഷ്യയിലെ അസ്ഥിരത കൂടുതല്‍ രൂക്ഷമാക്കുന്നു.