'ബ്ലാക് വിഡോ' അന്ന ചാപ്മാന്‍ റഷ്യന്‍ ഇന്റലിജന്‍സ് മ്യൂസിയത്തിന്റെ മേധാവി

മോസ്‌കോ: 2010ല്‍ യുഎസില്‍ നിന്നും നാടുകടത്തപ്പെട്ട റഷ്യന്‍ ചാരവനിത അന്ന ചാപ്മാന് പുതിയ ദൗത്യം നല്‍കി വ്ളാഡിമിര്‍ പുട്ടിന്‍ ഭരണകൂടം. ചുവന്ന മുടിയുമായി ഒരിക്കല്‍ പാശ്ചാത്യ ലോകത്തെ റഷ്യയുടെ എതിരാളികളെ വട്ടം കറക്കിയിരുന്ന അന്ന, മോസ്‌കോയില്‍ പുതുതായി ആരംഭിച്ച റഷ്യന്‍ ഇന്റലിജന്‍സ് മ്യൂസിയത്തിന്റെ മേധാവിയാകും. റഷ്യന്‍ പ്രസിഡന്റ് വ്ളാഡിമിര്‍ പുട്ടിന്റെ വിദേശ ചാര ഏജന്‍സിയായ എസ്വിആറുമായി നേരിട്ട് ബന്ധമുള്ളതാണ് മോസ്‌കോയിലെ ഗോര്‍ക്കി പാര്‍ക്കിന് സമീപം ആരംഭിച്ചിരിക്കുന്ന മ്യൂസിയം. റഷ്യന്‍ ചാരവൃത്തിയുടെ ചരിത്രവും, നേട്ടങ്ങളും ആണ് മ്യൂസിയത്തില്‍ പ്രദര്‍ശിപ്പിക്കുകയെന്ന് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്തു.

ഒരു ക്രൈം ത്രില്ലര്‍ സിനിമ പോലെയാണ് അന്ന ചാപ്മാന്റെ ചാര ജീവിതം. 'ബ്ലാക്ക് വിഡോ' (കറുത്ത വിധവ) എന്ന രഹസ്യ നാമത്തിലറിയപ്പെടുന്ന അന്നയെ യുഎസ് അടക്കമുള്ള പാശ്ചാത്യ രാജ്യങ്ങളിലായിരുന്നു ഒരു കാലത്ത് റഷ്യ ചാരവൃത്തിക്ക് നിയോഗിച്ചിരുന്നത്. 2010 ല്‍, 'ഓപ്പറേഷന്‍ ഗോസ്റ്റ് സ്റ്റോറീസി'നിടെ റഷ്യന്‍ സ്ലീപ്പര്‍ സെല്ലായി പ്രവര്‍ത്തിച്ചിരുന്ന അന്നയെ ന്യൂയോര്‍ക്കില്‍ വച്ച് എഫ്ബിഐ അറസ്റ്റ് ചെയ്തു.

അറസ്റ്റിന് പിന്നാലെ അന്നയുടെ വസതിയില്‍നിന്ന് റഷ്യന്‍ ഉദ്യോഗസ്ഥരുമായി ആശയവിനിമയം നടത്താന്‍ ഉപയോഗിച്ച രഹസ്യ വയര്‍ലെസ് നെറ്റ്വര്‍ക്കുകളും ലാപ്ടോപ്പും എഫ്ബിഐ കണ്ടെടുത്തു. 2010 ജൂണ്‍ 27ന് അന്നയ്ക്കു പുറമെ മറ്റ് 9 പേരും റഷ്യന്‍ ചാരവൃത്തി കേസില്‍ അറസ്റ്റിലായി. വൈകാതെ അന്നയെ മോസ്‌കോയിലേക്ക് നാടുകടത്തി. പിന്നാലെ പുട്ടിന്റെ വിശ്വസ്തയായി മാറി. അലക്‌സ് ചാപ്മാനുമായുള്ള വിവാഹത്തിലൂടെ അന്നയ്ക്ക് ബ്രീട്ടീഷ് പൗരത്വവും ലഭിച്ചിരുന്നു.