യുഎൻ ഇളവ് നൽകി, താലിബാൻ വിദേശകാര്യ മന്ത്രി ഇന്ത്യയിലേക്ക്; വഴിയൊരുങ്ങുന്നത് വലിയ മാറ്റങ്ങൾക്ക്

കാബൂൾ: അഫ്ഗാൻ വിദേശകാര്യ മന്ത്രി അമീർ ഖാൻ മുത്തഖി ഇന്ത്യയിലേക്ക്.

 2021 ഓഗസ്റ്റിൽ താലിബാൻ അഫ്ഗാനിസ്ഥാനിൽ അധികാരം പിടിച്ചെടുത്ത ശേഷമുള്ള ആദ്യ ഉന്നതതല സന്ദർശനമാണിത്.

ഇത് ഇന്ത്യ-അഫ്ഗാനിസ്ഥാൻ ബന്ധത്തിൽ ഒരു പുതിയ അധ്യായത്തിന് തുടക്കം കുറിക്കുമെന്നാണ് പ്രതീക്ഷിക്കപ്പെടുന്നത്.

കാബൂളിൽ ദീർഘകാലമായി സ്വാധീനം നിലനിർത്താൻ ശ്രമിക്കുന്ന പാകിസ്ഥാന് ഈ സന്ദർശനം തിരിച്ചടിയാണെന്നാണ് പൊതുവെ വിലയിരുത്തപ്പെടുന്നത്. 

ഈ വർഷം ആദ്യം 80,000ത്തിലധികം അഫ്ഗാൻ അഭയാർത്ഥികളെ തിരിച്ചയക്കാനുള്ള പാകിസ്ഥാന്‍റെ തീരുമാനം താലിബാനുമായുള്ള ബന്ധം വഷളാക്കിയിരുന്നു.

ഇത് ഇന്ത്യയ്ക്ക് ഇടപെടാൻ നയതന്ത്രപരമായ ഇടം തുറന്നു കൊടുത്തു. അഫ്ഗാൻ വിദേശ ബന്ധങ്ങൾ ശക്തിപ്പെടുത്താനും പാകിസ്ഥാനെ ആശ്രയിക്കുന്നത് കുറയ്ക്കാനും തയ്യാറാണെന്നതിന്‍റെ സൂചനയാണ് മുത്തഖിയുടെ ഇന്ത്യാ സന്ദർശനമെന്ന് വിദേശകാര്യ വിദഗ്ധർ വിലയിരുത്തുന്നു.

ഒക്ടോബർ 10-ന് നടക്കുന്ന ഉഭയകക്ഷി കൂടിക്കാഴ്ച വഴിത്തിരിവായേക്കാം.

ഇത് ഇന്ത്യയും അഫ്ഗാനിസ്ഥാനും തമ്മിലുള്ള സഹകരണത്തിലേക്ക് നയിച്ചേക്കാം. ഇത് ദക്ഷിണേഷ്യയിലെ അധികാര സമവാക്യങ്ങളെ മാറ്റിയെഴുതാനിടയുണ്ട്. 

മുത്തഖിക്ക് ഒക്ടോബർ 9നും 16നും ഇടയിൽ ദില്ലി സന്ദർശിക്കുന്നതിന് അന്താരാഷ്ട്ര യാത്രാ നിയന്ത്രണങ്ങളിൽ താൽക്കാലിക ഇളവ് അനുവദിച്ചതായി ഐക്യരാഷ്ട്രസഭയുടെ രക്ഷാസമിതി സ്ഥിരീകരിച്ചു.

 ഇന്ത്യൻ നയതന്ത്ര വൃത്തങ്ങൾ നേരത്തെ തന്നെ മുത്തഖിയുമായി ചർച്ച നടത്തിയിരുന്നു.

 ഈ ജനുവരി മുതൽ വിദേശകാര്യ സെക്രട്ടറി വിക്രം മിസ്രി, മുതിർന്ന ഐഎഫ്എസ് ഉദ്യോഗസ്ഥൻ ജെ പി സിംഗ് എന്നിവർ മുത്തഖിയുമായും മറ്റ് താലിബാൻ നേതാക്കളുമായും നിരവധി തവണ ചർച്ചകൾ നടത്തി.

 പലപ്പോഴും ദുബൈ പോലുള്ള ഇടങ്ങളിലാണ് കൂടിക്കാഴ്ചകൾ നടന്നത്.

 അഫ്ഗാന് ആരോഗ്യ മേഖലയിലും അഭയാർത്ഥി പുനരധിവാസത്തിനുമുള്ള ഇന്ത്യയുടെ മാനുഷിക സഹായമായിരുന്നു പ്രധാന ചർച്ചാ വിഷയം.