ആര്‍ക്കും സമയമില്ല; ചോരക്കളമായി സീബ്രാലൈനുകള്‍

കൊച്ചി: സംസ്ഥാനത്ത് വാഹനാപകടങ്ങളില്‍ മരിക്കുന്ന കാല്‍നടയാത്രക്കാരുടെ എണ്ണം ആശങ്കാജനകമായി കൂടുന്നു. ഈ വര്‍ഷം ഒക്ടോബര്‍ 31 വരെ സീബ്രലൈനില്‍ റോഡ് മുറിച്ച് കടക്കുന്നതിനിടെ വാഹനമിടിച്ച് മരിച്ചവര്‍ 218 പേര്‍. ഇക്കാലയളവില്‍ 851 കാല്‍നടക്കാരാണ് സംസ്ഥാനത്ത് വാഹനമിടിച്ച് മരിച്ചത്. 

ബോധവത്കരണവും പരിശോധനയും മുറയ്ക്കു നടക്കുമ്പോഴും സംസ്ഥാനത്ത് വാഹനാപകടം കൂടുകയാണ്. 2022-ല്‍ 43,910 അപകടങ്ങളിലായി 4,317 പേര്‍ മരിച്ചു. 2023- ആയപ്പോള്‍ അപകടങ്ങളുടെ എണ്ണം 48,068 ആയി ഉയര്‍ന്നു.

എന്നാല്‍ മരിച്ചവരുടെ എണ്ണം 4,084 മായി കുറഞ്ഞു. 2024-ല്‍ അപകടങ്ങളുടെ എണ്ണം 48,834 ആയി കൂടി. മരിച്ചവരുടെ എണ്ണം 3774-ആയി കുറഞ്ഞു. ഈ വര്‍ഷം ഓഗസ്റ്റ് 31വരെ 32,658 അപകടങ്ങളിലായി 2,408 മരണങ്ങളാണ് കേരളത്തില്‍ റിപ്പോര്‍ട്ട് ചെയ്തത്.

സീബ്രലൈനും റോഡും മുറിച്ച് കടക്കുന്നതിനിടെ കാല്‍നടയാത്രക്കാര്‍ അപകടത്തില്‍പ്പെടാന്‍ കാരണം വാഹനമോടിക്കുന്നവരുടെ അശ്രദ്ധയും അതിവേഗവുമാണെന്ന് പോലീസ് വ്യക്തമാക്കുന്നു. വീതികുറഞ്ഞ റോഡുകളിലൂടെ പരിധിയില്‍കൂടുതല്‍ വേഗത്തില്‍ പോകുന്നത് അപകടം ക്ഷണിച്ച് വരുത്തുന്നു.

ആവശ്യത്തിന് സീബ്രലൈനില്ലാത്തതും പലയിടത്തും മാഞ്ഞുപോയതും പ്രതിസന്ധിയുണ്ടാക്കുന്നു. ദേശീയപാതകളില്‍പ്പോലും ചുരുക്കം ചിലയിടങ്ങളില്‍ മാത്രമാണ് കാല്‍നട യാത്രക്കാര്‍ക്ക് റോഡ് മുറിച്ച് കടക്കാന്‍ സഹായകമായ സിഗ്‌നല്‍ സംവിധാനമുള്ളത്.

വാഹനപ്പെരുപ്പവും ഫുട്പാത്തുകളില്ലാത്ത റോഡുകളും അപകടം കൂട്ടുന്നു. യാത്രക്കാര്‍ സീബ്രലൈന്‍ മുറിച്ച് കടക്കുമ്പോള്‍പോലും വാഹനങ്ങള്‍ കുതിച്ചുപോകുന്നു.

നഗരങ്ങളില്‍ ഗതാഗതക്കുരുക്ക് ഒഴിവാക്കാന്‍ സിഗ്‌നല്‍ സംവിധാനം പരമാവധി കുറച്ച് മറ്റ് മാര്‍ഗങ്ങള്‍ തേടുമ്പോള്‍ കാല്‍നടക്കാര്‍ക്ക് നാലുവരിപ്പാതകള്‍ ഉള്‍പ്പെടെ മുറിച്ചുകടക്കാന്‍ കഴിയാതെ വരുന്നു.