കാനഡയില്‍ ഇന്ത്യന്‍ യുവതിക്ക് നേരെ ആക്രമണം

ഒട്ടാവ: കാനഡയിലെ കാല്‍ഗറി റെയില്‍വേ സ്റ്റേഷനില്‍ ഇന്ത്യക്കാരിയെ യുവാവ് ആക്രമിക്കുന്നതിന്റെ ദൃശ്യങ്ങള്‍ പുറത്ത്. യുവതിയെ ആക്രമിക്കുന്നത് ചുറ്റുമുള്ള ആളുകള്‍ നോക്കിനില്‍ക്കുന്നതും വിഡിയോയില്‍ കാണാം. ഇതിനെതിരെ സമൂഹമാധ്യമങ്ങളില്‍ വലിയ പ്രതിഷേധമാണ് ഉയര്‍ന്നിരിക്കുന്നത്. 

ഞായറാഴ്ചയാണ് യുവതിക്ക് നേരെ ആക്രമണമുണ്ടായത്. കാല്‍ഗറിയിലെ സിറ്റി ഹാള്‍/ബോ വാലി കോളജ് സ്റ്റേഷനില്‍ നില്‍ക്കുന്ന യുവതിയുടെ കയ്യില്‍നിന്നു വെള്ളകുപ്പി പിടിച്ചുവാങ്ങി, മുഖത്തേക്ക് വെള്ളം ഒഴിച്ചു. തുടര്‍ന്ന് യുവതിയുടെ ജാക്കറ്റിന്റെ കോളറിനു കുത്തിപിടിച്ച് ട്രാന്‍സിറ്റ് ഷെല്‍ട്ടറിന്റെ ചുമരുകളില്‍ ചേര്‍ത്തുനിര്‍ത്തി ആവര്‍ത്തിച്ച് ഇടിച്ചു. ഫോണ്‍ നല്‍കാന്‍ ആവശ്യപ്പെട്ടതായും പൊലീസ് പറഞ്ഞു.

ബ്രെയ്ഡണ്‍ ജോസഫ് ജെയിംസ് ഫ്രഞ്ച് എന്നയാളാണ് യുവതിയെ ആക്രമിച്ചത്. യുവതിക്കു നേരെയുണ്ടായ അതിക്രമം കണ്ടുകൊണ്ടിരുന്ന ആളുകള്‍ ആരും അക്രമിയെ പിടിച്ചുമാറ്റാനോ യുവതിയെ രക്ഷപ്പെടുത്താനോ ശ്രമിച്ചില്ല. 'കാനഡയിലേക്കു പോകാന്‍ ആഗ്രഹിക്കുന്ന ഇന്ത്യക്കാര്‍ ഈ വിഡിയോ കാണണം' തുടങ്ങിയ കമന്റുകളും വിഡിയോയ്ക്കു താഴെ കാണാം. 

സംഭവം നടന്ന് അരമണിക്കൂറിനുള്ളില്‍ അക്രമിയെ പൊലീസ് അറസ്റ്റ് ചെയ്തു. ഇത്തരം സംഭവങ്ങള്‍ സമൂഹത്തില്‍ ആശങ്കയുണ്ടാക്കുന്നതാണെന്നും അനുവദിക്കാന്‍ കഴിയില്ലെന്നും ഇന്‍സ്‌പെക്ടര്‍ ജേസണ്‍ ബോബ്രോവിച്ച് പറഞ്ഞു. വംശീയതയല്ല ആക്രമണത്തിനു പിന്നിലെന്നും പൊലീസ് വ്യക്തമാക്കി.