എംപോക്സ്; പുതിയ വകഭേദം പടരുന്നത് പ്രതീക്ഷിച്ചതിനേക്കാൾ വേ​ഗത്തിൽ

എംപോക്സ് പുതിയ വകഭേദമായ clade Ib കൂടുതൽ തീവ്രമാണെന്നും വേ​ഗത്തിൽ പടരുന്നുവെന്നും ​ഗവേഷകർ. ഡെമോക്രാറ്റിക് റിപ്പബ്ലിക് ഓഫ് കോം​ഗോയിൽ പടരുന്ന വകഭേദം മൂലം ഈവർഷം മാത്രം 615 പേർ മരിക്കുകയും 18,000 പേരിൽ രോ​ഗംസ്ഥിരീകരിക്കുകയും ചെയ്തിട്ടുണ്ട്.

അതിവേ​ഗത്തിലാണ് വൈറസിന്  ജനിതകവ്യതിയാനം സംഭവിക്കുന്നതെന്നും ഇത് ട്രാക്ക് ചെയ്യാനും നിയന്ത്രിക്കാനുമുള്ള പരിശ്രമങ്ങൾക്ക് തടസ്സമാകുന്നുവെന്നും ​​വിദ​ഗ്ധർ പറയുന്നു. നിലവിലെ എംപോക്സ് വ്യാപനത്തേക്കുറിച്ച് ട്രാക്ക് ചെയ്യാനുള്ള സംവിധാനങ്ങൾക്ക് ഊന്നൽ നൽകണമെന്നും വിഷയത്തിൽ കൂടുതൽ ​ഗവേഷണങ്ങൾ നടക്കണമെന്നും ലോകാരോ​ഗ്യസംഘടന അറിയിച്ചു.

അതേസമയം, രോ​ഗസ്ഥിരീകരണം നടത്താനുള്ള ടെസ്റ്റുകൾക്ക് ആവശ്യമായ കെമിക്കലുകൾ പോലും നിലവിൽ ആഫ്രിക്കയിലെ ലബോറട്ടറികളിൽ പരിമിതമാണെന്നാണ് റിപ്പോർട്ടുകളുള്ളത്. ഡെമോക്രാറ്റിക് റിപ്പബ്ലിക് ഓഫ് കോം​ഗോയ്ക്ക് പുറമെ സ്വീഡൻ, തായ്ലന്റ്,പാക്സിതാൻ എന്നീ രാജ്യങ്ങളിലും എംപോക്സ് സ്ഥിരീകരിച്ചിട്ടുണ്ട്.

2022 മുതൽ ലോകത്തിന്റെ പലഭാ​ഗങ്ങളിലും എംപോക്സ് വ്യാപനമുണ്ടെങ്കിലും കഴിഞ്ഞ കുറച്ചുനാളുകളായി തീവ്രവ്യാപനമുണ്ട്. വെസ്റ്റ്, സെൻട്രൽ, ഈസ്റ്റ് ആഫ്രിക്കൻ രാജ്യങ്ങളിലാണ് രോഗവ്യാപനമുള്ളത്. അമേരിക്കയിലും യൂറോപ്പിലും രോ​ഗികളുടെ നിരക്കിൽ വർധനയുണ്ട്.

നിലവിലെ വ്യാപനത്തിന് കാരണമായിട്ടുള്ള പുതിയ വകഭേദം ദ്രുതഗതിയിലാണ് പടരുന്നതെന്നാണ് റിപ്പോര്‍ട്ടുകള്‍. clade Ib എന്ന വകഭേദമാണ് ആഫ്രിക്കയുള്‍പ്പെടെയുള്ള സ്ഥലങ്ങളിലെ രോഗവ്യാപനത്തിനുപിന്നില്‍. 2022-ലെ രോഗവ്യാപനത്തിന് കാരണമായിരുന്നത് clade IIb വകഭേദമാണ്. അന്ന് 116 രാജ്യങ്ങളില്‍ നിന്നായി 100,000 പേരെയാണ് രോഗം ബാധിച്ചത്.