.ശബരിമല സ്വര്‍ണക്കൊള്ളയിൽ ദേവസ്വം മുന്‍ കമ്മീഷണര്‍ എന്‍ വാസു പ്രതിപട്ടികയിൽ

തിരുവനന്തപുരം:  ശബരിമല സ്വർണ്ണ മോഷണ  കേസിൽ മുൻ ദേവസ്വം കമ്മീഷണറും ദേവസ്വം ബോർഡ് മുൻ പ്രസിഡന്റുമായ എൻ വാസുവും പ്രതിപട്ടികയിലേക്ക് .

സ്വർണം മോഷണം പോയ  കേസിൽ മൂന്നാം പ്രതിയായിട്ടാണ് വാസുവിന്റെ പേര് ഇപ്പോൾ ഉള്ളത് .

ഉണ്ണിക്കൃഷ്ണൻ പോറ്റിയുടെ കസ്റ്റഡി റിപ്പോർട്ടിലാണ് 2019-ൽ ദേവസ്വം കമ്മീഷണറായിരുന്ന വാസുവിന്റെ പങ്കു വളരെയധികം  വ്യക്തമാക്കുന്നത് .

സ്വർണം പൊതിഞ്ഞ കട്ടിളപ്പാളി ചെമ്പുപാളിയാണെന്ന് മഹസറിൽ രേഖപ്പെടുത്തിയത് അന്നത്തെ ദേവസ്വം കമ്മീഷണർ എൻ വാസുവിന്റെ ശുപാർശയിലാണ് എന്നാണ് എസ്‌ഐടി വ്യക്തമാക്കുന്നത്.

സ്വർണമോഷണ  കേസിൽ രണ്ടാമത്തെ അന്വേഷണ പുരോഗതി റിപ്പോർട്ട് പ്രത്യേക അന്വേഷണ സംഘം ഇന്നു ഹൈക്കോടതിയിൽ സമർപ്പിക്കും.

തട്ടിപ്പിൽഉന്നത സ്ഥാനങ്ങളിൽ നിൽക്കുന്ന കൂടുതൽ ആളുകളുടെ ഇടപെടലുകൾ അടക്കം ഈ റിപ്പോർട്ടിൽ രേഖപ്പെടുത്തിയിരിക്കുന്നു എന്നുള്ളത് വളരെ വ്യക്തമായ കാര്യമാണ് .

സ്വർണം ചെമ്പായി രേഖപ്പെടുത്തിയതിലും സ്വർണം വിൽപ്പന നടത്തിയതിലും അടക്കം അന്ന് ദേവസ്വം ബോർഡിലുണ്ടായിരുന്നപലർക്കും  അറിവുണ്ടായിരുന്നു എന്നതിൽ എസ്‌ഐടിക്ക് വ്യക്തത ലഭിച്ചതായാണ് സൂചന.

കേസുമായി ബന്ധപ്പെട്ട് എൻ വാസുവിനെ പ്രത്യേക അന്വേഷണ സംഘം നേരത്തെ ചോദ്യം ചെയ്തിരുന്നു.

 എൻ വാസു രണ്ടുതവണ ദേവസ്വം കമ്മീഷണറും സ്വർണക്കൊള്ള നടന്ന് മാസങ്ങൾക്കുശേഷം ദേവസ്വം ബോർഡ് പ്രസിഡന്റുമായിരുന്നു.

ദ്വാരപാലക ശിൽപങ്ങളുടേയും ശ്രീകോവിലിന്റേയും മുഖ്യജോലികൾ പൂർത്തിയാക്കിയശേഷം സ്വർണം ബാക്കിയുണ്ടെന്നും സഹായം ആവശ്യമുള്ള പെൺകുട്ടികളുടെ വിവാഹാവശ്യത്തിന് ഇത് ഉപയോഗിക്കാൻ ആഗ്രഹിക്കുന്നുവെന്നും പറഞ്ഞ് കേസിലെ ഒന്നാം പ്രതിയായ ഉണ്ണിക്കൃഷ്ണൻ പോറ്റി വാസുവിന് ഇ-മെയിൽ അയച്ചിരുന്നു.

2019 ഡിസംബർ ഒമ്പതിന് ഉണ്ണിക്കൃഷ്ണൻ പോറ്റിയുടെ ഇ-മെയിൽ തനിക്ക് ലഭിച്ചിരുന്നു എന്ന് വാസുവും സമ്മതിച്ചിരുന്നു.

ശബരിമല സ്വർണ തട്ടിപ്പിൽ അറസ്റ്റിലായ ഉണ്ണികൃഷ്ണൻ പോറ്റി, മുരാരി ബാബു, സുധീഷ് കുമാർ എന്നിവർ റിമാൻഡിലാണ്.