ഇസ്രയേൽ നടത്തിയത് ഭീരുത്വപരമായ ​ആക്രമണം, ശക്തമായ പ്രതിഷേധം അറിയിച്ച് യുഎഇ, ഇസ്രയേൽ ഡെപ്യൂട്ടി അംബാസഡറെ വിളിച്ചു വരുത്തി

അബുദാബി: ദോഹയിൽ ഇസ്രയേൽ നടത്തിയ ആക്രമണത്തിലും, തുടർന്ന് പ്രധാനമന്ത്രി ബെഞ്ചമിൻ നെതന്യാഹു നടത്തിയ പ്രസ്താവനയിലും യുഎഇ ശക്തമായ പ്രതിഷേധം രേഖപ്പെടുത്തി. ഇതിൻ്റെ ഭാഗമായി ഇസ്രയേൽ ഡെപ്യൂട്ടി അംബാസഡറായ ഡേവിഡ്​ അഹദ്​ ഹൊർസാൻറിയെ യുഎഇ വിദേശകാര്യ മന്ത്രാലയം വിളിച്ചുവരുത്തി. യുഎഇ അന്താരാഷ്ട്ര സഹകരണ വകുപ്പ് സഹമന്ത്രി റീം ബിന്ത് ഇബ്രാഹിം അൽ ഹാഷിമിയാണ് ഇസ്രയേൽ പ്രതിനിധിയെ വിളിച്ചുവരുത്തി പ്രതിഷേധം അറിയിച്ചത്.ഗൾഫ്​ രാജ്യങ്ങൾക്കു നേരെയുള്ള ഏത്​ ആക്രമണവും ഗൾഫ് രാജ്യങ്ങളുടെ കൂട്ടായ​ സുരക്ഷ സംവിധാനത്തിന്​ നേരെയുള്ള ആക്രമണമായി വിലയിരുത്തുമെന്ന് യുഎഇ വ്യക്തമാക്കി. ഈ ആക്രമണങ്ങൾ മേഖലയിലെ സമാധാനം ഇല്ലാതാക്കുമെന്നും, അപകടകരമായ സാഹചര്യങ്ങളിലേക്ക് നയിക്കുമെന്നും അൽ ഹാഷിമി കൂട്ടിച്ചേർത്തു. ഖത്തറിനെതിരെ ഇസ്രയേൽ നടത്തിയത്​ ഭീരുത്വപരമായ ​ആക്രമണമാണെന്ന്​ റീം ബിൻത്​ ഇ​ബ്രാഹിം അൽ ഹാഷിമി പറഞ്ഞു. നിരുത്തരവാദപരമായ ഈ ആക്രമണം ഖത്തറിൻറെ പരമാധികാരത്തിന്​ മേലുള്ള നഗ്​നമായ ലംഘനമാണ്​. അന്താരാഷ്ട്ര നിയമത്തിനും യുഎൻ ചാർട്ടറിനും നേരെയുള്ള ഗുരുതരമായ ആക്രമണം പ്രാദേശിക, അന്തർദേശീയ സുരക്ഷയ്ക്കും സ്ഥിരതയ്ക്കും ഭീഷണിയാണ്​. ഖത്തറിൻറെ സുരക്ഷയും സ്ഥിരതയും ഗൾഫ്​ സഹകരണ കൗൺസിൽ (ജി.സി.സി) രാജ്യങ്ങളുടെ സുരക്ഷയുടെയും സ്ഥിരതയുടെയും അവിഭാജ്യ ഘടകമാണെന്നും അൽ ഹാഷിമി കൂട്ടിച്ചേർത്തു.