റഷ്യന്‍ എണ്ണ സംഭരണശാലയില്‍ യുക്രെയ്‌ന്റെ വന്‍ ഡ്രോണ്‍ ആക്രണം

മോസ്‌കോ: എണ്ണ സംഭരണശാലയ്ക്ക് തീപിടിക്കാനിടയാക്കിയത് യുക്രെയ്‌ന്റെ ഡ്രോണ്‍ ആക്രമണമാണെന്ന് റഷ്യന്‍ അധികൃതര്‍. സോച്ചിയിലെ എണ്ണ സംഭരണശാലയിലുണ്ടായ തീപിടിത്തത്തിന്റെ കാരണമാണ് അധികൃതര്‍ വെളിപ്പെടുത്തിയത്.

ഡ്രോണുകള്‍ ഇന്ധന ടാങ്കില്‍ ഇടിച്ചതായും 127 അഗ്‌നിശമന സേനാംഗങ്ങള്‍ തീ അണയ്ക്കുന്നുണ്ടെന്നും ക്രാസ്‌നോദര്‍ മേഖല ഗവര്‍ണര്‍ വെനിയമിന്‍ കോണ്ട്രാറ്റീവ് ടെലിഗ്രാമില്‍ പറഞ്ഞതായി ബിബിസി റിപ്പോര്‍ട്ട് ചെയ്തു.

അതേസമയം,യുക്രെയ്നിന്റെ തെക്കന്‍ നഗരമായ മൈക്കോലൈവില്‍ റഷ്യന്‍ മിസൈല്‍ ആക്രമണത്തില്‍ വീടുകളും സിവിലിയന്‍ അടിസ്ഥാന സൗകര്യങ്ങളും നശിപ്പിച്ചതായി പ്രാദേശിക ഉദ്യോഗസ്ഥര്‍ പറഞ്ഞുവെന്നും ബിബിസി റിപ്പോര്‍ട്ട് ചെയ്തു.

റഷ്യന്‍ സൈന്യം ആവര്‍ത്തിച്ച് ഷെല്ലാക്രമണം നടത്തുന്ന നഗരത്തില്‍ കുറഞ്ഞത് ഏഴ് സാധാരണക്കാര്‍ക്ക് പരിക്കേറ്റതായി റിപ്പോര്‍ട്ടുണ്ട്. പരിക്കേറ്റവരില്‍ മൂന്ന് പേര്‍ ആശുപത്രിയില്‍ ചികിത്സയിലാണെന്ന് യുക്രെയ്‌നിന്റെ സ്റ്റേറ്റ് എമര്‍ജന്‍സി സര്‍വീസ് അറിയിച്ചു.

തെക്കന്‍ റഷ്യന്‍ നഗരങ്ങളായ റിയാസാന്‍, പെന്‍സ, വൊറോനെഷ് എന്നിവിടങ്ങളിലെ ഇന്‍സ്റ്റാളേഷനുകള്‍ ലക്ഷ്യമിട്ട് യുക്രെയ്ന്‍ വാരാന്ത്യത്തില്‍ നടത്തിയ നിരവധി ഡ്രോണ്‍ ആക്രമണങ്ങളില്‍ ഒന്നായിരുന്നു സോച്ചി റിഫൈനറിക്ക് നേരെയുള്ള ഡ്രോണ്‍ ആക്രമണം എന്ന് റഷ്യന്‍ അധികൃതര്‍ പറഞ്ഞു. ആക്രമണങ്ങളെക്കുറിച്ച് യുക്രെയ്ന്‍ ഇതുവരെ പ്രതികരിച്ചിട്ടില്ല.

വ്യോമ പ്രതിരോധം ഒറ്റരാത്രികൊണ്ട് 93 യുക്രെനിയന്‍ ഡ്രോണുകള്‍ തടഞ്ഞു. റഷ്യ ഒറ്റരാത്രികൊണ്ട് 83 ഡ്രോണുകള്‍ അഥവാ 76 ഡ്രോണുകളും ഏഴ് മിസൈലുകളും പ്രയോഗിച്ചതായും അതില്‍ 61 എണ്ണം വെടിവച്ചതായും യുക്രെയ്ന്‍ അധികൃതര്‍ അറിയിച്ചു.