നവജാത ശിശുവിന് ഗുരുതര വൈകല്യം;ഡോക്ടർമാരുടെ അനാസ്ഥയെന്ന് കുടുംബം

ആലപ്പുഴ: ഗുരുതര വൈകല്യങ്ങളോടെ നവജാത ശിശു ജനിച്ച സംഭവത്തിൽ ഡോക്ടർമാരുടെ വീഴ്‌ച ചൂണ്ടിക്കാട്ടി കുടുംബം നൽകിയ പരാതിയിൽ കേസെടുത്ത പോലീസ്.ആലപ്പുഴ കടപ്പുറം കുട്ടികളുടെയും സ്ത്രീകളുടെയും ആശുപത്രിയിലെ ഗൈനക്കോളജിസ്റ്റുമാരായ ഡോ.പുഷ്പ,ഡോ. ഷേർലി, എന്നിവർക്കെതിരെയും സ്വകാര്യ ലാബിലെ രണ്ടു ഡോക്ടർമാർക്കെതിരെയുമാണ് ആലപ്പുഴ പോലീസ് കേസെടുത്തത്.

ഗുരുതര വൈകല്യങ്ങളാണ് നവജാത ശിശുവിന് ഉള്ളത്.കുഞ്ഞിന്റെ ചെവിയും കണ്ണും യഥാസ്ഥാനത്തല്ല. വായ തുറക്കുന്നില്ല മലർത്തികിടത്തിയാൽ കുഞ്ഞിന്റെ നാവ് ഉള്ളിലേക്കു പോകും, കാലിനും കൈക്കും വളവുണ്ട്, ജനനേന്ദ്രിയത്തിനും കാര്യമായ വൈകല്യമുണ്ട്.ഗർഭ കാലത്ത് നടത്തിയ സ്കാനിങ്ങിൽ ഒന്നുംതന്നെ ഇതൊന്നും കണ്ടെത്തിയിരുന്നില്ല.ഇതിനെതിരെയാണ് കുഞ്ഞിന്റെ അമ്മ പരാതി നൽകിയിരിക്കുന്നത്.

ഗർഭകാലത്തു കടപ്പുറം വനിതാ-ശിശു ആശുപത്രിയിലായിരുന്നു ചികിത്സ.പ്രസവ ശസ്ത്രക്രിയ നടന്നത് ആലപ്പുഴ മെഡിക്കൽ കോളേജ് ആശുപത്രിയിലാണ് പലതവണ സ്കാനിംഗ് നടത്തിയിട്ടും ശിശുവിന്റെ വൈകല്യം കണ്ടെത്താൻ കഴിയാഞ്ഞത് ഡോക്ടർമാരുടെ വീഴ്ചയാണെന്നാണ് കുടുംബം പരാതിയിൽ പറയുന്നത്.സ്കാനിംഗ് നടത്തിയ രണ്ടു ലാബുകളിലും ആരോഗ്യവകുപ്പ് ഇന്നലെ പരിശോധന നടത്തി.സ്കാനിംഗ് യന്ത്രത്തിന്റെ കാര്യക്ഷമത പരിശോധിച്ചു.

സംഭവത്തിൽ പ്രാഥമിക റിപ്പോർട്ട് സമർപ്പിക്കാൻ വനിതാ ശിശു ആശുപത്രി സുപ്രണ്ടിനോട് ഡിഎംഒ നിർദ്ദേശിച്ചിട്ടുണ്ട്.സംഭവത്തിൽ കുട്ടിയുടെ കുടുംബം മുഖ്യമന്ത്രിക്ക് പരാതി നൽകിയിട്ടുണ്ട്. പരാതി ഗൗരവകരമായിട്ടാണ് കാണുന്നതെന്നും അന്വേഷണത്തിന് നിർദ്ദേശം നൽകിയതായും ആരോഗ്യവകുപ് അറിയിച്ചു.