/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/02/28/ugGAJzephxgCaWC2zL91.jpg)
ന്യൂഡല്‍ഹി: കേരളത്തിലെ കോണ്‍ഗ്രസ് നേതാക്കളുമായുള്ള ഹൈക്കമാന്‍ഡ് ചര്‍ച്ചയ്ക്ക് പിന്നാലെ കെ. സുധാകരന്‍ നേതൃസ്ഥാനത്ത് തുടരാന്‍ തീരുമാനമായി. കേരളത്തില്‍ കോണ്‍ഗ്രസ് നേതാക്കള്‍ക്കിടയില്‍ സമ്പൂര്‍ണ ഐക്യം വേണമെന്ന് ഹൈക്കമാന്‍ഡ് നിര്‍ദേശം നല്‍കി.മാധ്യമങ്ങളില്‍ വ്യത്യസ്ത അഭിപ്രായം പറയാന്‍ ആര്‍ക്കും അവകാശമില്ലെന്നും ഹൈക്കമാന്‍ഡ് പൂര്‍ണ നിരീക്ഷണം നടത്തുമെന്നും യോഗത്തില്‍ നേതൃത്വം വ്യക്തമാക്കി. കെപിസിസി അധ്യക്ഷനെ മാറ്റുന്ന കാര്യം ഉള്‍പ്പെടെ യോഗത്തില്‍ ചര്‍ച്ചയായില്ല. നേതൃമാറ്റം ചര്‍ച്ചയായില്ല. കെ സുധാകരന്‍ തന്നെ കെപിസിസി അധ്യക്ഷനായി തല്‍ക്കാലം തുടരും. കെപിസിസി തലത്തില്‍ പുനസംഘടന ഉടനുണ്ടാകില്ല. പരാതിയുള്ള ഡിസിസികളില്‍ മാത്രം പുനസംഘടന നടത്താനും യോഗത്തില്‍ തീരുമാനിച്ചു.
തനിക്കും വിഡി സതീശനും ഇടയില്‍ ഒരു പ്രശ്‌നവുമില്ലെന്ന് കെപിസിസി അധ്യക്ഷന്‍ കെ സുധാകരന്‍ യോഗത്തില്‍ പറഞ്ഞു. എല്ലാം മാധ്യമങ്ങള്‍ ഉണ്ടാക്കിയതെന്ന് കെ സുധാകരന്‍ യോഗത്തില്‍ പറഞ്ഞു. യോഗത്തില്‍ വികാരാധീനനായാണ് സുധാകരന്‍ സംസാരിച്ചത്. നേതൃതലത്തില്‍ തന്നെ ഒറ്റപ്പെടുത്താന്‍ നീക്കം നടന്നുവെന്നും താന്‍ ദുര്‍ബലനായെന്ന പ്രചാരണത്തെ ആരും പ്രതിരോധിച്ചില്ലെന്നും സുധാകരന്‍ തുറന്നടിച്ചു. കെ പി സി സി അധ്യക്ഷ സ്ഥാനത്ത് നിന്ന് മാറ്റുമെന്ന പ്രചാരണത്തെ ശരിവെയ്ക്കും വിധം ചില നേതാക്കള്‍ മാധ്യമങ്ങളോട് പരസ്യ പ്രതികരണം നടത്തിയെന്നും സുധാകരന്‍ പറഞ്ഞു.പാര്‍ട്ടി ഐക്യം തകര്‍ക്കും വിധം ഒരു പ്രസ്താവനയോ നീക്കമോ തന്നില്‍ നിന്ന് ഉണ്ടായിട്ടില്ലെന്നും സുധാകരന്‍ യോഗത്തില്‍ പറഞ്ഞു.
കൂടെ നില്‍ക്കുമെന്ന് തരൂര്‍
പാര്‍ട്ടിയുടെ കൂടെ നില്‍ക്കുമെന്ന് ശശി തരൂര്‍ യോഗത്തില്‍ അറിയിച്ചു. പാര്‍ട്ടിയെ അധികാരത്തിലെത്തിക്കാനുള്ള നീക്കങ്ങള്‍ക്ക് പൂര്‍ണ്ണ പിന്തുണയെന്ന് ശശി തരൂര്‍ യോഗത്തില്‍ അറിയിച്ചു.
