അരിസോണയില്‍ വെള്ളപ്പൊക്കം: നിരവധി മരണം; അടിയന്തരാവസ്ഥ പ്രഖ്യാപിച്ചു

അരിസോണ: അരിസോണയിലെ ഗ്‌ളോബ് നഗരത്തില്‍ ഉണ്ടായ വെള്ളപ്പൊക്കത്തില്‍ നിരവധി മരണം റിപ്പോര്‍ട്ടുചെയ്തു. ഒരു വിതരണ കേന്ദ്രത്തില്‍ നിന്ന് ഏകദേശം 1,000 പ്രൊപ്പെയ്ന്‍ ടാങ്കുകള്‍ ഒഴുകിപ്പോയത് നഗരത്തില്‍ വലിയ രാസവസ്തു ഭീഷണിയാണ് ഉയര്‍ത്തിയിരിക്കുന്നത്. 

ഗില കൗണ്ടി എമര്‍ജന്‍സി മാനേജ്മെന്റാണ് ഈ വിവരം അറിയിച്ചത്. ദുരന്തബാധിത പ്രദേശങ്ങളിലേക്ക് വിഭവങ്ങള്‍ വേഗത്തില്‍ എത്തിക്കുന്നതിനായി അരിസോണ ഗവര്‍ണര്‍ കേറ്റി ഹോബ്‌സ് ശനിയാഴ്ച അടിയന്തരാവസ്ഥ പ്രഖ്യാപിച്ചു. ''ഗില കൗണ്ടിയിലെ വെള്ളപ്പൊക്കം ഹൃദയഭേദകമായ നഷ്ടത്തിനും ഗുരുതരമായ നാശനഷ്ടങ്ങള്‍ക്കും കാരണമായി,'' അവര്‍ പ്രസ്താവനയില്‍ പറഞ്ഞു.

രക്ഷാപ്രവര്‍ത്തനങ്ങള്‍ തുടരുകയാണെന്ന് അധികൃതര്‍ അറിയിച്ചു. മരിച്ചതായി സ്ഥിരീകരിച്ച രണ്ട് പേരെ വെള്ളത്തില്‍ മുങ്ങിയ നിലയില്‍ ഒരു വാഹനത്തിനുള്ളില്‍ നിന്നാണ് കണ്ടെത്തിയത്. മൂന്നാമത്തെയാളെ ഗ്‌ളോബ് നഗരത്തില്‍ വാഹനത്തിന് പുറത്ത് നിന്നും കണ്ടെത്തി. 

കൂടാതെ, വെള്ളിയാഴ്ച രാത്രിയിലെ കൊടുങ്കാറ്റിനിടെ കാണാതായ നാലാമത്തെ വ്യക്തിയായ ആന്‍ഡര്‍ പൊളാന്‍കോയെ ശനിയാഴ്ച രാവിലെ അദ്ദേഹത്തിന്റെ വാഹനത്തിന് പുറത്ത് മരിച്ച നിലയില്‍ കണ്ടെത്തിയതായി സ്‌കോട്ട്സ്ഡേല്‍ പൊലീസ് ഡിപ്പാര്‍ട്ട്മെന്റ് അറിയിച്ചു. വെള്ളം ഇറങ്ങിയപ്പോഴാണ് മൃതദേഹം കണ്ടെത്തിയത്. മരണകാരണം സംബന്ധിച്ച് അന്വേഷണം നടക്കുകയാണ്.

ഒഴുകിപ്പോയ പ്രൊപ്പെയ്ന്‍ ടാങ്കുകള്‍ പൊട്ടിത്തെറിക്കാന്‍ സാധ്യതയുള്ളതിനാല്‍ ഗുരുതരമായ സുരക്ഷാ ആശങ്ക സൃഷ്ടിച്ചിട്ടുണ്ടെന്ന് അധികൃതര്‍ മുന്നറിയിപ്പ് നല്‍കി. ''ചരിത്രപരമായ ഡൗണ്‍ടൗണ്‍ ഗ്‌ളോബ് നിലവില്‍ സുരക്ഷിതമല്ല. കെട്ടിടങ്ങള്‍ക്ക് കേടുപാടുകള്‍ സംഭവിച്ചിട്ടുണ്ട്, കൂടാതെ പ്രൊപ്പെയ്ന്‍ ടാങ്കുകള്‍ ഉള്‍പ്പെടെയുള്ള അപകടകരമായ രാസവസ്തുക്കളും അവശിഷ്ടങ്ങളും ഇവിടെയുണ്ട്,'' ഗ്‌ളോബ് സിറ്റി ഫേസ്ബുക്ക് പോസ്റ്റില്‍ പറഞ്ഞു.

''നിങ്ങളുടെ സുരക്ഷയ്ക്കായി, അടുത്ത അറിയിപ്പ് ഉണ്ടാകുന്നത് വരെ ഈ പ്രദേശത്ത് പ്രവേശിക്കുന്നത് ഒഴിവാക്കുക. തിരച്ചില്‍, രക്ഷാപ്രവര്‍ത്തനങ്ങള്‍ നടന്നുകൊണ്ടിരിക്കുകയാണ്. ഈ പ്രദേശത്തെ ഗതാഗതം രക്ഷാസംഘങ്ങളെയും പരിശീലനം ലഭിച്ച നായ്ക്കളുടെ മണത്ത് കണ്ടെത്താനുള്ള പ്രവര്‍ത്തനങ്ങളെയും തടസ്സപ്പെടുത്തിയേക്കാം,'' അധികൃതര്‍ അറിയിച്ചു.