നിയമസഭാ രാജ്യാന്തര പുസ്തകോത്സവം ജനുവരി 7 മുതൽ 13 വരെ

തിരുവനന്തപുരം: കേരള നിയമസഭാ രാജ്യാന്തര പുസ്തകോത്സവത്തിന്റെ (കെഎൽഐബിഎഫ്) നാലാം പതിപ്പ് ജനുവരി 7 മുതൽ 13 വരെ നിയമസഭാ മന്ദിരത്തിൽ നടക്കും.

ഏഴിനു 11 മണിക്ക് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.

ബുക്കർ പുരസ്‌കാര ജേതാവ് ബാനുമുഷ്താഖ് മുഖ്യാതിഥിയാവും. 

മൊറീഷ്യസ് മുൻ പ്രസിഡന്റ് അമീന ഗുരിബ് ഫക്കിം, ശ്രീലങ്കൻ എഴുത്തുകാരൻ ചൂളാനന്ദ സമരനായകെ, തസ്‌ലീമ നസ്രിൻ, റാണാ അയൂബ് പ്രഫുൽ ഷിലേദാർ, ടി.എം.കൃഷ്ണ, സൈറ ഷാ ഹലിം, ആകാർ പട്ടേൽ, പി.സായ്‌നാഥ്, സ്റ്റാൻലി ജോൺ തുടങ്ങിയ രാജ്യാന്തരതലത്തിൽ ശ്രദ്ധേയരായ എഴുത്തുകാരും മലയാളത്തിലെ പ്രമുഖ എഴുത്തുകാരും പങ്കെടുക്കുമെന്നു സ്പീക്കർ എ.എൻ.ഷംസീർ അറിയിച്ചു.

180 പ്രസാധകരുടെ മുന്നൂറിലേറെ സ്റ്റാളുകളുണ്ട്. കുട്ടികൾക്കായി ആശയസംവാദം കഥ പറച്ചിൽ, ഫാഷൽ ഷോ. നാടകം എന്നിവ നടക്കും. സ്‌കൂൾ  വിദ്യാർത്ഥികളെ പങ്കെടുപ്പിച്ച് 8 ന് സെക്രട്ടേറിയറ്റിലെ അസംബ്‌ളി ഹാളിൽ മാതൃകാ നിയമസഭാ സംഘടിപ്പിക്കും.

സാഹിത്യകലാസാംസ്‌കാരിക മേഖലകളിലെ സമഗ്രസംഭാവനയ്ക്ക് നിയമസഭാ രാജ്യാന്തര പുസ്തകോത്സവത്തോടനുബന്ധിച്ച് നൽകുന്നപുരസ്‌കാരം ഒരു ലക്ഷം രൂപ) എഴുത്തുകാരൻ എൻ.എസ്.മാധവന് സമർപ്പിക്കും .

നിയമസഭയിലെ ആർ.ശങ്കരനാരായണൻ തമ്പി മെംബേഴ്‌സ് ലോഞ്ചിൽ പുസ്തകോത്സവത്തിന്റെ ഉദ്ഘാടനചടങ്ങിൽ മുഖ്യമന്ത്രി പിണറായി വിജയൻ പുരസ്‌കാരം സമ്മാനിക്കും.