ബൈക്ക് വൈദ്യുത പോസ്റ്റില്‍ ഇടിച്ച് യുവാവിന് ദാരുണാന്ത്യം

ഹരിപ്പാട് : നിയന്ത്രണം തെറ്റിയ ബൈക്ക് വൈദ്യുത പോസ്റ്റില്‍ ഇടിച്ച് യുവാവ് ദാരുണാന്ത്യം. രണ്ടുപേര്‍ക്ക് പരിക്കേറ്റു. കാര്‍ത്തികപ്പള്ളി വെട്ടുവേനി പള്ളിയ്ക്കല്‍ ഗോപിയുടെ മകന്‍ കാളിദാസന്‍ (20) ആണ് മരിച്ചത്. കെ വി ജെട്ടി കാട്ടില്‍മാര്‍ക്കറ്റ് പുത്തന്‍ കരിയില്‍ ക്ഷേത്രത്തിന് സമീപം ഇന്നലെ വൈകിട്ട് 3. 30 ന് ആയിരുന്നു അപകടം ഉണ്ടായത്.

കൂടെയുണ്ടായിരുന്ന താമല്ലാക്കല്‍ ഹുസ്‌ന മന്‍സില്‍ ഹാജ ഹസ്സന്‍ (20), എറണാകുളം സ്വദേശി ആകാശ് എന്നിവര്‍ക്കും പരിക്കേറ്റു. ദുബായില്‍ ജോലിക്ക് പോയിരുന്ന കാളിദാസന്‍ ശാരീരിക അസ്വസ്ഥതകളെ തുടര്‍ന്ന് മൂന്ന് ദിവസം മുന്‍പാണ് നാട്ടിലെത്തിയത്. അമ്മ ശ്രീകല സൗദിയില്‍ നഴ്‌സാണ്. മൃതദേഹം ഹരിപ്പാട് താലൂക്ക് ആശുപത്രി മോര്‍ച്ചറിയില്‍.