യുനെസ്‌കോയില്‍ നിന്ന് വീണ്ടും പിന്മാറാനൊരുങ്ങി യു.എസ്

പാരിസ്: ഐക്യരാഷ്ട്ര സഭയുടെ വിദ്യാഭ്യാസ, ശാസ്ത്ര, സാംസ്‌കാരിക ഏജന്‍സിയായ യുനെസ്‌കോയില്‍ നിന്ന് വീണ്ടും പിന്‍വാങ്ങാനൊരുങ്ങി യു.എസ്. രണ്ട് വര്‍ഷം മുമ്പാണ് യു.എസ് യുനെസ്‌കോയില്‍ വീണ്ടും അംഗമായത്. ഏജന്‍സിയുടെ ഇസ്രായേല്‍ വിരുദ്ധ നയമാണ് പിന്മാറ്റത്തിന് കാരണമെന്ന് വൈറ്റ് ഹൗസ് അറിയിച്ചു.

ഗസ്സയിലെ ഇസ്രായേല്‍ അധിനിവേശത്തെ എതിര്‍ക്കുന്ന യുനെസ്‌കോ ജൂത വിശുദ്ധ സ്ഥലങ്ങള്‍ പലസ്തീന്‍ ലോക പൈതൃക ഇടങ്ങളായി അവതരിപ്പിക്കുകയാണെന്നും വൈറ്റ് ഹൗസ് കുറ്റപ്പെടുത്തുന്നു. പാരിസ് ആസ്ഥാനമായുള്ള യുനെസ്‌കോയില്‍ നിന്ന് അമേരിക്ക പുറത്തുപോകുന്നത് ഇത് മൂന്നാം തവണയും ട്രംപ് ഭരണകൂടത്തിന്റെ കാലത്ത് രണ്ടാം തവണയുമാണ്.

പ്രസിഡന്റായി ആദ്യ ഊഴത്തില്‍ 2017ലായിരുന്നു ട്രംപ് ആദ്യം യുനെസ്‌കോ വിട്ടത്. അന്നും ഇസ്രായേല്‍ വിരുദ്ധത ആരോപിച്ചായിരുന്നു പിന്‍വാങ്ങല്‍. ബൈഡന്‍ ഭരണകാലത്താണ് 2023ല്‍ വീണ്ടും ഭാഗമായി മാറുന്നത്. 2011ല്‍ ഫലസ്തീനെ അംഗരാജ്യമായി അംഗീകരിച്ചതിനു പിന്നാലെ യുനെസ്‌കോക്ക് സാമ്പത്തിക സഹായം യു.എസ് നിര്‍ത്തിവെച്ചിരുന്നു.