നതാന്‍സ് ആക്രമണം; ഇറാനില്‍ ആണവ ചോര്‍ച്ച?

ടെഹ്റാന്‍: ഇറാന്റെ പ്രധാന ആണവ കേന്ദ്രമായ നതാന്‍സിന് നേരെ അമേരിക്കയും ഇസ്രായേലും സംയുക്ത സൈനിക ആക്രമണം നടത്തിയതായി ഇറാന്‍. യുറേനിയം സമ്പുഷ്ടീകരണ പ്ലാന്റിന് നേരെയാണ് ആക്രമണം ഉണ്ടായതെന്നും ആണവ ചോര്‍ച്ചയ്ക്ക് സാധ്യതയുണ്ടെന്നും ഇറാന്‍ മുന്നറിയിപ്പ് നല്‍കി.

വിയന്നയില്‍ ചേര്‍ന്ന അന്താരാഷ്ട്ര ആണവോര്‍ജ്ജ ഏജന്‍സിയുടെ യോഗത്തിലാണ് ഇറാന്‍ പ്രതിനിധി റെസ നജാഫി വെളിപ്പെടുത്തല്‍ നടത്തിയിരിക്കുന്നത്. എന്നാല്‍ ഇറാന്റെ അവകാശവാദത്തിന് തെളിവില്ലെന്നാണ് ഐക്യരാഷ്ട്രസഭയുടെ ആണവ നിരീക്ഷക സമിതിയുടെയും ഇന്റര്‍നാഷണല്‍ ആറ്റോമിക് എനര്‍ജി ഏജന്‍സിയുടെയും വാദം.

ഇറാന്റെ സമാധാനപരമായ ആണവ പദ്ധതികളെ തകര്‍ക്കുക എന്ന ലക്ഷ്യത്തോടെയാണ് കഴിഞ്ഞ ദിവസം ഈ ആക്രമണം നടന്നതെന്ന് റെസ നജാഫി ആരോപിച്ചു. നതാന്‍സിലെ പ്ലാന്റിന്റ് എത്രത്തോളം നാശനഷ്ടങ്ങള്‍ സംഭവിച്ചു എന്നതില്‍ വ്യക്തതയില്ല. അമേരിക്കയും ഇസ്രായേലും ചേര്‍ന്ന് ഇറാനിലെ വിവിധ കേന്ദ്രങ്ങളില്‍ ആരംഭിച്ച 'ഓപ്പറേഷന്‍ എപ്പിക് ഫ്യൂറി' എന്ന സൈനിക നീക്കത്തിന്റെ ഭാഗമായാണ് ആക്രമണമെന്നാണ് വിവരം. ഇറാന്റെ ആണവ ശേഷിയെ പൂര്‍ണമായും ഇല്ലാതാക്കുക എന്നതാണ് അമേരിക്കയുടെയും ഇസ്രായേലിന്റെയും ആവശ്യം.

'ഇന്നലെ വീണ്ടും അവര്‍ ഇറാന്റെ സമാധാനപരമായ സുരക്ഷിതമായ ആണവ കേന്ദ്രങ്ങളെ ആക്രമിച്ചു. ഇറാന്‍ ആണവായുധങ്ങള്‍ വികസിപ്പിക്കാന്‍ ആഗ്രഹിക്കുന്നുവെന്ന അവരുടെ ന്യായീകരണം ഒരു വലിയ നുണയാണ്,' - ഇറാന്‍ പ്രതിനിധി റെസ നജാഫി പറഞ്ഞു.

തന്റെ രാജ്യത്തിനെതിരായ ആക്രമണങ്ങള്‍ നിയമവിരുദ്ധവും കുറ്റകരവും ക്രൂരവുമാണെന്ന് നജാഫി ആരോപിച്ചു. കൂടാതെ 35 അംഗ ഐഎഇഎ ബോര്‍ഡ് ഓഫ് ഗവര്‍ണര്‍മാരുടെ സംസ്ഥാനങ്ങള്‍ ആക്രമണങ്ങളെ ശക്തമായി അപലപിക്കണമെന്നും അദ്ദേഹം ആവശ്യപ്പെട്ടു. സംഘര്‍ഷം മൂലമുണ്ടായ ആശയവിനിമയത്തിലെ പരിമിതികള്‍ കണക്കിലെടുത്ത്, ഐഎഇഎ ഇറാനിയന്‍ ആണവ നിയന്ത്രണ അധികാരികളെ നിരന്തരം ബന്ധപ്പെടുന്നതായും അധികൃതര്‍ വ്യക്തമാക്കി. എന്നാല്‍ ഇറാനിലെ ആണവ കേന്ദ്രങ്ങള്‍ ആക്രമിക്കപ്പെട്ടതായി ഇതുവരെ ഒരു സൂചനയും ഇല്ലെന്നാണ് യുഎന്‍ ആണവ നിരീക്ഷണ മേധാവി വ്യക്തമാക്കിയത്. റഷ്യയുടെ അഭ്യര്‍ഥനപ്രകാരമാണ് വിയന്നയിലെ ഐഎഇഎ ആസ്ഥാനത്ത് യോഗം ചേര്‍ന്നത്.

അതേസമയം ഫെബ്രുവരി 28ന് ആരംഭിച്ച ആക്രമണത്തെത്തുടര്‍ന്നുണ്ടായ വ്യോമ ഭീഷണികളെ വിജയകരമായി തടഞ്ഞതായി യുണൈറ്റഡ് അറബ് എമിറേറ്റ്‌സ് പ്രതിരോധ മന്ത്രാലയം നേരത്തെ പ്രഖ്യാപിച്ചിരുന്നു. ഇറാന്‍ ആക്രമണം ആരംഭിച്ചതിനുശേഷം സൈന്യം ഇതുവരെ 165 ബാലിസ്റ്റിക് മിസൈലുകള്‍, രണ്ട് ക്രൂയിസ് മിസൈലുകള്‍, 541 ഇറാനിയന്‍ ഡ്രോണുകള്‍ എന്നിവയെ വിജയകരമായി നിര്‍വീര്യമാക്കിയെന്ന് യുഎഇ മന്ത്രാലയം സ്ഥിരീകരിച്ചു.

നിലവില്‍, പശ്ചിമേഷ്യയുടെ വ്യോമാതിര്‍ത്തി അടച്ചിട്ടിരിക്കുകയാണ്. പശ്ചിമേഷ്യയിലെ സൈനിക നീക്കം കാരണം വിമാന സര്‍വീസുകള്‍ തടസപ്പെട്ടതിനാല്‍, നൂറുകണക്കിന് ഇന്ത്യക്കാര്‍ ദുബായ്, ദോഹ, മേഖലയിലെ മറ്റ് പ്രധാന വിമാനത്താവളങ്ങള്‍ എന്നിവിടങ്ങളില്‍ കുടുങ്ങിക്കിടക്കുകയാണ്. പലരും ഇന്ത്യന്‍ സര്‍ക്കാരിനോട് സാമൂഹ്യ മാധ്യമങ്ങള്‍ വഴി സഹായം അഭ്യര്‍ഥിക്കുന്നുമുണ്ട്.