/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2026/01/04/delta-2026-01-04-08-57-40.jpg)
വാഷിങ്ടണ്: വെനിസ്വേലന് പ്രസിഡന്റ് നിക്കോളാസ് മഡുറോയെയും ഭാര്യ സിലിയ ഫ്ലോറസിനെയും യുഎസ് സേന പിടികൂടിയെന്ന വാര്ത്ത ലോകത്തെ ഞെട്ടിച്ചിരിക്കുകയാണ്.
അമേരിക്കന് പ്രസിഡന്റ് ഡൊണാള്ഡ് ട്രംപ് സ്ഥിരീകരിച്ച ഈ അതീവ രഹസ്യ ഓപ്പറേഷന് പിന്നില് പ്രവര്ത്തിച്ചത് അമേരിക്കയുടെ കരുത്തുറ്റ പ്രത്യേക ദൗത്യസേനയായ 'ഡെല്റ്റ ഫോഴ്സ്' ആണെന്നാണ് റിപ്പോര്ട്ടുകള്. ഈ സാഹചര്യത്തില് എന്താണ് ഡെല്റ്റ ഫോഴ്സ് എന്നും അവരുടെ പ്രവര്ത്തനങ്ങള് എങ്ങനെയെന്നും പരിശോധിക്കാം.
എന്താണ് ഡെല്റ്റ ഫോഴ്സ്?
ഔദ്യോഗികമായി 'ഫസ്റ്റ് സ്പെഷ്യല് ഫോഴ്സ് ഓപ്പറേഷണല് ഡിറ്റാച്ച്മെന്റ്-ഡെല്റ്റ' എന്നറിയപ്പെടുന്ന ഡെല്റ്റ ഫോഴ്സ്, അമേരിക്കന് കരസേനയുടെ കീഴിലുള്ള ഏറ്റവും ഉയര്ന്ന പ്രത്യേക ദൗത്യസേനയാണ്. അതീവ രഹസ്യസ്വഭാവമുള്ള പ്രവര്ത്തനങ്ങള്ക്കും നിര്ണ്ണായകമായ സൈനിക നീക്കങ്ങള്ക്കുമായാണ് ഈ വിഭാഗം രൂപീകരിച്ചിട്ടുള്ളത്.
നോര്ത്ത് കരോലിനയിലെ ഫോര്ട്ട് ലിബര്ട്ടിയാണ് ഇവരുടെ ആസ്ഥാനം. ജോയിന്റ് സ്പെഷ്യല് ഓപ്പറേഷന്സ് കമാന്ഡിന്റെ നേരിട്ടുള്ള നിയന്ത്രണത്തിലാണ് ഇവര് പ്രവര്ത്തിക്കുന്നത്.
രൂപീകരണവും ചരിത്രവും
1970-കളില് ലോകമെമ്പാടും ഭീകരവാദ പ്രവര്ത്തനങ്ങള് വര്ദ്ധിച്ചുവന്ന സാഹചര്യത്തിലാണ് ഭീകരവിരുദ്ധ പ്രവര്ത്തനങ്ങള്ക്കായി ഒരു പ്രത്യേക സേന എന്ന ആശയം അമേരിക്ക മുന്നോട്ടുവെച്ചത്. 1977-ല് കേണല് ചാര്ലി ബെക്ക്വിത്ത് ആണ് ഡെല്റ്റ ഫോഴ്സ് സ്ഥാപിച്ചത്. ബ്രിട്ടീഷ് സ്പെഷ്യല് എയര് സര്വീസിന്റെ മാതൃകയിലാണ് ഇതിന്റെ ഘടനയും പ്രവര്ത്തനരീതിയും വിഭാവനം ചെയ്തത്.
പ്രധാന ദൗത്യങ്ങള്
ഭീകരവിരുദ്ധ പ്രവര്ത്തനങ്ങള്, ബന്ദികളെ മോചിപ്പിക്കല്, ശത്രുരാജ്യങ്ങളിലെ നിര്ണ്ണായക വിവരങ്ങള് ശേഖരിക്കല്, അതിതീവ്ര സുരക്ഷയുള്ള സ്ഥലങ്ങളില് കടന്നുകയറി ലക്ഷ്യം നടപ്പിലാക്കല് എന്നിവയാണ് ഡെല്റ്റ ഫോഴ്സിന്റെ പ്രധാന ചുമതലകള്.
ചരിത്രപ്രധാനമായ ചില ദൗത്യങ്ങള്
ഇറാനിലെ അമേരിക്കന് എംബസിയില് ബന്ദികളാക്കപ്പെട്ട 52 പേരെ മോചിപ്പിക്കാന് നടത്തിയ 'ഓപ്പറേഷന് ഈഗിള് ക്ലോ' ആയിരുന്നു ഇവരുടെ ആദ്യത്തെ പ്രധാന ദൗത്യം. എന്നാല് സാങ്കേതിക തടസ്സങ്ങള് കാരണം ഈ ദൗത്യം പരാജയപ്പെട്ടു.
2019-ല് ഐസിസ് തലവന് അബൂബക്കര് അല്-ബാഗ്ദാദിയെ വധിച്ച ദൗത്യത്തിന് പിന്നിലും ഡെല്റ്റ ഫോഴ്സ് ആയിരുന്നു. ഇറാഖ് മുന് പ്രസിഡന്റ് സദ്ദാം ഹുസൈനെ പിടികൂടിയ 'ഓപ്പറേഷന് റെഡ് ഡോണ്' എന്ന ദൗത്യത്തിലും ഇവര് നിര്ണ്ണായക പങ്കുവഹിച്ചു.
മഡുറോയുടെ അറസ്റ്റും ഡെല്റ്റ ഫോഴ്സും
അമേരിക്കന് പ്രസിഡന്റ് ട്രംപിന്റെ പ്രഖ്യാപനം അനുസരിച്ച്, വെനിസ്വേലന് ഭരണാധികാരി നിക്കോളാസ് മഡുറോയെ കസ്റ്റഡിയിലെടുത്ത് വിമാനമാര്ഗ്ഗം മറ്റൊരു രാജ്യത്തേക്ക് മാറ്റിക്കഴിഞ്ഞു. ലോകത്തിലെ തന്നെ ഏറ്റവും കടുപ്പമേറിയ പരിശീലനം സിദ്ധിച്ച ഡെല്റ്റ ഫോഴ്സ് അംഗങ്ങളാണ് വെനിസ്വേലയില് കടന്ന് ഈ ദൗത്യം പൂര്ത്തിയാക്കിയത്.
അമേരിക്കയുടെ സൈനിക ചരിത്രത്തിലെ തന്നെ ഏറ്റവും നിര്ണ്ണായകമായ നീക്കങ്ങളിലൊന്നായി മഡുറോയുടെ ഈ അറസ്റ്റ് രഖപ്പെടുത്തപ്പെടുമെന്ന് ഉറപ്പാണ്.