ട്രംപിന്റെ ഹെലികോപ്ടറിന് സാങ്കേതിക തകരാര്‍, അടിയന്തര ലാന്‍ഡിംഗ്

ലണ്ടന്‍: യുഎസ് പ്രസിഡന്റ് ഡോണള്‍ഡ് ട്രംപും ഭാര്യ മെലനിയ ട്രംപും ബ്രിട്ടനിലെ ഔദ്യോഗിക സന്ദര്‍ശനം പൂര്‍ത്തിയാക്കി ലണ്ടനിലെ സ്റ്റാന്‍സ്റ്റഡ് വിമാനത്താവളത്തിലേക്ക് മടങ്ങുന്നതിനിടെ അവര്‍ സഞ്ചരിച്ച മറീന്‍ വണ്‍ ഹെലികോപ്റ്ററിന് സാങ്കേതിക തകരാര്‍ സംഭവിച്ചു. ചെക്കേഴ്സില്‍ നിന്നുള്ള യാത്രാമധ്യേ ഹൈഡ്രോളിക് സംവിധാനത്തിലുണ്ടായ ചെറിയ തകരാറിനെ തുടര്‍ന്ന് പൈലറ്റുമാര്‍ മുന്‍കരുതലിന്റെ ഭാഗമായി ഹെലികോപ്റ്റര്‍ സമീപത്തെ ഒരു പ്രാദേശിക എയര്‍ഫീല്‍ഡില്‍ അടിയന്തരമായി ഇറക്കി.

തകരാര്‍ ശ്രദ്ധയില്‍പ്പെട്ട ഉടന്‍, സുരക്ഷിതമായി ഹെലികോപ്റ്റര്‍ നിലത്തിറക്കിയ ശേഷം ട്രംപിനെയും മെലനിയയെയും മറ്റൊരു ഹെലികോപ്റ്ററില്‍ സ്റ്റാന്‍സ്റ്റഡ് വിമാനത്താവളത്തിലേക്ക് മാറ്റി. ഈ സംഭവത്തെ തുടര്‍ന്ന് ട്രംപിന്റെ യാത്ര ഏകദേശം 20 മിനിറ്റ് വൈകി. വൈറ്റ്ഹൗസ് പ്രസ് സെക്രട്ടറി കാരലിന്‍ ലീവിറ്റ് സ്ഥിതിഗതികള്‍ വിശദീകരിച്ചുകൊണ്ട്, പ്രസിഡന്റിന്റെയും ഭാര്യയുടെയും സുരക്ഷ ഉറപ്പാക്കാന്‍ എല്ലാ മുന്‍കരുതലുകളും സ്വീകരിച്ചതായി അറിയിച്ചു.

സ്റ്റാന്‍സ്റ്റഡ് വിമാനത്താവളത്തില്‍ എത്തിയ ശേഷം, ട്രംപ് പ്രസിഡന്റിന്റെ ഔദ്യോഗിക വിമാനമായ എയര്‍ ഫോഴ്‌സ് വണ്ണില്‍ യുഎസിലേക്ക് മടങ്ങി. ഈ സംഭവം പ്രസിഡന്റിന്റെ യാത്രാ ഷെഡ്യൂളില്‍ ചെറിയ തടസ്സം സൃഷ്ടിച്ചെങ്കിലും, അപകടമൊഴിവാക്കി സുരക്ഷിതമായി യാത്ര പൂര്‍ത്തിയാക്കാന്‍ കഴിഞ്ഞതായി അധികൃതര്‍ സ്ഥിരീകരിച്ചു.