കോഴിക്കോട് വാനും കാറും കൂട്ടിയിടിച്ച് 3 പേര്‍ മരിച്ചു

കോഴിക്കോട്: ദേശീയപാതയില്‍ കുന്ദമംഗലം പതിമംഗലം അങ്ങാടി മുറിയനാല്‍ പത്താം മൈലില്‍ പിക്കപ്പ് വാനും കാറും കൂട്ടിയിടിച്ച് മൂന്നു മരണം. പിക്കപ്പ് വാന്‍ ഡ്രൈവറും രണ്ട് കാര്‍ യാത്രക്കാരുമാണ് മരിച്ചത്. തിങ്കളാഴ്ച പുലര്‍ച്ചെ രണ്ടു മണിയോടെയാണ് അപകടം. പിക്കപ്പ് വാനിന്റെ ക്ലീനര്‍ ഉള്‍പ്പെടെ രണ്ടു പേര്‍ക്കു പരുക്കേറ്റു.

ചുരമിറങ്ങി കുന്ദമംഗലത്തേക്ക് വന്ന പിക്കപ്പ് വാനും കൊടുവള്ളിയിലേക്കു പോയ കാറുമാണ് നേര്‍ക്കുനേര്‍ കൂട്ടിയിടിച്ചത്. കാറില്‍ ഉണ്ടായിരുന്ന കോഴിക്കോട് ഇങ്ങാപ്പുഴ പെരുമ്പള്ളി സ്വദേശി സുബിക്കി ഫസീല്‍ (27), കൊടുവള്ളി വാവാട് ഇരുമോത്ത് മുണ്ടോട്ട് ഹൗസില്‍ നിഹാല്‍ (27), പിക്കപ്പ് വാന്‍ ഓടിച്ച വയനാട് മരക്കത്തൊടി പൊഴുതന ഷമീര്‍(33) എന്നിവരാണ് മരിച്ചത്. അപകടത്തില്‍ പരുക്കേറ്റ പൊഴുതന ഷഫീക്കിന്റെ (43) നില ഗുരുതരമാണ്. അപകടം ഉണ്ടായ പതിമംഗലം അങ്ങാടിയിലെ മുറിയനാല്‍ ഭാഗം സ്ഥിരം അപകടമേഖലയാണ്.

അപകടത്തില്‍പ്പെട്ട കാറും പിക്കപ്പ് വാനും ഹൈഡ്രോളിക് കട്ടര്‍ ഉപയോഗിച്ച് വെട്ടിപ്പൊളിച്ചാണ് വെള്ളിമാടുകുന്നില്‍നിന്നെത്തിയ അഗ്‌നിരക്ഷാസേനയും പൊലീസും നാട്ടുകാരും ചേര്‍ന്നു യാത്രക്കാരെ പുറത്തെടുത്തത്. പിക്കപ്പ് വാനിന്റെ മുന്‍ഭാഗവും കാറിന്റെ ഇടതുഭാഗവും പൂര്‍ണമായും തകര്‍ന്ന നിലയിലാണ്. കാര്‍ യാത്രികരായ രണ്ടുപേരും സംഭവസ്ഥലത്തു വച്ചും പിക്കപ്പ് വാന്‍ ഡ്രൈവര്‍ ആശുപത്രിയിലേക്കുള്ള യാത്രയ്ക്കിടയിലുമാണു മരിച്ചത്. മൃതദേഹങ്ങള്‍ മെഡിക്കല്‍ കോളജ് മോര്‍ച്ചറിയിലേക്കു മാറ്റി. പരുക്കേറ്റ രണ്ടുപേരും മെഡിക്കല്‍ കോളജ് ആശുപത്രിയില്‍ ചികിത്സയിലാണ്.