വെനസ്വേലയുടെ ആക്ടിങ് പ്രസിഡന്റ്; സ്വയം പ്രഖ്യാപിച്ച് ട്രംപ്

വാഷിങ്ടണ്‍: ലാറ്റിന്‍ അമേരിക്കന്‍ രാജ്യമായ വെനസ്വേലയുടെ 'ആക്ടിങ് പ്രസിഡന്റ്' എന്ന് വിശേഷിപ്പിച്ചുകൊണ്ടുള്ള ചിത്രം പങ്കുവെച്ച് യുഎസ് പ്രസിഡന്റ് ഡൊണാള്‍ഡ് ട്രംപ്. തന്റെ സ്വന്തം സാമൂഹികമാധ്യമമായ ട്രൂത്ത് സോഷ്യലിലാണ് വിക്കിപീഡിയ പേജിലേത് എന്ന് തോന്നിക്കുംവിധം എഡിറ്റ് ചെയ്ത ചിത്രം അദ്ദേഹം പങ്കുവെച്ചത്.

ട്രംപിന്റെ ഫോട്ടോയുടെ താഴെ 2026 ജനുവരി മുതല്‍ വെനസ്വേലയുടെ ആക്ടിങ് പ്രസിഡന്റ് എന്ന് എഴുതിയിട്ടുള്ളതായി ചിത്രത്തില്‍ കാണാം. യുഎസിന്റെ 45-ാമത്തെയും 47-ാമത്തെയും പ്രസിഡന്റ് എന്നും രേഖപ്പെടുത്തിയിട്ടുണ്ട്.

ജനുവരി മാസമാദ്യം വെനസ്വേലയ്ക്കെതിരേ യുഎസ് കടുത്ത നടപടികളുമായി രംഗത്തെത്തിയിരുന്നു. വെനസ്വേലന്‍ പ്രസിഡന്റ് നിക്കൊളാസ് മഡൂറോയെയും ഭാര്യ സീലിയ ഫ്ലോറെസിനയേയും ഇരുചെവിയറിയാതെ കടത്തിക്കൊണ്ടുവന്ന് ന്യൂയോര്‍ക്കിലെ ജയിലിലാക്കുകയും ചെയ്തിരുന്നു. വെനസ്വേലയിലെ പെട്രോളിയം അടക്കമുള്ള ഊര്‍ജസമ്പത്താണ് ട്രെംപിന്റെ ഈ നടപടികള്‍ക്കു പിന്നിലെന്നാണ് വിലയിരുത്തപ്പെടുന്നത്.

അതിനിടെ, വെനസ്വേലന്‍ എണ്ണ വിറ്റുകിട്ടുന്ന പണം നിയമക്കുരുക്കില്‍പ്പെടാതെ സംരക്ഷിക്കുന്നതിനായി ട്രംപ് എക്‌സിക്യുട്ടീവ് ഉത്തരവിറക്കിയിരുന്നു. എണ്ണയില്‍നിന്നുള്ള വരുമാനം വെനസ്വേലയുടെ സ്വത്താണെന്നും ഭരണപരവും നയതന്ത്രപരവുമായ ലക്ഷ്യങ്ങളോടെ യുഎസ് അത് കൈകാര്യംചെയ്യുകയാണെന്നും ഉത്തരവില്‍ പറയുന്നു. വെനസ്വേലയ്ക്കു വായ്പനല്‍കിയവര്‍ ഈ പണത്തില്‍ അവകാശമുന്നയിക്കാതിരിക്കുക, കടംവീട്ടുന്നതിനായി വെനസ്വേല ഇത് പിടിച്ചെടുക്കുകയോ നിയമപരമായ അവകാശമുന്നയിക്കുകയോ ചെയ്യാതിരിക്കുക എന്നിവയാണ് നിയമത്തിന്റെ ഉദ്ദേശ്യം.

യുഎസിന്റെ ഉപരോധം കാരണം വില്‍ക്കാന്‍കഴിയാതെ വെനസ്വേലയില്‍ കെട്ടിക്കിടക്കുന്ന അഞ്ചുകോടിയോളം വീപ്പ പെട്രോളിയം യുഎസ് വിറ്റ് ആ പണം താന്‍ കൈകാര്യംചെയ്യുമെന്ന് ട്രംപ് പറഞ്ഞിരുന്നു. അതുകൂടാതെ, വെനസ്വേലയില്‍ നിക്ഷേപിക്കാന്‍ എണ്ണക്കമ്പനിയുടമകളെ ട്രംപ് ക്ഷണിച്ചിരുന്നു.