വിജയം നിര്‍ണായകം
അനാവശ്യ വിവാദങ്ങള്‍ പാര്‍ട്ടിയെ ബാധിക്കുന്നുവെന്നാണ് തനിക്ക് കിട്ടിയ റിപ്പോര്‍ട്ടെന്ന് രാഹുല്‍ ഗാന്ധി യോഗത്തില്‍ പറഞ്ഞു.കേരളത്തില്‍ ജനപക്ഷത്തു നിന്ന് പാര്‍ട്ടി വിഷയങ്ങള്‍ ഏറ്റെടുക്കണം. കേരളത്തിലെ പാര്‍ട്ടിയുടെ വിജയം ഇന്ത്യയാകെയുള്ള പ്രവര്‍ത്തകര്‍ ഉറ്റു നോക്കുന്നുവെന്നും നിര്‍ണായകമാണെന്നും രാഹുല്‍ ഗാന്ധി യോഗത്തില്‍ പറഞ്ഞു.
കേരളത്തിലെ കോണ്‍ഗ്രസ് ചരിത്രത്തില്‍ ഏറ്റവും മികച്ച യോഗമാണിതെന്നും കേരളത്തില്‍ കോണ്‍ഗ്രസ് നേതാക്കളെല്ലാം ഒറ്റക്കെട്ടാണെന്നും പ്രശ്‌നങ്ങളൊന്നുമില്ലെന്നും കെസി വേണുഗോപാല്‍ യോഗത്തിനുശേഷം മാധ്യമങ്ങളോട് പറഞ്ഞു.യുഡിഎഫിനെ അധികാരത്തിലെത്തിക്കാന്‍ സാധ്യമായതെല്ലാം ചെയ്യുമെന്ന് മല്ലികാര്‍ജ്ജുന്‍ ഖര്‍ഗെ പറഞ്ഞു. കേരളത്തില്‍ മാറ്റം അനിവാര്യമാണെന്നും അടുത്ത കൊല്ലം ജനദ്രോഹ, വര്‍ഗ്ഗീയ ശക്തികളെ കേരളം പരാജയപ്പെടുത്തുമെന്നും ഖര്‍ഗെ പറഞ്ഞു.
പാര്‍ട്ടി നിലപാടിന് വിരുദ്ധമായി സംസാരിച്ചാല്‍ നടപടി
കേരളത്തിലെ തെരഞ്ഞെടുപ്പില്‍ സ്വീകരിക്കേണ്ട തന്ത്രങ്ങള്‍ ചര്‍ച്ചയായെന്നും എല്ലാ നേതാക്കളും സംസാരിച്ചുവെന്നും വരും മാസങ്ങളില്‍ നിരവധി പരിപാടികള്‍ നടത്തുമെന്നും കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി ദീപ ദാസ് മുന്‍ഷി യോഗത്തിനുശേഷം മാധ്യമങ്ങളോട് പറഞ്ഞു. നേതാക്കള്‍ക്ക് മാധ്യമങ്ങളോട് സംസാരിക്കുന്നതിന് ഒരു നിയന്ത്രണവും വെച്ചിട്ടില്ലെന്നും പാര്‍ട്ടി നിലപാടുകള്‍ക്ക് വിരുദ്ധമായി ആര് സംസാരിച്ചാലും നടപടി ഉണ്ടാകുമെന്നും ദീപ ദാസ് മുന്‍ഷി പറഞ്ഞു. ശശി തരൂരിന്റെ മാത്രം അല്ല വിഷയം. ആര് ചെയ്താലും നടപടിയുണ്ടാകും.
അതേസമയം ജില്ലാ തലത്തില്‍ മാറ്റം വൈകാതെ ഉണ്ടാകും. ചിലരെ കൂടി ഉള്‍പ്പെടുത്താനുണ്ട്. നേതൃമാറ്റം തന്റെ കയ്യില്‍ നില്‍ക്കുന്ന കാര്യമല്ല. കേരളത്തില്‍ നേതൃമാറ്റം അജണ്ടയിലില്ലെന്നും കെപിസിസിയിലെ ചില ഒഴിവുകള്‍ നികത്തുമെന്നും ദീപാ ദാസ് മുന്‍ഷി പറഞ്ഞു. കോണ്‍ഗ്രസ് സ്റ്റേറ്റ് കോണ്‍ഫറന്‍സ് നടത്തുമെന്നും രാഹുലും ഖര്‍ഗെയും പങ്കെടുക്കുമെന്നും കേരളത്തിലെ കോണ്‍ഗ്രസില്‍ ഐക്യമില്ല എന്ന് മാധ്യമങ്ങള്‍ പ്രചരണം നടത്തുകയാണെന്നും ഞങ്ങള്‍ ഒറ്റക്കെട്ടാണെന്നും ദീപ ദാസ് മുന്‍ഷി പറഞ്ഞു.